Minisitiri Musoni yagaragarije Abashinwa amahirwe ari mu gushora imari mu Rwanda

Yanditswe na Mukaneza M.Ange
Kuya 20 Werurwe 2017 saa 08:45
Yasuwe :
1 0

Minisitiri w’Ibikorwaremezo, James Musoni yahamagariye ba rwiyemezamirimo b’Abashinwa, kubyaza umusaruro amabwiriza agamije koroshya ubucuruzi yashyizweho n’u Rwanda, baza gushora imari yabo mu gihugu.

Ibi Musoni yabitangaje mu cyumweru gishize, ubwo yatangizaga Inama y’Ubucuruzi hagati y’u Rwanda n’u Bushinwa, yabereye i Beijing.

Iyi nama y’umunsi umwe yitabiriwe n’Ibigo by’ubucuruzi by’Abashinwa bigera kuri 50 ndetse n’itsinda ryaturutse mu Rwanda.

Nk’uko The New Times yabitanagje, Musoni yavuze ko u Rwanda rufunguriye amarembo umuntu wese uzazana amafaranga ye, agatangira gukora ubucuruzi mu gihugu cyashyizeho amabwiriza agamije kurushaho kubworoshya.

Yanashimye kandi umubano w’u Rwanda n’u Bushinwa, aho yavuze ko wafunguriye amarembo, amahirwe y’ubucuruzi n’ishoramari ku baturage b’ibihugu byombi.

Umuyobozi ushinzwe Ibikorwa mu Kigo cy’Igihugu cy’Iterambere, RDB, Emmanuel Hategeka, yavuze ko Abashinwa bashobora gushora imari mu byiciro bitandukanye by’ubukungu, birimo ubukerarugendo, inganda, ubucukuzi bw’amabuye y’agaciro, ubuhinzi, ikoranabuhanga n’ibindi.

Yakomeje avuga ko Abashinwa bashoye imari yabo mu Rwanda, bafite amahirwe menshi yo kugera ku isoko ry’Umuryango wa Afurika y’Iburasirazuba (EAC), rigizwe n’abaturage basaga miliyoni 169.5.

Ati”Gushora imari mu Rwanda, bifungura imiryango ku isoko rya EAC rigizwe n’abaturage basaga milyoni 169.5, ndetse n’isoko rusange ry’ibihugu byo mu Burasirazuba n’Amajyepfo (COMESA) rigizwe n’abaturage basaga miliyoni 400; aho ushobora kohereza ibicuruzwa byawe udasoreshejwe, nta n’ingano ntarengwa ushyiriweho.”

Hategeka kandi yababwiye ko u Rwanda ruza mu bihugu biri ku mwanya mwiza, yaba mu koroshya ubucuruzi n’umutekano muri rusange.

Raporo ku korohereza abakora ubucuruzi yakozwe na Banki y’isi mu 2016 yashyize u Rwanda ku mwanya wa kabiri muri Afurika, inyuma y’Ibirwa bya Maurice.

Huang Zhao Jin, umwe mu bagize Ishyirahamwe ry’abakora ubucuruzi hagati y’u Bushinwa na Asia, yagaragaje ko nubwo iyi nama ari ingenzi mu koroshya ubucuruzi hagati y’ibihugu byombi, hakwiye gushyirwaho amabwiriza asobanutse agamije gufasha Abashinwa bifuza gushora imari mu Rwanda.

Imibare itangwa na RDB igaragaza ko mu 2015, u Bushinwa bwohereje mu Rwanda ibicuruzwa bifite agaciro ka miliyari icyenda z’amadorali mu gihe muri Congo bwoherejeyo ibihwanye na miliyari 1.4 z’amadorali.

Ibicuruzwa biva mu Bushinwa byiganjemo telefoni n’ibindi bikoresho by’ikoranabuhanga, imyambaro n’imodoka.

U Rwanda rwo rusanzwe rwohereza mu Bushinwa ibintu bitandukanye birimo icyayi, amabuye y’agaciro, urusenda (Akabanga), ibireti n’ibindi.

U Rwanda rusanzwe rwohereza mu Bushinwa ibicuruzwa bitandukanye bikomoka ku buhinzi birimo icyayi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza