U Rwanda rugiye kwakira inama yiga ku isoko ry’imigabane muri Afurika

Yanditswe na Ishimwe Israel
Kuya 19 Ugushyingo 2016 saa 09:47
25 24

U Rwanda ruzakira inama ya 20 y’ibihugu bihuriye mu Ishyirahamwe ry’Ibigo by’Imari n’Imigabane muri Afurika (African Securities Exchanges Association -ASEA) izabera mu Mujyi wa Kigali hagati ya 27-29 Ugushyingo 2016.

Iyi nama izabera muri Kigali Serena Hotel, ifite insanganyamatsiko ijyanye n’icyerekezo 2030 igira iti “Guhuza isoko ry’imari n’imigabane rya Afurika n’Ubukungu bwayo” hagamijwe guhangana n’ibibazo byugarije isoko ry’imari n’imigabane kugira ngo rigere ku iterambere rirambye.

Mu kiganiro yagiranye n’itangazamakuru, kuri uyu wa 18 Ugushyingo 2016, Umuyobozi w’Ibigo by’Imari n’Imigabane muri Afurika y’Uburasirazuba (East African Securities Exchanges Association (EASEA), akaba n’Umuyobozi Mukuru w’Ikigo cy’Imari n’Imigabane mu Rwanda (Rwanda Stock Exchange,RSE), Pierre Célestin Rwabukumba, yahamagariye abafatanyabikorwa b’iki kigo kwiyandikisha hakiri kare kugira ngo bazitabire banatange ibitekerezo muri iyo nama.

Yavuze ko kwiyandikisha byoroshye kandi bikorerwa kuri internet kuri www.asea2016.rw.

Iyi nama izahuza inzobere zisaga 300 zo mu Karere no ku rwego mpuzamahanga, abakuriye ibigo by’imari n’imigabane, abashoramari n’abandi bayobozi bakuru mu Guverinoma baturutse mu bihugu bihuriye muri ASEA.

Rwabukumba yavuze ko uyu uzaba ari umwanya mwiza k’u Rwanda wo kugaragaza aho rugeze ku isoko ry’imari n’imigabane mu gihe iki kigo kizaba cyizihiza isabukuru y’imyaka itanu kimaze gikora kuva 2011.

Abazitabira iyi nama kandi, uzaba ari umwanya mwiza wo gusobanurirwa amahirwe ari mu Rwanda yo gukora ubucuruzi n’ubukerarugendo.

Umuyobozi Mukuru w’Ikigo cy’Imari n’Imigabane mu Rwanda, Pierre Célestin Rwabukumba

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE