EU yahaye u Rwanda miliyoni €10 zo kubaka imihanda mu cyaro

Yanditswe na Rabbi Malo Umucunguzi
Kuya 22 Ukuboza 2016 saa 01:57
Yasuwe : XX
0

Umuryango w’Ubumwe bw’u Burayi (EU) wahaye u Rwanda miliyoni €10 ni ukuvuga asaga miliyari umunani z’amafaranga y’u Rwanda, azongerwa muri gahunda yo kuvugurura no gusana imihanda ireshya na kilometero 200 mu bice by’icyaro.

Iyi mpano ni igice cya nyuma cyari gisigaye kuri miliyoni 40 z’amayero zingana na miliyari 35.3 Frw EU yemereye u Rwanda muri Werurwe 2013, agenewe kuvugurura no gusana imihanda ireshya na kilometero 700 mu bice by’icyaro, ifatwa nk’ingenzi mu koroshya ubuhahirane no gufasha abaturage kugera ku masoko no ku bindibikorwa by’ubukungu.

Mu itangazo ryashyizwe ahagaragara, Ambasaderi w’Umuryango w’Ubumwe bw’u Burayi, Michael Ryan yavuze ko igice kinini cy’abanyarwanda cyungukira muri iyi mihanda iri kunozwa.

Ati “Imihanda yo mu cyaro ni ishingiro nibura rya 80% by’ibikorwa by’iterambere by’Abanyarwanda, abenshi muri bo babeshejweho n’ubuhinzi n’ubucuruzi buciriritse kugira ngo babashe kwibeshaho. Inkunga ya EU iri muri gahunda yo kugabanya ubukene no guteza imbere imibereho y’Abanyarwanda.”

Yakomeje agira ati “80% by’inkunga yacu inyuzwa ku ngengo y’imari, ikimenyetso kigaragaza uko EU yizera imicungire y’ubukungu bw’u Rwanda. Mboneyeho umwanya wo kwifuriza Abanyarwanda Noheli nziza n’umwaka mushya muhire."

Iyi nkunga byagenwe ko miliyoni €36 muri iyo nkunga yose ariyo yagombaga kunyuzwa ku ngengo y’imari naho miliyoni €4 zigashyirwa mu bufasha mu bya tekiniki, muri gahunda yo kubaka imihanda igenewe imyaka itandatu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza