Kwamamaza

Agaciro ka RwandAir karenze imitekerereze abantu bayigiraho- Dr Nzahabwanimana

Yanditswe kuya 19-10-2016 saa 09:02' na IGIHE


Umunyamabanga wa Leta muri Minisiteri y’Ibikorwa Remezo ushinzwe ubwikorezi, Dr Nzahabwanimana Alexis, yabwiye Abadepite ko leta y’u Rwanda irajwe ishinga no kongerera ubushobozi isosiyete ikora ingendo zo mu Kirere ya RwandAir, ndetse muri Gicurasi umwaka utaha ubushobozi bwayo bukazaba bwikubye kabiri.

Uyu muyobozi yabibwiye Inteko Rusange y’Umutwe w’Abadepite, ubwo kuri uyu wa Kabiri tariki 18 Ukwakira, yemezaga amategeko arindwi ajyanye no gutwara abantu n’ibintu mu Kirere hagati y’u Rwanda na Benin, Repubulika ya Centrafrique, Côte d’Ivoire, Ethiopia, Guinee Conakry, Sudani y’Epfo na Uganda.

Dr Nzahabwanimana yavuze ko RwandAir ihagaze neza ku isoko ndetse ishaka gukomeza kuzamura ubushobozi.

Ati “Aho tujya tubona abantu kandi naho tudahita tubabona biba bitewe n’uko tutaramenyekana mu buryo bwuzuye kuko twari dufite ikibazo cy’indege. Kuva uyu munsi kugera muri Gicurasi umwaka utaha, RwandAir izaba yakubye kabiri ubushobozi bwo gutwara abantu yari ifite mbere y’uko indege duherutse kwakira iza. Mu kwa 12 hazaza indi, haje iy’imyanya 244 ubu hahaza 274 noneho nizaza mu kwa 11 ni nini.’’

‘‘Mu kwa 12 hazaza iy’imyaka 152 no mu kwa gatanu hazaza iy’imyanya 152.Iyo uyibaze ikuba kabiri ubushobozi bwa RwandAir. Ugeranyije n’ikenewe muri Afurika ntaho turagera, turacyakeneye izindi ndege.”

Dr Nzahabwanimana Alexis yabwiye Abadepite ko usibye kuba RwandAir ikora ingendo, inatanga akazi ku Banyarwanda aho kugeza ubu ifite abakozi barenga 700, hakiyongeraho abandi bagera kuri 500 bakora nibura mu kigo gishinzwe iby’indege za gisivili, ku buryo nibura bose hamwe bagera ku 1500 bahawe akazi “bagendeye ku kuba dufite RwandAir.”

Yakomeje agira ati “Kuba dufite RwandAir ni ikirezi gikomeye ku buryo, ni ahantu hadufasha mu iterambere ry’ubukungu ku buryo birenze kujya kubara mu bitabo bya RwandAir amatike yinjiye ngo ni angahe. Ubu ubukerugendo bwateye imbere ariko nka 90% nabishyira kuri RwandAir. Buriya agaciro ka RwandAir iyo umuntu abaze uko ikora,abantu benshi bahita bikanga kuko karenze imitekerereze abantu bayigiraho.”

Umunyamabanga wa Leta muri Minisiteri y’Ibikorwa Remezo ushinzwe ubwikorezi, Dr Nzahabwanimana Alexis

Amasezerano mashya yazaniye u Rwanda umwihariko

Dr Nzahabwanimana yavuze ko gusinyana amasezerano y’ubwikorezi n’ibindi bihugu ari amahirwe akomeye ku ndege zifite inkomoko mu Rwanda, kuko igihugu gishora imari kigamije kubona inyungu ijyanye n’imari yashowe.

Mu kiganiro na IGIHE, Dr Nzahabwanimana yavuze ko hari ubwo indege z’u Rwanda zitahabwaga uburenganzira busesuye mu kubyaza umusaruro ibibuga by’indege byo mu bindi bihugu, kandi ari ikintu gikenewe.

Yavuze ko hari uburyo bwinshi bw’amasezerano u Rwanda rugirana n’ibyo bihugu, harimo ubwo igihugu kimwe cyemera gufungura ikirere, ariko kikagusaba ko uzajya ugikandagiramo ari uko uturutse mu gihugu cyawe gusa, ndetse ibihugu byinshi bikavuga ngo ‘oya ntuzaze’.

Ati ‘‘Amasezerano nk’ayo tuyafitanye na Nigeria. Ni ukugenda tukajya Lagos, indege ikagaruka i Kigali, yashaka gukomeza ahandi ikaba idashobora gufata umugenzi cyangwa igicuruzwa ngo ikijyanyeyo. Cyangwa se indi itashye ishaka kunyura Lagos, ikaba idashobora kugira ikintu ihazana, ntibe yavuga ngo reka mfate ikintu cyangwa umuntu mujyane Accra muri Ghana.’’

“Ubundi buryo bwa kabiri ari nabwo bwiza, ni ukuvuga ngo icyangombwa ni ukuba indege ifite ubwenegihugu bw’igihugu cyawe. Icyo gihe bivuze ko iyo ndege uyifiteho ububasha kandi abenegihugu bafitemo imigabane irenze 50%. Icyo gihe murumvikana ngo aho izaba iturutse hose izaza ikorere mu gihugu cyanjye, inyuze ku bibuga runaka na runaka, inaturutse aho ishaka. Nk’aya masezerano twemeje uyu munsi ari muri ubwo buryo. ’’

Dr Nzahabwanimana yavuze ko gukomeza gukorana n’ibindi bihugu mu gufunguranira amarembo bizagabanya ibiciro by’indege, kuko niba nka RwandAir itagirira ingendo nk’ i Kinshasa, hari ubwo bisaba kunyura muri Ethiopia, umuntu akongera agatega indi imujyana Kinshasa kandi yagakwiriye gukora urugendo rumwe.

Kugeza uyu munsi u Rwanda rumaze gusinyana amasezerano y’ubufatanye mu bwikorezi bwo mu kirere n’ibihugu 57.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved