Abasaga ibihumbi 52 bamaze kwiyandikisha mu kigega ‘Ejo Heza’

Yanditswe na Akayezu Jean de Dieu
Kuya 4 Gicurasi 2019 saa 04:26
Yasuwe :
0 0

Abantu basaga ibihumbi 52 bamaze kwiyandikisha mu kigega ‘Ejo Heza’ barimo abarenga ibihumbi 10 bamaze gutanga amafaranga y’ubwizigame buhoraho.

Mu Ukuboza 2018, nibwo Guverinoma y’u Rwanda yatangije ubwizigame bw’igihe kirekire bwiswe ‘Ejo Heza’ bugamije kuzamura igipimo cy’ubwiteganyirize mu gihugu no kuzamura ubukungu.

Imibare itangazwa n’ubuyobozi bw’iki kigega igaragaza ko kugeza ubu abantu 52,597 aribo bamaze kwiyandikisha muri iki kigega, naho 10,724 bamaze gutanga ubwizigame mu buryo buhoraho, aho bamaze gutanga miliyoni zisaga gato 53Frw.

Umuyobozi w’Itsinda rishinzwe Ibikorwa mu kigega Ejo Heza, Rutsinga Jacques yabwiye Radio Rwanda ko hakomeje ubukangurambaga ku gushishikariza abaturage kugana iki kigega by’umwihariko abari mu makoperative.

Yagize ati “Ni ubukangurambaga bureba cyane ibyiciro birimo amakoperative, murabizi ko abanyarwanda bagera kuri miliyoni 4.9 bari muri koperative ushobora no kuvuga ko hari abari mu yirenze imwe ariko nibura abagera nko kuri miliyoni eshatu bari muri koperative kandi nazo zirarenga ibihumbi umunani.”

“Iyi rero yo gukora ubukangurambaga mu makoperative ni imwe muri gahunda dushobora kwifashisha iyi gahunda ikagera kuri benshi kandi bayikeneye.”

Gufungura konti muri ‘Ejo Heza’ bikorerwa kuri telefoni. Umuntu akanda *506# ku mirongo ya MTN na Airtel &Tigo.

Kugeza ubu abarenga 94% bizigamira muri Ejo Heza bakoresheje telefone.

Abaturage biyandikishije muri iki kigega bavuze ko ubwizigame ari ikintu cy’ingenzi kuko ibyo wizigamye bikugoboka mu gihe cy’ahazaza.

Umwe yagize ati “Kwizigamira ni byiza bitewe n’uko uyu munsi ushobora kuba ubayeho neza ufite akazi ariko mu gihe kiri imbere ukaba ubayeho nabi n’akazi karahagaze. Bwa bwizigame bushobora kukubeshaho neza kuko uba wariteganyirije.”

Hari abandi ariko bavuga ko batariyandikisha muri iki kigega kuko batagifiteho amakuru.

Ubuyobozi bw’Ikigega Ejo Heza buvuga ko kizajya kinjiza abanyamuryango bashya 207, 500 buri mwaka.

Ubwo yatangizaga Ejo Heza, Minisitiri w’Imari n’Igenamigambi, Dr Ndagijimana Uzziel, yavuze ko iyo igipimo cyo kuzigama kizamutse ishoramari ryiyongera rikazamura ubukungu ndetse umutungo n’imibereho myiza y’abaturage bikiyongera.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza