Gukwirakwiza amashanyarazi byazamutseho 7% mu mwaka umwe gusa

Yanditswe na Mugabo Jean d’Amour
Kuya 26 Nyakanga 2017 saa 07:57
Yasuwe :
0 0

U Rwanda rukomeje kwihutisha ikwirakwizwa ry’amashanyarazi nk’umusingi w’ibikorwa by’iterambere, ubu abaturage bagerwaho n’umuriro w’amashanyarazi bakaba bageze kuri 34.6% kandi 7% muri bo bawugejejweho mu mwaka w’ingengo y’imari wa 2016-2017.

Aganira n’itangazamakuru kuri uyu wa Gatatu, Umuyobozi Mukuru w’Ikigo Gishinzwe Guteza Imbere Ingufu (EDCL), Kamanzi Emmanuel, yavuze ko izamuka rya 7% ritigeze ribaho mu myaka yose yashize kuko ryabaga hagati ya 2% na 3%.

Ni ikiganiro cyabaye nyuma yo gutaha amashanyarazi yagejejwe ku baturage bo mu Murenge wa Bweyeye mu Karere ka Rusizi nk’igice cy’umushinga umaze imyaka itatu ukorera mu turere twa Karongi, Nyamasheke na Rusizi ukazarangira muri Nzeri 2017 utwaye amadolari y’Amerika agera kuri miliyoni icyenda mu kugeza umuriro ku baturage bo mu cyaro bagera ku bihumbi 27.

Kamanzi yavuze ko umuvuduko uziyongera kurushaho muri uyu mwaka wa 2017-2018 kuko ubu hari amatsinda 34 arimo gukwirakwiza amashanyarazi mu gihugu hose, hakiyongeraho n’imishinga itandukanye yo gukwirakwiza umuriro ukomoka ku mirasire y’izuba.

Imbogamizi zikigaragara

Hakenewe ko abagerwaho n’umuriro w’amashanyarazi kuri ubu bikuba nibura kabiri kugira ngo Leta ibashe kwesa umuhigo wo kugeza amashanyarazi ku baturage 70% bitarenze umwaka wa 2018.

Kamanzi yavuze ko kugeza amashanyarazi mu bice by’icyaro bisaba ubushobozi buhanitse kuko hari aho ubuhanike bw’imisozi budatuma hagezwa ibikoresho, bityo hagakoreshwa umuriro ufatiye ku mirongo migufi (mini grids) yubakwa hejuru mu misozi maze igashobora guha umuriro abayituriye.

Yagize ati “Kugeza umuriro muri Bweyeye byadusabye ingufu nyinshi, ubushobozi n’ibikoresho byinshi kubera ko ari agace k’icyaro n’amashyamba ku buryo bitatworoheye ariko twagombaga kubikora kuko ni umuhigo twagombaga kwesa.”

“Haracyari ibibazo by’imiterere y’igihugu ku buryo hari ahantu hejuru y’imisozi bitoroshye kugezayo ibikoresho by’amashanyarazi… nta modoka ishobora kugerayo, ni yo mpamvu dushaka ubundi buryo ahantu nk’aho tukubakayo ingomero ntoya ariko nabwo ugasanga kugezayo n’amapoto ni ikibazo gikomeye ariko tugenda dukorana n’abaturage.”

Abaturage begerejwe ibikorwaremezo by’amashanyarazi bishyura amafaranga ibihumbi 56 kugira ngo bawuhirirwe mu nzu kandi abatishoboye bakoroherezwa kwishyura babikora mu byiciro bitandukanye harimo n’abishyura binyuze mu gukatwa 50% ku mafaranga bagura umuriro kugeza barangije kwishyura.

Kamanzi avuga ko ari amafaranga make cyane ugereranyije n’ikiguzi bisaba Leta cy’amafaranga y’u Rwanda agera kuri miliyoni imwe mu kugeza umuriro ku muturage umwe gusa.

Ati “Ariya mafaranga ni uruhare ruto umuturage asabwa kugira ngo yumve ko na we yabigizemo uruhare bityo ashishikarire no kurinda ibikorwaremezo. Abatishoboye turaborohereza ariko tukanabashishikariza guharanira kwigira, bityo umuturage aho kugura icupa ry’inzoga akagura umuriro abana bagashobora kwiga, mu rugo hakaboneka urumuri, umuryango wose ukagira ubuzima bwiza.”

Mu myaka irindwi ishize u Rwanda rwateye imbere mu nkingi zose zibumbatiye iterambere rusange ry’igihugu ariko urwego rw’ingufu rwashyizwemo imbaraga zihariye bituma haboneka amashanyarazi agera kuri Megawati 208.36 zivuye kuri 97 zariho mu 2010.

Ibikorwa byo gukwirakwiza amashanyarazi byashyizwemo ingufu zidasanzwe bituma yiyongeraho 7% mu mwaka umwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza