Abashoramari b’i Burayi barashaka icyerekezo mu bijyanye n’ingufu mu Rwanda

Yanditswe na Mukaneza M.Ange
Kuya 6 Werurwe 2017 saa 07:01
Yasuwe :
0 0

Abahagarariye Sosiyete 10 zo mu bihugu bigize Umuryango w’Ubumwe bw’u Burayi, EU, bari mu Rwanda aho baje kureba aho bashobora gushora imari mu bijyanye n’ingufu zisazura mu Rwanda (Renewable Energy).

Mu nama yahuje aba bashoramari n’abanyarwanda bakora ibijyanye n’ingufu kuri uyu wa 6 Werurwe 2017, beretswe aho u Rwanda rugeze mu bijyanye no gucanira abaturage ndetse n’ibikwiye gushyirwamo ingufu.

Umuyobozi mukuru w’Ishyirahamwe ry’Abikorera mu bijyanye n’ingufu z’amashanyarazi (EPD), Dr Ivan Twagirashema, yavuze ko imishinga 25 yujuje ibyangombwa ari yo yatoranyijwe kugira ngo yerekwe aba bashoramari.

Yakomeje avuga ko nyuma y’uru ruzinduko ruzakomereza no muri Uganda, ari bwo aba bashoramari bazagaragaza imishinga bahisemo gushoramo imari yabo, ku buryo buri wese yahabwa imigabane ihwanye n’ibyo yashoye.

Ambasaderi wa EU mu Rwanda, Michael Ryan, yavuze ko uru rugendo ruri muri gahunda yatangijwe n’uyu muryango mu rwego rwo guteza imbere ubufatanye na Afurika mu bijyanye n’ingufu zisazura.

Yagaragaje kandi ko EU imaze gushora agera muri miliyoni 200 z’ama Euro mu bijyanye n’ingufu mu Rwanda, kandi ko bizeye ko muri ibi biganiro hazamo imyanzuro ifatika.

Yongeyeho ko u Rwanda ari ahantu heza ho gushora imari mu bijyanye n’ingufu, kuko ari nk’umutima w’ibihugu byo mu karere ndetse avuga ko uburyo rworohereza ishoramari bizagaragarira ku mubare w’abazagarukana amafaranga yabo.

Iyi nama izamara iminsi itatu, yitabiriwe n’abantu bagera ku 100 barimo abaturutse ku mugabane w’u Burayi no mu bindi bihugu bya Afurika birimo u Rwanda, Uganda na Nigeria.

Kugeza ubu 30% by’ingo zo mu Rwanda ni zo zicana, intego ihari ni ukugera kuri 70% mu 2018; 48% bakagira umuriro uturutse ku mashanyarazi na ho 22% bagakoresha uturutse ku zindi ngufu zirimo n’izisazura.

Abikorera basabwa kugira uruhare rwa 22% mu kugeza umuriro ku baturage, ariko ubu bari ku kigero cya 2% gusa.

Iyi nama izamara iminsi itatu, yitabiriwe n’abantu bagera ku 100 barimo abaturutse ku mugabane w’u Burayi no mu bindi bihugu bya Afurika birimo u Rwanda, Uganda na Nigeria
Ambasaderi wa EU mu Rwanda, Michael Ryan, yavuze ko uru rugendo ruri muri gahunda yatangijwe n’uyu muryango mu rwego rwo guteza imbere ubufatanye na Afurika mu bijyanye n’ingufu
Umuyobozi mukuru w’Ishyirahamwe ry’Abikorera mu bijyanye n’ingufu z’amashanyarazi (EPD), Dr Ivan Twagirashema

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza