Perezida Kagame yahaye ikaze abasaga 1000 bazitabira inama ku ishoramari muri Afurika

Yanditswe na Kanamugire Emmanuel
Kuya 10 Kanama 2016 saa 07:43
Yasuwe :
0 0

Abakuru b’ibihugu bya Afurika, abayobozi ba za guverinoma, abayobora ibigo by’ubucuruzi n’abashoramari bose hamwe bagera ku 1000, bategerejwe i Kigali mu nama mpuzamahanga yiga ku ishoramari, 2016 Global African Investment Summit (TGAIS).

Iyi nama izabera ahasanzwe habera inama hazwi nka Kigali Conference and Exhibition Village (Camp Kigali) kuva 5 - 6 Nzeli 2016, irafatwa nk’amahirwe akomeye kuri aba bafatanyabikorwa ngo bahange igenamigambi rishobora guhindura ahazaza ha Afurika.

Iyi nama ya TGAIS - COMESA Rwanda igiye kubera i Kigali nyuma y’iyabereye i London mu Bwongereza mu 2015, ikitabirwa n’abagera ku 1300, muri uyu mwaka akaba ari ubwa mbere ibereye ku mugabane wa Afurika.

Mu ijambo rya Perezida Kagame rigaragara ku rubuga rw’iyi nama, avuga ko Guverinoma y’u Rwanda yishimiye gufatanya n’Umuryango w’Ubucuruzi bw’Ibihugu by’ibiyaga bigari (COMESA) mu gutegura iyi nama, agaha ikaze abazayitabira bose ngo bahuze imbaraga mu rugendo rugana ku iterambere rya Afurika.

Yagize ati “Kwishyira hamwe kw’ibihugu ni ingenzi ku iterambere rya Afurika kandi twizeye tudashidikanya ko iyi nama izihutisha ishoramari mu mishinga yacu y’ingenzi nk’akarere, izateza imbere imibereho n’ubukungu by’abaturage bacu.”

Perezida Kagame avuga ko inzego z’u Rwanda zizakomeza gukorana n’abandi bafatanyabikorwa mu korohereza abashoramari mu karere, ku buryo yizeye ko iyi nama imaze imyaka ibiri ikorwa hari icyo izasigira u Rwanda n’akarere muri rusange.

Umuyobozi wa Global African Investment Summit, Paul Sinclair, yavuze ko iyi nama ari urugendo rushobora kubyara ubufatanye bushobora kuzamura iterambere rya Afurika, ku buryo uyu mugabane ubasha guhangana ku rwego mpuzamahanga.

Ati “Iyi nama ni amahirwe akomeye ku bihugu bya Afurika yo gutangira gukorana ku mishinga bihuriyeho ishobora gukurura ishoramari, ikazamura ubukungu.”

Umugabane wa Afurika urafatwa nk’ahantu hakeneye ishoramari ariko bikaba byashoboka ari uko ubashije kurenga imbogamizi zose zituma rigorana, zirimo ry’ibikorwa remezo, amahirwe mu ishoramari n’iterambere ry’ubukungu.

Hari byinshi biri ku meza

Ibiganiro bizibanda ku ngingo zirimo ubucuruzi hagati y’uturere, ibimaze kugerwaho n’imbogamizi zigihari mu gucuruzanya hagati y’imiryango itatu, Tripartite Free Trade Area (TFTA), uko ishoramari ryafasha mu guhindura Afurika, ikoranabuhanga, guteza imbere ubuhinzi n’iterambere muri rusange.

TFTA ni gahunda yemeranyijwe yo gukorana ubucuruzi hagati y’Umuryango w’Ubucuruzi bw’ibihugu bya Afurika y’u Burasirazuba n’Amajyepfo (COMESA), Umuryango w’Iterambere ry’ibihugu bya Afurika y’Amajyepfo (SADC) n’Umuryango wa Afurika y’u Burasirazuba (EAC).

Hazaganirwa kandi ku buryo bwo kureshya abashoramari mu kongera ibikorwaremezo byo koroshya urujya n’uruza rw’ibicuruzwa n’abantu n’uburyo bwo guhuza gahunda n’amategeko.

Abamaze kwemezwa ko bazatanga ibiganiro barimo Perezida Paul Kagame, Umunyamabanga Mukuru wa Comesa, Dr. Sindiso Ngwenya, Uwahoze ari Umuyobozi w’Akanama Mpuzamahanga k’Imari (IMFC), Dr Youssef Boutros Ghali; Intumwa y’u Bwongereza mu bijyanye n’ubucuruzi mu Rwanda na Uganda, Lord Dolar Amarshi Popat, n’Umuyobozi w’Ikigo Goldman Sachs cy’Abanyamerika gikora ishoramari, Colin Coleman.

Mu bashyitsi bakomeye batumiwe barimo Perezida wa Tanzania, John Pombe Magufuli ari na we Muyobozi mukuru wa EAC, Minisitiri w’Intebe wa Ethiopie, Hailemariam Desalegn usanzwe ari umuyobozi wa COMESA na Perezida wa Botswana, Seretse Khama Ian Khama, uyobora SADC.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza