Salva Kiir yitabaje Museveni nyuma y’imyanzuro AU yafatiye i Kigali

Yanditswe na Kanamugire Emmanuel
Kuya 25 Nyakanga 2016 saa 02:19
Yasuwe : XX
0

Perezida Salva Kirr wa Sudani y’Epfo, kuri iki Cyumweru yagiriye uruzinduko muri Uganda, agirana ibiganiro byihariye na Perezida Museveni, mu gihe igihugu cye gikomeje gucikamo ibice kubera intambara.

Umujyanama wa Perezida Museveni mu itangazamakuru, Don Wanyama, yabwiye itangazamakuru ko Perezida Kiir yagiranye na Museveni inama zibera mu muhezo mu ngoro y’Umukuru w’igihugu, Entebbe.

Wanyama yavuze ko izo nama ziri mu mugambi wo gushakisha amasezerano y’amahoro muri icyo gihugu cyabonye ubwigenge nyuma y’ibindi ku Isi.

Ati “Bibanze ku buryo bwo kugarura ituze mu gihugu, hagendewe ku byemezo biheruka byafashwe n’inama y’Umuryango wa Afurika yunze Ubumwe n’Umuryango uhuza za guverinoma ugamije iterambere [IGAD].)

Mu nama ya AU iheruka gusozwa i Kigali, abakuru b’ibihugu basabye Perezida Salva Kiir na Riek Mashar wari usanzwe ari Visi Perezida, guhagarika intambara bakarengera abasivili bakomeje kuhazaharira.

Bemeje kandi ko muri Sudani y’Epfo hoherezwayo ingabo zijya kugarura amahoro, zikazaturuka muri Uganda, Sudani, u Rwanda, Kenya na Ethiopia, n’ubwo amakuru avuga ko cyo gihugu kititeguye kubakira.

Mu nama ya IGAD yabaye ubwo ibihugu byari byakoraniye i Kigali ku itariki 16 Nyakanga 2016, nayo yasabye ko Akanama ka Loni gashyinzwe amahoro ku Isi kakongerera igihe ubutumwa bw’amahoro muri Sudani y’Epfo, ndetse intumwa zigahabwa inshingano nshya.

Izo ngabo z’ibihugu bya Afurika nubwo zizakorana n’iziri mu butumwa bwa Loni, MINUSS, zizaba zifite ubutumwa bwo kurinda abasivili, kugarura amahoro mu murwa mukuru Juba no guhosha ubushyamirane.

Intambara muri Sudani y’Epfo iheruka kurota kuwa 8 Nyakanga, nyuma y’ugukozanyaho hagati y’ingabo za Leta ziri inyuma ya Salva Kiir n’izishyigikiye visi Perezida we bahanganye, Dr Riek Machar.

Ni imirwano imaze guhitana abasaga 300 ndetse abarenga 36,000 bava mu byabo, na visi Perezida Riek Mashar ava mu murwa mukuru Juba.

Perezida Salva Kiir aheruka gusaba Mashar kuwugarukamo mu masaha 48 ariko abyima amatwi, ahita amusezerera asimbuzwa Taban Deng wari uhagarariye uruhande rw’abatavuga rumwe n’ubutegetsi mu biganiro byagejeje ku masezerano y’amahoro mu 2013.

Salva Kirr yagiranye na Museveni ibiganiro bigamije gushakira Sudani y'Epfo amahoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza