Zigama CSS yazamuye inyungu ku bwizigame igera ku 8%

Yanditswe na Rabbi Malo Umucunguzi
Kuya 24 Ugushyingo 2017 saa 01:26
Yasuwe :
1 0

Banki y’abagize inzego z’umutekano, Zigama CSS, yazamuye inyungu ku bwizigame shingiro bw’abanyamuryango iyigeza ku 8%, nk’uko byemejwe mu nama y’Inteko Rusange yayo yateranye kuri uyu wa Gatanu.

Inyungu itangwa n’iyi banki ihurirwamo n’Ingabo z’igihugu, Polisi, Urwego rushinzwe Imfungwa n’Abagororwa n’Urwego rushinzwe Iperereza n’Umutekano, guhera mu 2018 izava kuri 7% igere ku 8% ku bwizigame shingiro bw’umunyamuryango; naho ku bwizigame bw’umuntu ku giti cye ikazava kuri 6% ikagera kuri 7%.

Ubwizigame shingiro (compulsory savings) ni amafaranga umunyamuryango wa Zigama CSS atanga buri kwezi ari nayo ashingirwaho mu kubara imari shingiro ya banki; naho ubwizigame bw’umuntu ku giti cye (voluntary savings) ni amafaranga umuntu yizigamira akanayabikuriza igihe runaka.

Umuyobozi w’Inama y’Ubutegetsi ya Zigama CSS, Dr James Ndahiro, yavuze ko byari bikenewe ko mbere y’uko umwaka urangira, bahura n’abanyamuryango ngo bakabamura uko banki ihagaze n’ibiteganywa mu mwaka utaha.

Yagaragaje ko umwanzuro wo kuzamura inyungu ku bwizigame wafashwe hagamijwe gushishikariza abanyamuryango kurushaho kwizigamira, mu bwizigame bwabo akaba ari naho banki ikura imbaraga.

Yakomeje agira ati “Twakomeje kwishimira uko Zigama CSS ihagaze ariko twiyemeza ko dushishikariza abanyamuryango bose gukomeza kwizigamira kugira ngo nayo irusheho kubaha serivisi nziza. Uko tugenda twizigamira niko na Zigama CSS igira ubushobozi bwo gutanga serivisi zikenewe n’abanyamuryango bose.”

“Ibyo byatumye inama ifata icyemezo cy’uko uburyo twajyaga dutanga inyungu mu gushimira abizigamiye tubisubiramo, ku buryo buri mwaka tubungukira 8% avuye kuri 7% na 6%. Hanyuma za konti aho bizigamira ku bushake, iyo tuzajya tuyungukira 7%.”

Dr Ndahiro yavuze ko bateganya ko uyu mwaka uzarangira Zigama CSS ibonye inyungu ya miliyari 8 Frw. Kugeza kuwa 30 Nzeri 2017 yari imaze kunguka miliyari 6.32 Frw nyuma yo kwishyura imisoro, mu gihe umwaka ushize wose warangiye ikoze inyungu ya miliyari 6.86 Frw.

Zigama CSS ni imwe muri banki zifite umutungo mbumbe wihagazeho mu gihugu, kuko kugera mu mpera za Nzeri 2017 wari miliyari 228 Frw zivuye kuri miliyari 215 zabarwaga mu mpera za 2016; Muri Nzeri 2017 imari shingiro yabarirwaga muri miliyari 50.4 Frw mu gihe kuwa 31 Ukuboza 2016 zari miliyari 44.9.

Minisitiri w’Ingabo, Gen. James Kabarebe mu bayobozi bakuru bitabiriye Inteko rusange ya Zigama CSS
Umuyobozi w’Inama y’Ubutegetsi ya Zigama CSS, Dr James Ndahiro, yavuze ko umwanzuro wo kuzamura inyungu ku bwizigame wafashwe nyuma yo kubona ko iri kwiyongera
Umugaba Mukuru w’Ingabo z’u Rwanda, Gen. Patrick Nyamvumba
Gen Maj. Martin Nzaramba, Gen Maj.Alexis Kagame na Gen Augustin Turagara
Brig Gen. Andrew Kagame na Brig Gen. Eugene Nkubito
Col. Dr. Jean Paul Bitega uyobora Ibitaro bya Gisirikare bya Kanombe ari kumwe na Col Jean Paul Karangwa muri iyi nteko rusange ya Zigama CSS
Umuyobozi Mukuru wa Zigama CSS, Brig Gen Albert Murasira ari kumwe na Brig. General Eric Murokore (hagati) na Brig Gen Wilson Gumisiriza
Inama y’Inteko Rusange y’Abanyamuryango ba Zigama CSS yateranye yanzuriwemo izamuka ry'inyungu ku bwizigame shingiro
Dr James Ndahiro aganira n'itangazamakuru

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza