Kwamamaza

Mu mezi atanu, itangazamakuru mu Rwanda rirabona ikigo cy’imari cyihariye

Yanditswe kuya 1-12-2016 saa 14:46' na Rabbi Malo Umucunguzi


Ihuriro rya b’abafite ibitangazamakuru mu Rwanda, riri mu mushinga wo gutangiza ikigo cy’imari kigenewe guteza imbere umwuga w’itangazamakuru, kizaba gifite ubushobozi bwo gutanga inguzanyo ku banyamakuru na ba nyir’ibitangazamakuru kandi ku nyungu iri hasi.

Mu gitondo cyo kuri uyu wa Kane, abayobozi b’ibitangazamakuru binyuranye mu Rwanda bagiranye inama n’abafatanyabikorwa muri uyu mwuga, harebwa icyakorwa kugira ngo uru rwego rukomeze gutera imbere nk’ishoramari ryunguka.

Umuyobozi w’Ihuriro ry’abafite ibitangazamakuru mu Rwanda, (Media Owners Forum), Kakooza Nkuriza Charles nyiri Radio na TV1, yavuze ko kimwe mu mbogamizi zihari ari ubushobozi mu by’imari, ku buryo nta gikozwe, mu minsi mike ibitangazamakuru byinshi byafunga imiryango.

Yavuze ko abikorera badashobora guhaza ibitangazamakuru byose biri mu Rwanda, hakaza ikibazo cy’abakiliya batinda kubishyura kandi ntibakwe inyungu, no kuri Leta nk’urwego rukoresha amafaranga menshi, iyo habaye ikibazo gitera impinduka mu ngengo y’imari, agenewe itangazamakuru ni yo avanwamo mbere.

Ati “Iki kigo cy’imari dushaka gushyiraho kizafasha itangazamakuru cyane cyane kubona inguzanyo, kuko urebye inyungu za banki ziri hejuru cyane. Twakwigira nko kuri Zigama CSS n’Umwalimu Sacco uburyo bageze ku ntego.Ni abantu bishyize hamwe bakora ikigo cy’imari kandi kirabafasha.’’

Kakooza yavuze ko kuba inyungu za banki z’ubucuruzi ziri hejuru kandi nk’abanyamakuru benshi badafite ingwate, kugira ngo bazatere imbere bisaba ko habaho urwego rwumva ibibazo byabo.

Ati ‘‘Uzasanga rimwe na rimwe bizagora ibitangazamakuru, kuko bimwe birahari ariko ushobora gusanga n’ingwate bitazifite. Ariko niba dutangije ubwo buryo, ingwate ku banyamakuru ikaba ari cya gitangazamakuru kuko duteganya ko ari naho bazaba bahemberwa, bizaba ari ibintu byiza bizatuma itangazamakuru ritera imbere.”

“Dufite abahanga bari kubitwigiraho tureba amafaranga agomba kuba umusanzu ku munyamuryango, amafaranga tuzakenera, inshingano kizaba gifite, uko kizakorana n’abafatanyabikorwa, ku buryo bikiri mu mpapuro, ariko hatagize igihinduka nibura mu mezi atanu cyaba cyashyizweho.’’

Umuyobozi w’Urwego rw’abanyamakuru bigenzura, Cleophas Barore, yagaragaje ko ari igitekerezo cyiza kuko cyazafasha abanyamakuru n’ibitangazamakuru gukora neza, nubwo avuga ko ubushobozi bw’imari atariyo mbogamizi yonyine rifite, ariko bimwe mu bibazo bishobora kuba ariho bishingiye.

Ati “Hari n’ikindi cyerekana ko ubushobozi bw’ibitangazamkuru ari ikibazo umuntu atabura kuvuga ko gikwiye gushakirwa umuti, kuko nubwo cyaba kimwe gifunze imiryango, ku bwacu ni igihombo kuko ni ijwi riba ricecetse ryakagombye kuvuga.’’

Umuyobozi w’Ikigo Cy’Igihugu cy’Imiyoborere, RGB, Prof Shyaka Anastase, yavuze ko gutangiza icyo kigega byashyirwamo imbaraga, “kandi iyo umuntu atangiye kwifasha n’ubundi bufasha buraboneka.’’

Ati “Niba hari impinduka itangazamakuru ryazana muri uru rwego, ni ugushyiraho umurongo w’uko ryafashanya, w’uko ryakwishakamo ibisubizo, noneho ibyaba bisigaye mwareba ukuntu bihita byihuta. Kiriya kigo cy’imari nikijyaho muzabona ukuntu itangazamakuru ryihuta. Ku rwego rwacu ni ibintu dushyigikiye cyane.’’

Abayobozi b’ibitangazamakuru bagaragaje ko guhura bagafatanya gushaka ibisubizo by’ibibazo bihari ari ingenzi, cyane ko u Rwanda rukomeje gukora amavugurura mu ishoramari mu gihugu, n’itangazamakuru ridasigaye.

Mu mpinduka zakozwe harimo gushyiraho Urwego rw’abanyamakuru bigenzura, kuri ubu ruteza imbere itangazamakuru hagendewe ku mahame y’umwuga, rumaze kwakira ibibazo bitandukanye birimo 104 by’abaturage bareze itangazamakuru ko ryatangaje ibitabanyuze, n’ibindi 46 by’abanyamakuru hagati yabo baregana gukoresha inkuru z’abandi ntibavuge aho bazivanye.

Ibitangazamakuru kandi byashishikarijwe kuzamura ireme ry’ibyo bakora, kumenya abantu babitega amatwi, babyumva cyangwa babireba kugira ngo babashe gukora inkuru zibabereye, mu gihe byashobotse bikazabyorohera kubona ubushobozi bw’amafaranga.

Cleophas Barore, Umyobozi w'Urwego rw'Abanyamakuru bigenzura
Shyaka Kanuma ,Umuyobozi wa The Rwanda Focus
Umuyobozi w’Ikigo Cy’Igihugu cy’Imiyoborere, RGB, Prof Shyaka Anastase, yavuze ko gutangiza icyo kigega byashyirwamo imbaraga
Aldo Havugimana, Umuyobozi wa Radio Rwanda
Umunyamabanga Nshingwabikorwa w'Inama Nkuru y'Itangazamkuru (MHC), Peacemaker Mbungiramihigo
Umuyobozi w’Ihuriro ry’abafite ibitangazamakuru mu Rwanda, (Media Owners Forum), Kakooza Nkuriza Charles akaba na nyiri TV 1 na Radio 1

Amafoto:Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved