Iby’umuhanda wa Gari ya Moshi wa ‘Isaka-Kigali’ bigeze he?

Yanditswe na HABIMANA James
Kuya 2 Gicurasi 2019 saa 08:55
Yasuwe :
0 0

U Rwanda na Tanzania bifitanye umushinga ukomeye wo kubaka umuhanda wa Gari ya Moshi uzaba ureshya n’ibilometero 532 ukazatwara akayabo ka miliyari 3.6 z’amadorali ya Amerika.

Ni umushinga ibihugu byombi bihanze amaso cyane cyane ku ruhande rw’u Rwanda rusanzwe rudakora ku mazi magari.

Uyu muhanda uzanyura mu turere twa Ngoma, Kirehe, Bugesera na Kicukuro.

Ku wa Kabiri Umunyamabanga wa Leta muri Minisiteri y’Ibikorwa Remezo, ushinzwe gutwara abantu n’ibintu, Uwihanganye Jean de Dieu, yari mu Nteko Ishinga Amategeko.

Yari yagiye gusaba ko abagize Inteko batora umushinga w’itegeko ryemera kwemeza burundu amasezerano hagati y’u Rwanda na Tanzania, yerekeye ubufatanye mu ishyirwa mu bikorwa ry’uyu mushinga w’inzira ya Gari ya Moshi, Isaka-Kigali, yashyiriweho umukono i Kigali ku wa 09 Werurwe 2018.

Ubwo yagarukaga kuri uyu mushinga, Uwihanganye yavuze ko nuramuka urangiye uzafasha mu buryo bukomeye iterambere ry’u Rwanda.

Uyu mushinga uteye ute?

Uyu muhanda wa Gari ya Moshi ufite kilometero 532 muri rusange, ku ruhande rw’u Rwanda uzava Rusumo ugere mu Mujyi wa Kigali ariko haziyongeraho agace kagera ku Kibuga cy’Indege cya Bugesera.

Ku ruhande rw’u Rwanda uyu muhanda uzaba ureshya na kilometero 138 mu gihe ku ruhande rwa Tanzania ari kilometero 394.

Wose hamwe uzatwara miliyari 3.6 z’amadorali ya Amerika. Ku gice cya Tanzania ni miliyari 2.3 naho ku Rwanda ni miliyari 1.3 z’amadorali.

Tanzania izajya ikoresha amadorali ya Amerika miliyoni 5 mu kubaka ikilometero kimwe mu gihe ku ruhande rw’u Rwanda ho ari miliyoni icyenda. Mu Rwanda birahenze kubera ko aho uyu muhanda uzanyura hari imisozi kurenza Tanzania.

Gari ya Moshi itwara abantu izajya ikoresha umuvuduko wa kilometero 120 ku isaha

Ibihugu byombi byiteguye gutanga aya mafaranga?

Uwihanganye yabwiye Abadepite ati “Nk’u Rwanda twamaze gukora inyigo mu kwezi gutaha [Gicurasi] nibwo Inama y’Abaminisitiri izabyemeza. Nk’uko kandi mubizi nk’u Rwanda duteza imbere abikorera niyo mpamvu twumva ko uyu mushinga wazakorwa hagati y’abikorera na leta ariko abo muri Tanzania bo bavuga ko igihugu aricyo kigomba gushaka amafaranga kikabyikorera, ibi nibyo biganiro bihari.”

Yakomeje agira ati “Byagaragaye neza ko uramutse uri nka leta ukajya gushaka amadeni byagora, urumva miliyari 3.6 cyangwa se miliyari 1.3 ku Rwanda kuyafata nk’ideni biragoye, keretse uhagaritse ibindi byose wakoraga, igishoboka ni uko twazanamo abikorera kugira ngo bigabanye amadeni ku gihugu, ibyo nibyo tukiganiraho kugira ngo tubanze twumvikane.”

Yavuze ko kuba u Rwanda na Tanzania batarumvikana ku ho aya mafaranga agomba kuva, nta wavuga ngo umwaka utaha baba babiteguye byose.

Uyu mushinga witezweho gutanga uwuhe musaruro?

Muri rusange izi Gari ya Moshi zizaba zifite umuvuduko udasanzwe kuko itwara abagenzi izajya igenda ibilometero 120 ku isaha, mu gihe itwara imizigo yo izajya igenda ibilometero 80 ku isaha kandi zikoresha amashanyarazi.

Uwihanganye yavuze ko nitangira gukora bizagabanya igiciro ho 40% cy’ubwikorezi bigire ingaruka nziza ku byo u Rwanda rwohereza mu mahanga n’ibyo ruvanayo.

Ati “Muzi ko abantu bose baza gushora imari mu Rwanda ikintu cya mbere kibabangamira bavuga ni igiciro cy’ubwikorezi, umuntu aba yiteguye kuza hano yareba kuvana kontineri hanze bigatuma hari abacika intege kubera guhenda.”

U Rwanda ruvuga ko mu 2019/20 ari umwaka wo gushaka amafaranga azakoreshwa naho mu 2020/21 bikaba gushaka rwiyemezamirimo.

Gari ya Moshi izajya ihagurukira i Ndera, imizigo ibikwe i Masaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza