Nta gikozwe, Afurika iratangira gukoresha miliyari $110 buri mwaka itumiza ibiribwa

Yanditswe na Kanamugire Emmanuel
Kuya 13 Kamena 2016 saa 05:47
Yasuwe : XX
0

Umugabane wa Afurika wihariye 65% by’ubutaka bushobora guhingwa, ariko imibare irerekana ko buri mwaka ukoresha miliyari 35 z’amadolari ya Amerika mu gutumiza ibiribwa mu mahanga, ndetse ashobora kwikuba hafi gatatu mu myaka 10 iri imbere.

Banki Nyafurika Itsura Amajyambere, AfDB ivuga ko iteganya gushora miliyari 24 z’amadolari ya Amerika, harimo miliyari 2.4 buri mwaka mu myaka icumi iri imbere, mu gufasha Afurika mu mpinduka zikenewe mu buhinzi, nk’ikigega kizaba kigaburira Isi mu 2050.

Abahanga mu buhinzi, abashakashatsi n’izindi nzego zifite aho zihuriye n’uru rwego, kuva kuri uyu wa 13 Kamena batangiye inama ya 7 yiga ku ku buryo ikoranabuhanga ryakoreshwa mu kuzamura ubuhinzi, hamwe n’Inteko rusange y’Ihuriro rigamije ubuhinzi n’Ubushakashatsi muri Afurika, FARA, inama iteraniye i Kigali.

Minisitiri w’Intebe Anastase Murekezi yavuze ko aya ari amahirwe kuri Afurika, mu gushaka uburyo siyansi, ikoranabuhanga no guhanga udushya byakoreshwa mu guteza imbere ubuhinzi nk’urwego 65% by’imirimo muri Afurika.

Yagize ati ‘‘Uru rwego ni umusingi ukomeye w’impinduka za Afurika, rukeneye gufatwa nk’ubundi bucuruzi aho kuba uburyo bwo gushaka amaramuko. Guhindura ubuhinzi bukava mu bikorwa biciriritse bugakorerwa amasoko muri iki gihe cy’impinduka z’ibihe, Afurika igomba kwifashisha ikoranabuhanga.’’

Ku Rwanda, ngo ubushake bwa guverinoma mu guteza imbere ubuhinzi bugendana no guteza imbere siyansi, ikoranabuhanga n’imibare mu mashuri, nk’ibihanzwe amaso kuzaba umusemburo w’impunduka zikenewe.

Yasabye abahanga ba Afurika mu buhinzi, ubumenyi n’ikoranabuhanga gushakira hamwe ikoranabuhanga ryabafasha ubuhinzi bwa Afurika guhangana n’ingorane zibutegereje, zirimo ihindagurika ry’ibihe, umutekano muke, imirire mibi n’ubukene.

Perezida wa AfDB, Dr. Akinwumi Adesina, yavuze ko uyu mugabane wa Afurika ufite amahirwe menshi yo gukora ubuhinzi bwo ku rwego rwo hejuru, ariko bikarenga ugatumiza ibiribwa byinshi mu mahanga.

Uyu mugabane ni wo wihariye 65% by’ubutaka buhingwa busigaye ku Isi, bityo ngo impinduka mu buhinzi ntizahindura imirire kuri uyu mugabane gusa, ahubwo zakwira Isi yose.

Yagize ati ‘‘Bijyanye n’ubwiyongere bwihuse bw’abaturage, ihindagurika ry’ibihe, ibyaro birahinduka ahantu habi, hari amahirwe make yo gutera imbere, urubyiruko rukigira mu mijyi, bamwe bagashaka kujya i Burayi bakanapfa bataragerayo. Ubundi hakaba abantu ibyihebe bishakira abarwanyi.’’

Adesina yavuze ko hadashobora kubaho Afurika itekanye mu gihe ibyaro bitaratezwa imbere, kandi kugira ngo bigerweho, ubuhinzi ngo bugomba guhindurwamo akazi k’intangarugero.

Yakomeje agira ati ‘‘Afurika itanga miliyari 35 z’amadolari ku mwaka mu gutumiza mu mahanga ibiribwa, kandi imibare yerekana ko zizagera kuri miliyari 110 z’amadolari bitarenze 2025. Afurika iri gutumiza ibyo yagakwiye kuba yihingira. Ni ukurema ubukene muri Afurika ukajya gutanga imirimo hanze yayo.’’

Ibiciro by’ibiribwa muri Afurika bifatwa nk’ibikomeye ku iskoko ku buryo bishyira n’igitutu ku ifaranga ry’ibihugu, AfDB ikavuga ko bigabanyutse byakorohereza ubukungu bw’ibihugu.

Ibi ngo bigomba kujyana no kuvugurura ubuhinzi, Afurika ntibe ahantu hahingwa ibyo barya, ahubwo habe uruganda rw’ibiribwa.

Umuyobozi wa FARA, Dr Charity Kruger, yavuze ko kuvugurura ubuhinzi aribwo buryo bukomeye bwo kunoza iterambere rya Afurika n’imibereho y’abayituye, cyane abatuye muduce tw’icyaro, kandi bigakorwa ibihugu byose bihuje imbaraga.

Kugeza ubu hari intambwe iterwa muri Afurika harimo kwifashisha telefone zigendanwa mu gukurikirana ubuhinzi, indege zitagira abapilote n’izindi mashini, ariko ngo haracyakenewe ishoramari mu bumenyi n’ikoranabuhanga mu buhinzi.

Hafungurwa ahakorerwa imurika ry'ibikomoka ku buhinzi muri Camp Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza