Mu 2017 Ibigo by’imari bishobora kugabwaho ibitero by’ikoranabuhanga bidasanzwe

Yanditswe na Cyprien Niyomwungeri
Kuya 9 Mutarama 2017 saa 02:22
Yasuwe : XX
0

Ibigo by’Imari byo mu bice bitandukanye ku Isi, mu mwaka wa 2017 bishobora kutoroherwa n’ibitero by’ikoranabuhanga, kuko ibikorwa remezo byabyo bikoresha uburyo bushobora kuzibasirwa cyane kurusha mu myaka yabanje.

Raporo y’Ikigo cy’Inzobere mu kurinda amakuru yo mu ikoranabuhanga, Sophos, yaburiye ibigo by’imari ko muri uyu mwaka agakosa gato mu ikoranabuhanga gashobora gutuma ikigo gihomba amafaranga menshi nkuko byagenze kuri Banki Nkuru y’Igihugu muri Bangladesh.

Iyo raporo ivuga ko ibikorwa byo kwiba amakuru y’abantu n’ibigo bikomeje kwiyongera kandi ibyo bitero bikoresha atomoye y’abayobozi b’ikigo, hagamijwe kubayobya ngo bajye bishyura amafaranga ku makonti ya baringa.

Igira iti “Twiteze ibitero byinshi bizagabwa ku bikorwa remezo by’ingenzi bikoreshwa n’ibigo by’imari bimeze neza nk’igitero cyagabwe kuri SWIFT [ikoranabuhanga mpuzamahanga rifasha ibigo by’imari koherezanya no kwakira amafaranga], kigatuma Banki Nkuru ya Bangladesh yibwa miliyoni 81 z’amadolari muri Gashyantare.”

SWIFT iherutse kwemeza ko hari ibindi bitero byabaye kandi byitezwe ko hari ibindi bizaba, kuko bigihari kandi kubirwanya bikaba birimo ibibazo by’urusobe.

Iyo raporo ikomeza ivuga ko mu 2016 hagaragaye ibitero binini by’ikoranabuhanga byagabwe no ku makuru y’abayobozi batandukanye mu gihe cy’amatora muri Leta Zunze Ubumwe za Amerika.

Igaragaza ko ibitero bikomeye biheruka ari iby’abajura mu by’ikoranabuhanga bazwi nka DDoS [Distributed Denial of Service] kandi ibitero nk’ibi uyu mwaka biziyongera. Ivuga ko hazakomeza kandi no kubaho ubujura bw’amakuru y’ibigo binini n’ibito ndetse n’ay’abantu ku giti cyabo.

Daily news itangaza ko kuwa 21 Ukwakira 2016, DDoS yagabye igitero cy’ikoranabuhanga cyatumye imbuga za internet nyinshi zihungabana. Harimo nka Twitter, Pinterest, Reddit, GitHub, Etsy, Tumblr, Spotify, PayPal, Verizon, Comcast na Playstation.

Abajura mu by’ikoranabuhanga ngo bazakaza umurego bitewe nuko hari ibikoresho byaryo bifite ibimenyetso by’ibanga (Code) bitagendanye n’igihe, ahanini bishingiye ku mikorere yabyo ititabwaho kenshi na porogaramu zabyo zikaba zidakomeye.

Sophos ivuga ko haziyongera ukwinjira mu mabanga y’ibikoresho by’ikoranabuhanga bikoresha internet bidakingiye.

2017 ishobora gusiga bimwe mu bigo by'imari biririra mu myotsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza