RITCO igiye kuzana izindi modoka hafi 50 zizoroshya ingendo mu cyaro

Yanditswe na Evariste Nsengimana
Kuya 1 Kanama 2017 saa 12:30
Yasuwe :
0 0

Ubuyobozi bw’ Ikigo cy’ubucuruzi gishinzwe ubwikorezi, RITCO bwatangaje ko bitarenze uyu mwaka bwitegura kwakira izindi modoka zitwara abagenzi mu buryo bwa rusange zibarirwa hagati ya 30 na 50.

Ni icyiciro cya kabiri nyuma y’izindi 50 zaje ku ikubitiro zihita zitangira gutwara abantu n’ibintu mu bice bitandukanye by’igihugu, bivuze ko 2017 irangira RITCO ifite bisi 100.

Mu kigairo IGIHE yagiranye n’Umuyobozi Mukuru wa RITCO, Rukundo Julius, yavuze ko izo modoka ziri mu nzira zizagera mu Rwanda bitarenze uyu mwaka.

Yagize ati “Iziri hafi kugera mu Rwanda ziri hagati ya 30 na 50, ziyongera kuri 50 zihari. Twizeye ko zizaza bitarenze mu mpera z’uyu mwaka. Ni mu cyiciro cya kabiri cy’izo duteganya kwakira.”

RITCO yashyizweho nyuma y’Inama y’abaminisitiri yo kuwa 16 Ukuboza 2015 yemeje ikurwaho rya ONATRACOM, ikemeza ishyirwaho rya sosiyete leta ifatanya n’abikorera.

Rukundo akomeza avuga ko nubwo bataragera ku 100% by’umusaruro witezwe yishimira uko iyi sosiyete ihagaze.

Yagize ati “Umusaruro umeze neza kandi tukabona n’abakiriya bakunda imodoka ukurikije uburyo ziteye, zibafasha n’ubwo umuntu atavunga ngo ni 100% ariko iyo urebye intambwe irashimishije.”

Yakomeje asobanura ko intego nyamukuru ari ugufasha abagenzi bava mu byaro bagera mu mijyi kandi ko mu mpande zose z’igihugu zihagera kandi zigatwara abantu neza.

Mu cyiciro cya mbere cy’imodoka 50 RITCO yatumije, 20 zageze mu Rwanda muri Mutarama 2017, zitangira gukoreshwa ku mugaragaro ku wa 6 Gashyantare 2017, izindi 30 zihagera kuwa 30 Werurwe 2017.

Mu rwego rwo gukomeza kunoza serivisi kandi zikagezwa ku banyarwanda benshi, RITCO yihaye intego ko mu gihe cy’imyaka ibiri, izaba imaze kugura imodoka zitari munsi 165, ikazashoramo asanga miliyari 11 Frw.

Muri RITCO, Leta y’u Rwanda ifitemo imigabane ingana na 52% naho Koperative yo gutwara abantu n’ibintu mu Rwanda (RFTC) ikagiramo 48%.

Ubwo Ritco yagezaga i Kigali imodoka 20 za mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza