Kwamamaza

U Buholandi bwahaye u Rwanda inkunga ya miliyari zisaga 25 Frw

Yanditswe kuya 28-11-2016 saa 16:20' na IGIHE


Leta y’u Rwanda n’iy’u Buholandi basinye amasezerano y’inkunga ingana na miliyoni 30 z’amayero, ni ukuvuga miliyari zisaga 25 z’amafaranga y’u Rwanda azakoreshwa mu kuzamura imishinga y’ibikorwa remezo mu turere twose tugize igihugu ndetse no kurushaho guteza imbere imibereho myiza y’abaturage.

Aya masezerano yashyizweho umukono kuri uyu wa Mbere, tariki ya 28 Ugushyingo na Minisitiri w’Imari n’Igenamigambi, Amb. Gatete Claver ku ruhande rw’u Rwanda ndetse na Ambasaderi w’u Buholandi mu Rwanda, Frédérique de Man.

Iyi nkunga izafasha muri gahunda ya Leta yo gushimangira ihame ryo kwihaza ku biribwa, ndetse n’iterambere rusange ry’icyaro, bizanafasha u Rwanda kugera ku ntego zarwo zo kugabanya ubukene ndetse no guteza imbere ubukungu.

Iri muri gahunda yo kurushaho kwagura imikoranire y’igihe kirekire hagati y’ibihugu byombi ndetse no gusigasira ibyagezweho mu bijyanye no kwegereza abaturage ubuyobozi yatangijwe mu 2007.

Minisitiri w’Imari n’Igenamigambi, Amb. Gatete Claver yatangaje ko u Rwanda rwishimiye inkunga rwatewe n’u Buholandi ndetse n’uruhare rw’iki gihugu mu iterambere rusange.

Yagize ati “Iyi mpano u Rwanda rubonye izakoreshwa mu bikorwa byo guteza imbere abaturage binyuze mu kubegereza ibikorwa remezo bitandukanye mu turere batuyemo.Turishimira imikoranire hagati y’u Rwanda n’u Buholandi, ibi rero birashimangira ubufasha iki gihugu gisanzwe giha u Rwanda.”

Yakomeje atangaza ko bizeye ko iyi nkunga izatanga umusaruro kuko buri karere ari ko kazagena imishinga amafaranga azakoreshwamo, bitewe n’ibikenewe cyane.

Ambasaderi w’u Buholandi mu Rwanda, Frédérique de Man yashimangiye ko iyi nkunga iri mu mishinga miremire hagati y’ibihugu byombi kandi izakomeza gushyirwa mu bikorwa.

Yagize ati “Iyi nkunga u Buholandi butanze izafasha mu bikorwaremezo ku rwego rw’uturere, ndetse n’iterambere ry’ubukungu ku baturage. Ni igikorwa kimwe muri gahunda z’u Buholandi yo gutera inkunga u Rwanda mu bikorwa bitandukanye birimo kugabanya ubukene muri gahunda y’imbaturabukungu ya kabiri (EDPRS II, kwegereza abaturage ubuyobozi, ndetse no gufasha abayobozi kurushaho kwesa imihigo."

"Ibi biragaragaza ko u Buholandi butewe ishema no gukorana n’u Rwanda. Tuzakorana na LODA kugira ngo ibyo bikorwa birimo kubaka imihanda, gukora ubuhinzi bwa kijyambere no kuhira imyaka, kubona umuriro w’amashyanyarazi ndetse n’ibindi byose bifasha mu iterambere rirambye kugira ngo bizashobore kugerwaho nta komyi.”

Umunyamabanga wa Leta muri Minisiteri y’Ubutegetsi bw’Igihugu ushinzwe iterambere ry’abaturage, Munyeshyaka Vincent yatangaje yishimiye inkunga Leta y’u Buholandi yahaye u Rwanda.

Yagize ati “Turishimira inkunga twahawe, izafasha uturere kuzamura ibikorwa remezo. Aya mafaranga azanyuzwa mu Kigo cya Leta gishinzwe iterambere ry’inzego z’ibanze (LODA)nk’uko bisanzwe bigenda kugira ngo amafaranga azakomeze gucungwa neza ndetse harusheho kubaho imikoranire myiza n’uturere.”

Yakomeje agira ati “Hari iterambere riri mu turere rigaragara kuko nko mu myaka icumi ishize hubatswe ibikorwa remezo byinshi bitandukanye birimo imihanda, ifasha mu buhahirane, udukiriro ndetse n’ibindi. Kuri ubu umuntu yavuga ko hubatswe ibikorwa byinshi byagize umumaro ariko hari byinshi bigomba gukosorwa kugira ngo iterambere rirusheho kugerwaho.”

Aya mafaranga azatangwa mu turere 30 twose tugize igihugu ariko hibandwa by’umwihariko ku dukennye ndetse tunatuwe cyane. LODA ni yo izagenzura uburyo aya mafaranga akoreshwa ndetse n’ishyirwa mu bikorwa ry’iyi mishinga.

Minisitiri w'Imari n'Igenamigambi Amb. Gatete Claver, na Ambasaderi w'u Buholandi mu Rwanda, Frédérique de Man bashyira umukono ku masezerano y'inkunga
Umunyamabanga wa Leta muri Minisiteri y’Ubutegetsi bw’Igihugu ushinzwe iterambere ry’abaturage, Munyeshyaka Vincent yatangaje ko yishimiye inkunga Leta y’u Buholandi yahaye u Rwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved