Perezida Kagame yafunguye Kigali Heights yizeza gukomeza gufasha ishoramari

Yanditswe na Cyprien Niyomwungeri
Kuya 5 Ukuboza 2016 saa 05:44
Yasuwe :
0 0

Perezida Kagame yafunguye ku mugaragaro inyubako ya Kigali Heights yuzuye itwaye miliyari 30 Frw, akomeza kwizeza abashoramari ko Leta izakomeza gukora ibishoboka byose kugira ngo bakorere mu mutekano n’umudendezo usesuye kandi bunguke.

Kuri uyu wa Mbere tariki 5 Ukuboza 2016, nibwo Umukuru w’Igihugu yafunguye inyubako Kigali Heights, yubatswe n’Ikigo Kigali Heights Devevelopmend Ltd ku Kimihurura mu Mujyi wa Kigali, iruhande rwa ‘Rond Point’ y’ahazwi nka KBC, aho iteganye neza n’inyubako ya Kigali Convention Center.

Perezida Kagame yagarutse ku babona imishinga minini nka Kigali Heights bakayitirira leta, avuga ko uruhare rwayo ari uguharanira ko abashoramari bakorera mu mutekano bakunguka kandi ibi bitazahagarara.

Yagize ati “Buri gikorwa cyose cy’ubucuruzi cy’umuntu, kiba ari icya leta kuko inshingano yayo ni uko abantu bashobora gukora ubucuruzi mu mucyo no mu bwisanzure kandi bagatera imbere. Ibyo ni byo bituma biba ibya leta na yo igaharanira ko buri wese yunguka mu byo akora.”

Yongeyeho ko leta izakomeza kugira urwo ruhare kuko kunguka kw’abashoramari ari ko kunguka kwa leta.

Ati “Tuzagira uruhare muri ubwo bucuruzi rwo kugira ngo butere imbere, abantu bakore ibyo bashaka gukora, bashore imari bumve ko ubucuruzi bwabo butekanye na bo ubwabo batekanye. Nimwunguka natwe tuzaba twungutse.”

“Turashaka kubona abashoye imari, igihe cyabo n’amafaranga muri ibi bunguka bakagaruza ndetse Abanyarwanda n’Abanyafurika y’Iburasirazuba n’abandi bakabyungukiramo.”

Perezida Kagame yagarutse ku bigwi by’umuyobozi w’Ikigo cyubatse iyi nyubako, Dennis Karera, avuga ko yabaye umusirikare warwaniye kubohora igihugu, nyuma akaba umushoramari ukomeje gukora ibyo urwo rugamba rwari rushingiyeho, aribyo gutera imbere.

Mu ijambo rye Dennis Karera yavuze ko inyubako ya Kigali Heights yubatswe n’abahanga mu bwubatsi harimo abo mu Bwongereza ndetse bimwe mu bikoresho byayo birimo nk’amarangi byakorewe mu Rwanda.

Yakomeje avuga ko Abanyarwanda bagera kuri 600 bahawe akazi n’iyubakwa ry’iyi nzu y’akataraboneka ndetse yongereye imisoro mu gihugu y’agera kuri miliyari ebyiri na miliyoni 25 n’ibihumbi 942 by’amafaranga y’u Rwanda.

Karera yatangaje ko kugeza ubu 48% by’ibiro muri iyi nyubako byamaze kubona ababikoreramo, naho 52% bikaba bitarabona ababikoreramo.

Yasabye Umukuru w’Igihugu n’Ubuyobozi bw’Umujyi wa Kigali gushyira mu bikorwa amabwiriza ya Guverinoma ategeka ibigo n’abandi bakorera mu nzu zo guturamo kujya mu biro.

Ati “Ndabizi ko hari amabwiriza ya leta y’uko ibigo, imiryango itegamiye kuri leta n’abandi bava mu nzu zo guturamo bagakorera ahagenewe ibiro mu nyubako nk’iyi, ikibabaje ni uko abenshi batabikoze, ndabizi ko Meya yababwiye ariko sinzi icyo bagitegereje.”

Umukuru w’Igihugu yasabye Umujyi wa Kigali gushyiramo imbaraga igishushanyo mbonera kigakurikizwa uko kiri, buri kimwe kigakorerwa aho cyagenewe.

Kigali Heights yubatse ku butaka bwa metero kare 12 750, ikagira ibiro bishobora kwakira abantu 1500. Inyubako yose ingana na metero kare 2400, ikagira ubushobozi bwo kwakira imodoka 150 imbere mu nzu n’izindi 150 hanze.

Iyi nzu yatangiye kubakwa mu 2014 iri gukurura abacuruzi bakomeye harimo amaduka, amabanki, farumasi n’ibindi, aho mu biteguye gukoreramo harimo Javas House cafe, Mr. Price, Bosini, Simba Supermarket, Woolworths yo muri Afurika y’Epfo icuruza ibiribwa, Deacons icuruza imyambaro, Fusion Capital, Vine pharmacy n’abindi.

Inyubako Kigali Heights yafunguwe ku mugaragaroo
Kigali Heights yatangiye gukurura abacuruzi bakomeye
Umukuru w’Igihugu yasabye Umujyi wa Kigali gushyiramo imbaraga igishushanyo mbonera kigakurikizwa uko kiri, buri kimwe kigakorerwa aho cyagenewe
Perezida Kagame yijeje abikorera uruhare mu gukomeza kubungabunga umutekano w'ubucuruzi na ba nyirabwo
Bamwe mu bitabiriye umuhango wo gufungura ku mugaragaro inyubako ya Kigali Heights

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza