Kugura imigabane ya leta muri I&M Bank bikomeje kwegerezwa Abanyarwanda mu turere twose tw’igihugu

Yanditswe na Rabbi Malo Umucunguzi
Kuya 5 Werurwe 2017 saa 02:17
Yasuwe :
0 0

Inzego zitandukanye zikomeje gushishikariza Abanyarwanda batandukanye barimo abikorera n’ibigo bya Leta, kugura imigabane guverinoma y’u Rwanda ifite muri I&M Bank, nyuma y’iminsi mike ishyizwe ku isoko.

Ubuyobozi bwa I&M Bank bugaragaza ko ari amahirwe kugura imigabane muri iyo banki, ndetse abantu batandukanye bari kubyitabira.

Umuyobozi Ushinzwe kumenyekanisha ibikorwa muri I&M Bank Rwanda, Norbert Mwanangu, yagize ati “Tumaze igihe dukora ibiganiro mu bice bitandukanye by’igihugu mu minsi ishize, kandi uburyo abantu babyitabira baba ari abantu ku giti cyabo na za koperative, birashimishije.”

Imigabane ya leta muri I&M Bank ingana na miliyoni 99 ihwanye na 19.81% by’iyo banki, yashyizwe ku isoko kuwa 14 Gashyantare, Abanyarwanda b’ingeri zitandukanye batangira gushishikarizwa kugura iyo migabane.

Guverinoma iteganya kubona miliyari 8.9 Frw mu kugurisha iyo migabane, azatangwa nk’icyiciro cya mbere cyo kwishyura imigabane leta ifite mu mushinga wo kubaka Ikibuga cy’Indege cya Bugesera biteganywa ko uzarangira mu 2018 utwaye asaga miliyoni $800, leta ikaba ifitemo 25% naho ikigo Mota-Engil Africa kizubaka icyo kibuga cy’indege, kikagiramo 75%.

Uretse kuzenguruka mu duce dutandukanye tw’igihugu, ibigo bya leta n’ibyigenga nabyo byagiye byegerwa muri iyo gahunda, bigakorwa n’inzego zirimo Ikigo cy’Igihugu cy’isoko ry’imari n’imigabane (Capital Market Authority), Minisiteri y’Imari n’Igenamigambi (MINECOFIN) n’ubuyobozi bwa I&M Bank kimwe n’abakozi bafasha abantu bagana isoko ry’imari n’imigabane.

Kuwa Gatatu tariki 01 Werurwe, hasuwe abakozi bo mu bigo bya Crystal Ventures Limited, ZIGAMA CSS n’Ikigo cy’Igihugu cy’Iterambere, RDB.

Minisiteri y’Imari n’Igenamigambi ivuga ko kwegera abantu mu byiciro bitandukanye ari “Ukugira ngo ihe Abanyarwanda ubushobozi bwo gushora imari mu buryo burambye kandi bwunguka no kurema mu banyarwanda umuco wo kuzigama aho bakura inyungu z’igihe kirekire.”

Abo bakozi bagaragarijwe ko ubukungu bwa I&M Bank buhagaze neza, bashishikarizwa kuyiguramo imigabane.

Inzego zibishinzwe zanageze mu kigo gishinzwe amazi n’isukura (WASAC), aho Umuyobozi muri MINECOFIN, ari nawe wari uhagarariye inyungu za leta muri I&M Bank, Nzayikorera Jonathan, yabagaragarije ibyiza byo kuguramo imigabane.

Yavuze ko iyi banki yagiye ikura kuva yashingwa mu 1963 yitwa BCR ari nayo banki ya mbere yabaye mu Rwanda, kugeza ubwo ihinduye izina ikitwa I&M Bank mu 2013.

Umuntu yemerewe kugura imigabane itajya munsi ya 1000 ihwanye n’amafaranga 90000, Abanyarwanda bakaba bemerewe kugura 60% by’imigabane mbere yo kuyiha abanyamahanga.

Biteganyijwe ko imigabane muri iyo banki izacuruzwa guhera kuwa 14 Gashyantare 2017 kugeza kuwa 10 Werurwe 2017 mu gihe mbere byateganywaga ko bizarangira kuwa 3 Werurwe, iminsi yongerwa kugira ngo inzego bireba zibashe kugera ku baturage hose mu gihugu no ku batuye muri Afurika y’Iburasirazuba.

Guverinoma guverinoma ishaka kuvana ishoramari mu nzego zinyuranye, igashyira imbaraga mu kuzamura imibereho y’abaturage, ndetse abikorera bakagira uruhare mu migendekere myiza y’ubucuruzi bworoheye buri wese.

Ibyo kandi biri no mu rwego rwo guteza imbere Isoko ry’Imari n’Imigabane, nk’uko bigaragara mu ntego z’icyerekezo 2020.

Kayijuka Moses wo muri Minecofin asobanura ko gushora imari mu Rwanda nta kibazo kirimo
Abakozi ba Wasac basobanurirwa ibyo kugura imigabane ya leta muri I&M Bank

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244