Banki y’Isi yahaye u Rwanda inguzanyo ya miliyoni 46 $ azashorwa mu buhinzi

Yanditswe na Ishimwe Israel
Kuya 9 Werurwe 2017 saa 12:58
Yasuwe :
0 0

Leta y’u Rwanda yashyize umukono ku masezerano y’inguzanyo ya miliyoni 46 z’amadorali akabakaba miliyari 37 mu mafaranga y’u Rwanda, yahawe na Banki y’Isi, azakoreshwa mu mishinga itandukanye igamije guteza imbere ubuhinzi n’ubworozi.

Umuhango wo gushyira umukono kuri aya masezerano, wabaye kuri uyu wa Kane, tariki ya 9 Weruwe 2017, wari uyobowe na Minisitiri w’Imari n’Igenamigambi, Claver Gatete n’Umuyobozi uhagarariye Banki y’Isi mu Rwanda, Yasser El- Gammal.

Iyi nguzanyo Banki y’Isi yayitanze binyuze mu Ishyirahamwe Mpuzamahanga ry’Iterambere (International Development Association-IDA) risanzwe ritera inkunga imishinga itandukanye.

U Rwanda rwahisemo kuyikoresha mu ishyirwa mu bikorwa ry’icyiciro cya gatatu mu bijyanye n’ubuhinzi “Transformation of Agriculture Sector) muri gahunda yo gufasha Leta kongera ubushobozi n’ingano y’umusaruro w’igihe kirekire uzafasha abaturage kwikura mu bukene.

Minisitiri w’Imari n’Igenamigambi, Amb. Gatete Claver, yatangaje ko aya mafaranga bahawe azakoreshwa mu bikorwa bitandukanye birimo kunoza uburyo bwo kuhira imyaka, kuyihunika ndetse no korohereza abaturage kugeza umusaruro ku isoko.

Minisitiri Gatete yakomeje atangaza ko kuba Leta y’u Rwanda ifata inguzanyo nk’izi ahanini biterwa n’uko Banki y’Isi, irworohereza mu buryo bwo kwishyura.

Yagize ati “ Inguzanyo ya Banki y’Isi ishobora kwishyurwa mu myaka 38, kandi harimo 1o umara utarishyura. Ikindi ni uko inyungu yaka iri kuri 0,75%, ikigero kiri hasi cyane.”

Yakomeje atangaza ko iyi nguzanyo izafasha by’umwihariko muri gahunda y’imyaka itanu ijyanye n’ubuhinzi Leta y’u Rwanda yihaye.

Ati “ Ni inguzanyo baduhaye iyari ihari itararangira; nyuma yo gukoresha neza amafaranga y’imyaka itatu bari baduhaye byatumye batwongera andi dufata icyemezo cyo kuyashora mu buhinzi kuko bufite igice kinini ku musaruro mbumbe w’igihugu, aho mu mwaka ushize bwari bufite 33%.”

Leta y’u Rwanda ifite gahunda y’imyaka itanu y’ubuhinzi yatangiye mu 2013, iyi mishinga igeze mu cyiciro cyayo cya gatatu biteganyijwe ko izarangira mu 2018.

Iyi nguzanyo izafasha by’umwihariko mu bijyanye no kuhira imyaka, kunoza ubwikorezi bw’ibicuruzwa, gutanga ifumbire ku bahinzi n’imbuto z’indobanure, guca amaterasi y’indinganire, gukoresha ikoranabuhanga rigezweho no gukora ubushakashatsi bwimbitse bugamije guhugura abahinzi, hagamijwe kongera umusaruro.

Umuyobozi uhagarariye Banki y’Isi mu Rwanda, Yasser El- Gammal yatangaje ko inguzanyo yatanzwe iri mu rwego rwo gufasha uru rwego, Ati “Ubuhinzi bufite uruhare rukomeye ku bukungu bw’igihugu kuko buha Abanyarwanda benshi akazi. Ni iby’agaciro ko uru rwego ruhabwa imbaraga kugira ngo imibereho myiza ikomeze yimakazwe.”

Iyi nguzanyo kandi izafasha Minisiteri y’Ubuhinzi n’Ubworozi (Minagri) kurushaho gushyira mu bikorwa no kunoza Politiki yayo igenga ubuhinzi.

Ibi nibimara kugerwaho bizafasha mu kongera ingano y’ibiribwa mu baturage ndetse no gushimangira gahunda ya Leta yo kwagura ubucuruzi bw’ibikomoka ku buhinzi binyuze mu guhaza amasoko y’imbere mu gihugu no hanze yacyo, hagabanywa umubare w’ibitumizwa hanze, ahubwo bikoherezwayo ku bwinshi. Ibi bigendana no kubaka uburyo buzatuma abikorera bashora imari mu buhinzi.

Muri Gashyantare uyu mwaka, Guverinoma y’u Rwanda n’Urwego rwa Guverinoma y’u Bwongereza rushinzwe Iterambere Mpuzamahanga (DFID) basinye amasezerano y’imikoranire yo gutera inkunga ya miliyoni eshanu z’ama-pound, akabakaba miliyari eshanu mu mafaranga y’u Rwanda mu mishinga y’ubuhinzi.

Minisitiri w’Imari n’Igenamigambi, Claver Gatete n’Umuyobozi uhagarariye Banki y’Isi mu Rwanda, Yasser El- Gammal mu muhango wo gushyira umukono ku maserano y'inguzanyo
Minisitiri w'Imari n'Igenamigambi, Amb. Gatete Claver ashimangira ko impamvu u Rwanda rwaka inguzanyo muri Banki y'Isi biterwa ahanini nuko boroherezwa mu buryo bwo kwishyura
Umuyobozi uhagarariye Banki y’Isi mu Rwanda, Yasser El- Gammal (iburyo) mu muhango wo gusinya amasezerano y'inguzanyo yahawe u Rwanda
Umunyamabanga wa Leta muri Minisiteri y’Ubuhinzi n’Ubworozi, Jean Claude Kayisinga atangaza ko iyi nkunga izafasha mu mishinga itandukanye ishyigikira ubuhinzi mu gihugu
Abanyamakuru bitabiriye uyu muhango wabereye mu cyumba cy'inama cya Minisiteri y'Imari n'Igenamigambi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza