RDB yatungiye agatoki abashoramari ahari amahirwe mu Ntara y’u Burasirazuba

Yanditswe na Jean Pierre Tuyisenge
Kuya 23 Ugushyingo 2017 saa 03:57
Yasuwe :
0 0

Ikigo cy’Igihugu cy’Iterambere (RDB) cyeretse abashoramari bo mu Ntara y’Uburasirazuba amahirwe ayirimo, kibasaba kuyabyaza umusaruro bashora imari yabo mu bikorwa bitandukanye bigamije iterambere rusange.

Ibi byagarutsweho mu nama RDB yagiranye n’abashoramari bo mu Burasirazuba kuri uyu wa 23 Ugushyingo 2017 yabereye mu Karere ka Gatsibo, yari igamije kubereka amahirwe yabashyiriyeho kugira ngo babashe gushora imari yabo.

Intara y’Iburasirazuba izwiho kuba ku isonga mu zibereye ibikorwa by’ubuhinzi n’ubworozi, gusa RDB yaberetse ko hari n’ibindi bikwiriye gushorwamo imari.

Hatanzwe ingero ko ubuhinzi buhari bukwiriye kubyazwa umusaruro, ibitoki bihera bikaba byagira ikindi bikoreshwa bitari ugukurwamo umutobe, inzoga no kuribwa gusa ahubwo ko byanakorwamo ifu ku buryo byabasha kubikwa igihe kirekire, bikanagurishwa hanze.

RDB ivuga ko kugeza ubu ba mukerarugendo basura Pariki y’Akagera iri mu Ntara y’Iburasirazuba batabona aho barara bikabasaba gusubira i Kigali kuko ari ho babona amahoteli meza.

Ivuga kandi ko, nta bikorwa by’uburobyi bifatika biri muri iyo ntara kandi nyamara ngo ari ho hagaragara umubare munini w’ibiyaga hakaba n’inzuzi, ibasaba na byo kubibyaza umusaruro uzatuma u Rwanda rudakomeza kurangamira umusaruro w’ayo rukura hanze.

Abashoramari basabwe kandi kujya mu buhinzi bw’imiteja, gushora imari mu buhinzi bw’ikawa, no kujya mu bikorwa byo gutunganya amata n’inyama n’ibindi.

Baneretswe ko kugeza ubu hakabaye hubakwa ibikorwa by’ubucuruzi ku nkengero z’ibiyaga biri muri iyo ntara kuko ngo kugeza ubu ibihari bidahagije.

Umuyobozi Mukuru Wungirije ushinzwe ibikorwa muri RDB, Emmanuel Hategeka, yababwiye ko bakwiriye kubyaza umusaruro amahirwe intara ifite ariko bakanamenya ayo RDB yabashyiriyeho agamije koroshya ubucuruzi.

Yagize ati “Tumaze igihe turi mu rugendo rwo gutunganya ishoramari, tuvugurura amategeko, inzego, inzira bitwara, dukurikira ibidindiza ishoramari, tugerageza kugenda tubigabanya uko bishoboka. Mu myaka 15 ishize amavugurura nk’aya amaze kugera kuri 52, buri mwaka dukora arenze atatu gusa ntituragera aho dushaka.”

Yavuze ko bafite gahunda yo gukomeza kugabanya ikiguzi cy’ishoramari, no kugabanya icy’ibikoresho biba bigiye gukoreshwa.

Umugereka w’itegeko No 06/2015 ryo ku wa 28/032015 rigamije guteza imbere no korohereza ishoramari, riteganya ko umushoramari ugitangira yunganirwa kwishyura umusoro wa 50% ku bikoresho akeneye.

RDB ivuga ko kugeza ubu abashora imari mu bikorwa by’ubuhinzi n’ubworozi, imyenda ikorerwa mu Rwanda n’ibijyanye n’ubucukuzi, kwinjiza ibikoresho bifasha muri iryo shoramari ntibisoreshwa.

Ivuga kandi ko abakeneye kohereza ibicuruzwa hanze bikomoka ku musaruro w’ibyakorewe mu Rwanda, byagabanyirijwe umusoro uva kuri 30% ugera kuri 15%.

Umuyobozi wungirije wa PSF mu Ntara y’Iburasirazuba, Gasana Charles, yashimiye RDB yaje kubereka ahandi abashoramari bashyira ibikorwa, avuga ko bigiye kubafasha kuzamura urwo rwego gusa avuga ko hakiri imbogamizi.

Yagize ati “Igikorwa RDB yakoze ni cyiza bitewe no kuba bafashe umwanya bakatwereka amahirwe ahari mu Burasirazuba, ikindi tubashimira uburyo buri wa gatanu bashyizeho uburyo baganira n’abacuruzi, na ba rwiyemezamirimo kugira ngo bakemure ibibazo byaba bihari. Kugeza ubu turacyafite ibibazo byo kugera ku mari, ubumenyi buke no gukererwa kwishyuwa ku baba bahawe ibicuruzwa.”

Gasana yagaragaje ko hari ikibazo cy’umuriro n’amazi bifahagije mu Burasirazuba gusa yavuze ko hari gushyirwaho ibikorwa bizafasha abashaka gushora imari kuko hari kubakwa inzu y’ubucuruzi ku mupaka wa Rusumo y’asaga miliyari; indi iri mu Karere ka Ngoma ya miliyoni 700 Frw, iri muri Kayonza y’asaga miliyari 1.5 Frw, isoko rya kijyambere mu Karere ka Rwamagana ry’asaga miliyari 3.5 Frw n’ibindi.

RDB yiyemeje kujya isanga abashoramari aho bari mu ntara no mu turere kugira ngo baganire, bamenye imbogamizi bahura nazo n’icyakorwa kugira ngo zikurweho burundu.

Umuyobozi w'Akarere ka Gatsibo, Richard Gasana
Umuyobozi Mukuru Wungirije ushinzwe ibikorwa muri RDB, Emmanuel Hategeka, yabwiye abashoramari ko bakwiye kubyaza umusaruro amahirwe intara ifite
Umuyobozi w’Ishami ry’Ishoramari muri RDB, Winifred Kabega Ngangure, atanga ikiganiro mu nama yahurije hamwe abashoramari bo mu Burasirazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza