Uko koperative zigera kuri 60 zafunguriwe imiryango yo kwinjira mu bikorwa by’ishoramari

Yanditswe na IGIHE
Kuya 1 Gashyantare 2018 saa 01:45
Yasuwe :
0 0

Ahagana mu 2007, ahazaza h’amwe mu makoperative hasaga n’ahatwikiriwe n’igihu kubera ibibazo byari biyugarije birimo iby’ubushobozi buke bw’amafaranga n’ubumenyi mu micungire y’umutungo byatumaga arangwa n’imikorere irimo guhuzagurika.

Kuri ubu ariko agera kuri 60 amaze kwiyubaka mu buryo bufatika ndetse amwe yinjiye mu bikorwa by’ishoramari bitanga icyizere abikesha inkunga z’uburyo butandukanye yatewe n’ Ikigo cy’Abanyamerika cyita ku iterambere rya Afurika, USADF(United States Africa Development Foundation) gikorera mu Rwanda.

Iki kigo gitanga inkunga y’amafaranga yo gushyira mu bikorwa imishinga y’amakoperative ahinga icyayi, ikawa, umuceri, imboga n’imbuto, abyaza umusaruro ibikomoka ku mata, ku bufatanye na Africa Development Consultant (ADC) ikurikirana bene iyo mishanga kugeza ibyaye inyungu.

Iri ni ryo ryabaye ifatizo ryo kwagura ibikorwa kwa Koperative Coopthe Mulindi ihinga icyayi mu mu Karere ka Gicumbi, kuri ubu imaze gusohoka mu bibazo byari biyugarije nk’uko Umucungamutungo wayo, Munyaneza Leonidas, yabisobanuye.

Ati “Dutangira twari dufite ikibazo cy’ubushobozi bw’amafaranga n’icy’ubumenyi buke. USADF yaduhaye miliyoni 133 mu 2008. Twabashije gutera hegitari 113 z’icyayi, tugura na moteri zo kuhira kuri hegitari 200. Twahawe n’amahugurwa mu bijyanye no gucunga umutungo baradukurikirana mu myaka itanu twamaranye ku buryo kugeza n’ubu koperative yacu ari indashyikirwa.”

“Ubuso buhingwaho icyayi n’umusaruro byariyongereye ndetse amafaranga abanyamuryango bahabwaga ava kuri miliyoni 12 agera kuri 309 umwaka ushize. Twakomeje gukura ari mu mutungo no mu mikorere myiza.”

Iki kigo kandi cyagize uruhare mu ishoramari rya Koperative Coproriz Ntende ikorera mu Karere ka Gatsibo, iherutse gufungura hotel n’ibindi bikorwa by’ubucuruzi bya miliyoni 295 z’amafaranga y’u Rwanda.

Umucungamutungo wa Koperative Coproriz Ntende, avuga ko gukorana na USADF byabafunguriye imiryango yo gukorana na banki bakabasha gushora imari mu mishinga minini itanga icyizere cy’inyungu ifatika.

Yakomeje avuga ko nyuma y’aho bahawe imodoka n’iki kigo yabafashaga mu gutwara umusaruro n’ibindi bitandukanye, ubu bamaze kugura amakamyo ane.

Kuri ubu ngo ubuhinzi bw’umuceri babukora kinyamwuga ndetse bageze ku rwego rwo gutubura imbuto ubwabo cyangwa kugerageza ivuye ahandi bakayiha abahinzi bizeye ko izatanga umusaruro.

Iyi koperative ngo ifite porogaramu za mudasobwa zikoreshwa mu micungire y’abanyamuryango, iy’umutungo n’icunga ububiko igiye gutangira, bikaba ari bimwe mu by’ibanze bibafasha gutunganya neza ibyo bakora.

Uwiyizeye Germain wari uhagarariye ikigo gikwirakwiza amashanyarazi akomoka ku mirasire y’izuba, RENERG, yavuze ko inkunga bahawe yagize uruhare mu ishyirwa mu bikorwa ry’imishinga yabo.

Ati “ Iki kigo cyadufashije mu mishanga yose twagiye dutegura cyane iyo twakoze mu Karere ka Nyamasheke ahitwa mu Ibanga. Cyaduhaye miliyoni 100 tubasha gucanira abaturage barenga 120 batari barigeze bagira umuriro bu buzima bwabo. Iyo batangiye kugufasha bakwigisha gukora mu buryo bwagutse, bakagukurikirana kugeza umushinga wawe ubyaye umusaruro kugira ngo utavaho ukora amakosa utabizi.”

Amakoperative yatewe inkunga n’ibi bigo yahujwe na Minagri ndetse na BDF mu rwego rwo kureba intambwe bamaze gutera no gusangira amakuru ku wa 31 Mutarama.

Umuyobozi wa ADC, Rebecca Ruzibuka yashimye urwego rw’imikorere ku yabaye intangarugero avuga ko akwiye kubera icyitegerezo akiri mu bibazo.

Ati “Nubwo aba bose bafashijwe mu buryo bumwe hari abatangiye mbere n’abaje nyuma, bamwe babashije kugera ahantu hafatika abandi biracyabagora, ni yo mpamvu twabahurije hamwe kugira ngo bahane amakuru y’uko babona amafaranga yo kwagura ibikorwa byabo n’amasoko y’ibyo bakora.”

Amakoperative agera kuri 60 ni yo amaze guhabwa inkunga zo mu byiciro bibiri birimo icyo kubaka ubushobozi aho koperative ihabwa nibura ibihumbi 100 by’amadolari n’icyo gutera inkunga imishinga gitangwamo agera ku bihumbi 250 by’amadolari.

Umuyobozi wa ADC, Rebecca Ruzibuka
Bamwe mu bahagarariye amakoperative yatewe inkunga na USADF ubwo bahurizwaga hamwe
Uguhurizwa hamwe kku bahagarariye amakoperative yatewe inkunga n'iki kigo byabaye umwanya wo gusangira amakuru mu by'ishoramari
Coproriz Ntende yatangiye ibikorwa by'ishoramari birimo hotel n'amacumbi ndetse na salle zikodeshwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza