Kanimba yakuriye inzira ku murima abifuza ko ibicuruzwa byo muri EAC bizamurirwa imisoro

Yanditswe na Kanamugire Emmanuel
Kuya 25 Ugushyingo 2016 saa 08:40
Yasuwe :
0 0

Usanga inganda ntoya zikizamuka imbere mu gihugu zigaragaza ko ikintu rukumbi cyazifasha gutera imbere ari uko hashyirwaho imisoro ihanitse ku bicuruzwa bikomoka mu karere cyangwa bigakumirwa kugira ngo ibikorerwa mu Rwanda bibashe kugurwa n’abantu babyiyumvemo.

Mu kwizihiza umunsi Nyafurika ngarukamwaka w’inganda wabaye kuri uyu wa 25 Ugushyingo 2016, hagaragajwe ko mu bikibangamira inganda harimo n’ibicuruzwa bituruka mu baturanyi bigatuma iby’abanyarwanda bitagurwa.

Minisitiri w’Ubucuruzi n’Inganda n’Ibikorwa by’Umuryango wa Afurika y’Iburasirazuba François Kanimba, yagaragaje ko igikenewe ubu ari ugukora ibintu byiza kuko politiki y’ubucuruzi ya EAC itagomba guheza.

Ati “Ntabwo kongera imisoro ari byo bituma ubukungu bw’igihugu butera imbere.Iyo muvuga ngo kongera imisoro y’ibituruka hanze, ngira ngo murabizi turi mu muryango wa EAC ufite ingamba zo gushyiraho isoko rimwe duhuriyeho turi ibihugu bitandatu.”

Yakomeje agira ati “Kimwe mu byo twumvikanyeho ni uko ibicuruzwa byo muri ibyo bihugu bigomba kugenda byinjira mu bindi nta mahoro bitanze. Ntabwo dushobora gufata ibicuruzwa byakorewe muri Tanzania , Kenya , Uganda, ngo tubishyirireho imisoro kuko na bo ntabwo badushyiriraho imisoro ku bicuruzwa byacu.”

Ku bijyanye n’ibicuruzwa bituruka hanze y’umuryango wa EAC, Kanimba yasobanuye ko ibihugu byose uko ari bitandatu biwugize byemeranijwe kubisoresha 100% gusa ngo hari igihe habaho ikintu kidasanzwe igihugu kikaba cyasaba kudakurikiza iryo bwirizwa.

Ati “Mbahe urugero nko ku isukari ivuye mu bihugu bitari iby’umuryango wa EAC amahoro tumvikanye ko igomba gusora ijana ku ijana ariko twebwe nk’u Rwanda twabasabye ko twayisoresha 25% kugira ngo ibiciro ku isoko ryacu bitazamuka cyane ugasanga ikiro kikubye kabiri.”

Uwo mwihariko ngo uterwa n’uko hari ikibazo cy’inganda zitunganya isukari mu Rwanda zitarabasha guhaza isoko nk’ibyo bihugu gusa ngo hari gahunda yo kuziteza imbere.

Yanagarutse ku bibazo bikidindiza iterambere ry’inganda mu Rwanda

Igiciro gihanitse cy’amashanyarazi, amabanki atabonera inguzanyo z’igihe kirekire abanyenganda, imisoro ku bikoresho by’ibanze bikenerwa n’inganda, ni bimwe mu byagarutsweho mu byagaragajwe nk’ibidindiza iterambere ry’inganda.

Minisitiri Kanimba avuga ko ibiciro by’amashanyarazi ahenze, guverinoma irimo kwiga uburyo hashyirwaho igiciro kimwe ku banyenganda, cyenda kungana n’abandi bo mu karere kugira ngo byibura ibiciro byabo bye guhabana ku isoko bitewe nuko bamwe bahenzwe n’amashyanyarazi.

Ku kijyanye n’inguzanyo z’igihe kirekire zitabonwa n’abazifuza bose hagaragajwe ko igihe abizigamira ari bake bikigoye kuba haboneka amafaranga ku banyenganda.

Kuri ubu umusaruro mbumbe w’ibikomoka mu nganda ungana na 14 % by’umusaruro w’igihugu.Muri uyu muhango hanashimiwe inganda zitwaye neza mu iterambere ry’igihugu.

Minisitiri Kanimba avuga ko isoko umuntu aba agomba gukora ibyiza bituma abasha kugurisha aho kuzamura imisoro y'ibituruka muri EAC
Bamwe mu bitabiriye ibirori byo kwizihiza umunsi nyafurika wahariwe inganda
Abanyenganda bashima uburyo u Rwanda rwihuta mu iterambere
Dr Diane Karusisi, Umuyobozi Mukuru wa BK, avuga ku by'inguzanyo zihabwa abanyenganda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza