Kwamamaza

U Rwanda rwungukiye byinshi mu nama yiga ku ishoramari ry’amahoteli muri Afurika

Yanditswe kuya 7-10-2016 saa 13:43' na Rabbi Malo Umucunguzi


Ikigo cy’Igihugu cy’Iterambere (RDB), kivuga ko inama yiga ku Ishoramari ry’Amahoteli muri Afurika, Africa Hotel Investment Forum, yabaye umusemburo wo guhuza abikorera b’Abanyarwanda n’abanyamahanga, ku buryo ibiganiro byabo byitezweho umusaruro mu guteza imbere ubukerarugendo.

Iyi nama yabereye i Kigali kuva kuwa 4 kugeza kuwa 6 Ukwakira, ihuza abasaga 600 bakora mu bijyanye na hoteli ku rwego mpuzamahanga, abashoramari, abatanga serivisi n’abandi.

Umuyobozi ushinzwe ishoramari muri RDB, Innocent Bajiji, yabwiye itangazamakuru ko hari byinshi u Rwanda rwungukiye muri iyi nama, aho abashoramari basangiye ubumenyi n’abanyamahanga bakataje muri serivizi zo kwakira abantu.

Ati “Twungutse byinshi nko mu bijyanye n’ubukerarugendo, cyane muri iyi gahunda dufite yo kubuteza imbere, aho dushaka ko igihugu cyacu kizaba igihugu cyakira inama zikomeye. Navuga ko ibyo twari tuyitezeho byagenze neza. Hari ibiganiro bifatika byagiye bikorwa aho ibigo byo mu Rwanda byahuye n’ibindi byaturutse hanze, twizeye ko bizanakomeza bikavamo umusaruro ufatika.”

Ubwo yafunguraga iyi nama, Umuyobozi wa RDB, Francis Gatare, yavuze ko ishoramari mu nzego zijyana n’ubukerarugendo zirimo ibijyanye n’indege n’amahoteli bikomeje kuba ku isonga mu Rwanda.

Ati “Turifuza gushishikariza abashoramari bose kwitegereza amahirwe yose ari mu Rwanda, aho imibare iheruka yagaragaje ko u Rwanda ruri gutera imbere ku gipimo kiri hagati ya 7-8% ku mwaka, ndetse umuntu ntiyakwibagirwa ko urwego rwa serivisi rutanga 49% by’Umusaruro mbumbe w’Igihugu kandi urwego rwo kwakira abantu ruza ku isonga muri uwo mubare.”

Muri iyi nama u Rwanda rwaratiye amahanga amahirwe rufite mu ishoramari mu nkengero z’ikiyaga cya Kivu, runerekana ahantu nyaburanga harimo Pariki y’Ibirunga ituwe n’Ingagi z’imisozi.

Hari byinshi bizana abashoramari mu gihugu

Rahul Chaudhary, Umuyobozi w’Ikigo CG Corp Global gifite amahoteli asaga 100 mu mijyi isaga 70 ku Isi, mu Rwanda hakaba Zinc yashohewo agera hafi kuri miliyoni $40, ni umwe mu batanze ikiganiro muri iyi nama.

Mu kiganiro na IGIHE, Chaudhary yavuze ko ikigo cye cyashoye imari mu Rwanda nyuma yo kwitegereza Afurika y’u Burasirazuba, mu bihugu bitanu birimo u Rwanda, Uganda, u Burundi, Tanzania na Kenya.

Ati “Twasanzwe ahantu ha mbere ho gushora imari hagomba kuba mu Rwanda, kubera ko ni igihugu gitekanye, gifite ubukungu buri kwihuta cyane kurusha ibindi, kandi ibikorwa remezo byacyo bimeze neza ugereranyije n’ibindi bihugu muri Afurika y’u Burasirazuba.”

“Perezida w’u Rwanda yashyizeho uburyo bwiza, aho inama zose zibera mu karere ziza i Kigali. Kigali iri gutera imbere nk’icyerekezo cy’inama zikomeye, kandi ni isoko ubwabyo. Mu mezi make ashize hari World Economic Forum, haza African Union, ubu haje inama yiga ku mahoteli.”

Uyu mushoramari yavuze ko inama Nyafurika yiga ku mahoteli ari ingenzi mu guhanahana ubumenyi, aho yabaye umwanya wo guhura kw’amazina akomeye y’amahoteli, buri umwe akagaragaza ubunararibonye bwe mu ishoramari muri izi nzego.

Chaudhary kandi yashimye intego u Rwanda rwihaye yo kumenyekanisha ibyiza nyaburanga rufite, ku buryo abakerarugendo bazakomeza kwiyongera ku gihugu, ari na byo ishoramari rya hoteli ryubakiyeho.

Ubukerarugendo bwinjije miliyoni $ 340 mu 2015, akaba yariyongereyeho 10% ugereranyije n’uko byari bimeze mu 2014, ariko guverinoma yihaye intego ko nibura buri mwaka inyungu y’ubukerarugendo yajya yiyongeraho 25%.

Abayobozi batandukanye mu nama yiga ku ishoramari mu by'amahoteli
Rahul Chaudhary, Umuyobozi w'Ikigo CG Corp Global
Umuyobozi w'Ikigo cy'Iterambere, RDB, Francis Gatare

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved