Uruganda Luxmi rwo mu Buhinde rugiye gushora asaga miliyari 25 Frw mu buhinzi bw’icyayi i Karongi

Yanditswe na Mukaneza M.Ange
Kuya 13 Nyakanga 2017 saa 11:11
Yasuwe :
0 0

Uruganda rw’Abahinde Luxmi Tea Company, rugiye gushora asaga miliyari 25 z’Amanyarwanda (miliyoni 30 z’amadolari), mu guhinga icyayi ku butaka bungana na hegitari 4 438 buherereye mu Murenge wa Rugabano, Akarere ka Karongi.

Ni nyuma y’amasezerano y’ubufatanye yashyizweho umukono tariki ya 13 Nyakanga 2017, hagati ya Minisiteri y’Ubuhinzi n’Ubworozi, MINAGRI na Luxmi Tea Company Ltd.

Uruganda Luxmi Tea Company rwatangiye gukora mu 1912, ruzwiho gukora icyayi kiri ku rwego rwo hejuru aho rufite n’icyo rugurisha amadolari 1000 ku kilo, bitewe n’ubwiza n’umwimerere wacyo.

Minisitiri w’Ubuhinzi n’Ubworozi, Dr.Mukeshimana Gerardine yavuze ko aya masezerano azamara imyaka 49, ku ikubitiro uyu mushinga ukazashorwamo agera kuri miliyoni 30 z’amadolari mu gihe cy’imyaka 10.

Ubuyobozi bw’Ikigo gishinzwe Iterambere, RDB cyagize uruhare mu kuyobora ibiganiro byatumye aya masezerano agerwaho, bwagaragaje ko uyu mushinga ari umusanzu ukomeye mu guteza imbere ibikorerwa mu Rwanda.

Umuyobozi Mukuru wa RDB, Clare Akamanzi yagize ati “Uyu mushinga uzatanga umusanzu ugaragara muri gahunda y’igihugu yo kongera ibyoherezwa mu mahanga, ndetse binyuze muri uyu mushinga turifuza gukomeza kuzamura ibendera ry’ibikorerwa mu Rwanda.”

Umuyobozi Mukuru wa Luxmi Tea Company, Rudra Chatterjee yavuze ko biteguye gukorana na Leta y’u Rwanda, mu kugeza kure icyayi cy’u Rwanda gisanzwe gifite uburyohe ntagereranywa.

Umuyobozi w’Ikigo gishinzwe kohereza hanze umusaruro ukomoka ku buhinzi NAEB, Amb Bill Kayonga yagaragaje ko binyuze muri uyu mushinga bateganya gutunganya icyayi kingana na toni ziri hagati y’ibihumbi umunani n’icyenda ku mwaka, mu gihe amafaranga azinjizwa azaba ari hagati ya miliyoni 28-30 z’amadolari.

Iki cyayi kandi kizajya gitunganyirizwa mu ruganda rwa Rugabano, kinitezweho guhindura imibereho y’abaturage barenga ibihumbi 40 bazabona imirimo.

Hanashyizwe kandi umukono ku masezerano hagati y’Ikigega cy’u Bwongereza gishinzwe iterambere mpuzamahanga, DFID n’Ikigo Woods Foundation Africa, ahazatangwa miliyoni 6.8 z’ama-pound azakoreshwa mu gufasha abahinzi bagera ku bihumbi birindwi bahinga icyayi mu murenge wa Rugabano kurushaho kunoza ubuhinzi bwabo.

Minisitiri w'Ubuhinzi n'Ubworozi, Mukeshimana Gerardine
Umuyobozi Mukuru wa Luxmi Tea Company, Rudra Chatterjee(hagati)

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza