Perezida Kagame asanga ubucuruzi hagati ya Afurika n’u Buhinde bukwiye guhindura isura

Yanditswe na Kanamugire Emmanuel
Kuya 10 Mutarama 2017 saa 06:34
Yasuwe :
0 0

Perezida wa Repubulika, Paul Kagame, yagarutse ku bucuruzi hagati ya Afurika n’u Buhinde, avuga ko bukwiriye guhindura isura bukava kuri Peteroli n’amabuye y’agaciro bukagera no mu bindi byiciro.

Umukuru w’Igihugu yabigarutseho kuri uyu wa Kabiri ubwo hatangizwaga inama mpuzamahanga ya ‘Vibrant Gujarat Global Summit’ izaba hagati ya tariki 10-12 Mutarama 2017 yiga ku bucuruzi, ikabera mu Mujyi wa Gandhinagar, umurwa mukuru wa leta ya Gujarat iherereye mu Burengerazuba bw’u Buhinde.

Iyi nama ihuza Abakuru b’ibihugu na za guverinoma, ba Minisitiri, abayobozi b’ibigo by’ubucuruzi, abakuriye inzego zifata ibyemezo, abayobozi b’inzego mpuzamahanga, abarimu muri za kaminuza n’abashakashatsi bose baturutse mu bihugu bitandukanye ku Isi, ifite intego yo guteza imbere ubufatanye.

Perezida Kagame yavuze ko Afurika n’u Buhinde bisangiye umubano w’amateka maremare n’intego zimwe zo guharanira imibereho myiza n’iterambere ry’abaturage. Yakomeje avuga ko ubucuruzi hagati ya Afurika n’u Buhinde bukwiye gufata indi sura.

Ati “Mu Isi ihindagurika vuba, dufite amahirwe yo kongera ubwoko bwinshi bw’ibyo Afurika yohereza mu Buhinde birenze peteroli n’amabuye y’agaciro.”

Yakomoje ku bucuruzi hagati y’u Buhinde n’u Rwanda, avuga ko burimo gutera imbere ariko hari amahirwe menshi y’ishoramari n’ubucuruzi bihuriweho n’impande zombi bikwiye kubyazwa umusaruro.

Ati “Kimwe nk’u Buhinde, u Rwanda rushaka impinduka zirambye zishingiye ku guha urubuga ibikorwa by’abaturage bacu ngo bibyare umusaruro mwinshi. Dutegereje ibikorwa byinshi birimo gutangiza ingendo za RwandAir zerekeza Mumbai mu mezi make.”

Perezida Kagame yavuze ko iyi nama yiga ku bucuruzi ari amahirwe ibihugu bigize yo kuganira no gufatanya n’u Buhinde nka kimwe mu bihugu bizobereye mu gukora ubucuruzi, kandi kiteguye kuba umufatanyabikorwa ukwiye mu ntego n’amahirwe ari mu bihugu bya Afurika.

Iyi nama iba kabiri mu mwaka, ibaye ku nshuro ya munani, ku nsanganyamatsiko ivuga ku ‘iterambere ry’ubukungu n’imibereho birambye’. Yabaye bwa mbere mu mu 2003 igamije kuzamura ishoramari muri leta ya Gujarat, ariko ubu imaze kuba imwe mu nama mpuzamahanga zikomeye mu Buhinde.

Biteganyijwe ko Perezida Kagame azatanga ikiganiro ku ishoramari mu Rwanda hanashingiwe ku buhamya bw’Abahinde batangije ubucuruzi mu Rwanda kandi bugashinga imizi, Abanyarwanda bakazanitabira imurikagurisha mpuzamahanga ry’ubucuruzi, Global Trade Show 2017.

Perezida Kagame ageza ijambo ku bitabiriye inama
Iyi nama ihuza Abakuru b’ibihugu na za guverinoma, ba Minisitiri, abayobozi b’ibigo by’ubucuruzi, abakuriye inzego zifata ibyemezo, abayobozi b’inzego mpuzamahanga, abarimu muri za kaminuza n’abashakashatsi bose baturutse mu bihugu bitandukanye ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza