Gahunda ya Hanga Umurimo igiye kongerwamo ingufu

Gahunda ya Hanga Umurimo igiye kongerwamo ingufu


Yanditswe kuya 14-04-2013 - Saa 12:00' na Emmanuel Kanamugire

Nyuma yo gusoza icyiciro cya mbere cya gahunda ya “Hanga Umurimo”, Minisiteri y’ubucuruzi n’inganda(MINICOM) ku bufatanye n’Ikigo Mpuzamahanga cy’Imari (IFC) yatangaje ko ishaka uburyo iyi gahunda yakongererwamo ingufu ngo abaturage bayibonamo amahirwe biyongere.

Ubwo Minisiteri y’ubucuruzi n’inganda ku wa Gatanu tariki 12 Mata 2013 yasozaga amahugurwa ku bantu 30 bazafasha ba rwiyemezamirimo kubyaza ibitekerezo imishinga ibyara inyungu, kuyinononsora no guhuza ba nyirabyo n’amabanki.

Alex Ruzibukira, Umuyobozi ushinzwe iterambere ry’inganda nini, into n’iziciriritse muri iyo MINICOM, yavuze ko gahunda ya “Hanga umurimo” ya mbere yagaragaje ko Abanyarwanda bafite inyota yo kwihangira umurimo, hakaba harabonetse ba Rwiyemezamirimo bashya barimo abafite ibitekerezo bishya. Yatanze urugero k’uwashinze uruganda ruciririrtse rukora amakarito n’ibindi byo gutwaramo ibintu, bisimbura amashashi mu Ntara y’Iburasirazuba, bityo hakaba harebwa uburyo “Hanga Umurimo” yakwagurwa ikagera kuri benshi.

Alex Ruzibukira yavuze ko muri “Hanga Umurimo” ya kabiri yakwita ku buryo Ikigega cy’ingwate (BDF) cyagira uruhare rwisumbuyeho mu gushora amafaranga mu bigo bito n’ibiciriritse, abaturage benshi bakoroherezwa kubona inguzanyo, na za SACCO zikabigiramo uruhare.

Ntore Francois Tony, umuyobozi uhagarariye IFC, ari cyo cyatanze inzobere zahuguye abazafasha ba rwiyemezamirimo, yavuze ko mu cyiciro cya mbere iki kigo cyahuguye abantu benshi, ku buryo imishinga irenga 100 y’abahuguwe n’icyo kigo yagejejwe muri banki yahawe inguzanyo. Yanavuze ko icyiciro cya kabiri kitazashingira ku marushanwa mu rwego rwo guha amahirwe abantu benshi.

Pierre Damien Bazimaziki wo mu Karere ka Rubavu witabiriye amahugurwa, yatangarije IGIHE ko bagiye kunganira abafite ibitekerezo by’imishinga kuyandika neza kugira ngo ishobore koherezwa muri banki ihabwe inguzanyo.

Ati “Ubusanzwe hari abaturage benshi baba bafite ibitekerezo ariko kubishyira ahagaragara ngo bibyazwemo imishinga bikabananira ; abandi ntibashobore gucunga neza imishinga ngo bamenye niba yunguka cyangwa ihomba no gukorana n’amabanki, ibi bikaba ari byo niteguye gufashamo abaturage bo mu Karere ka Rubavu.”

Biteganyijwe ko gahunda ya “Hanga umurimo” izarushaho kongera umubare w’ibigo biciriritse, akazi, imisoro n’ibyoherezwa mu mahanga mu bihe biri imbere.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO