Kwamamaza

IMF yatanze icyizere ko ubukungu bw’u Rwanda buzazamukaho 6.2% mu 2017

Yanditswe kuya 2-11-2016 saa 20:31' na Rabbi Malo Umucunguzi


Ikigega Mpuzamahanga cy’Imari, IMF, cyagaragaje ko ubukungu bw’u Rwanda buzakomeza kuzamuka mu myaka iri imbere, ku buryo mu 2017 buzazamuka kuri 6.2% bivuye kuri 6% buzazamukaho kugeza mu mpera z’uyu mwaka.

Itsinda rya IMF ryari mu Rwanda kuva kuwa 19 Ukwakira kugeza kuri uyu wa 2 Ugushyingo, risuzuma uko u Rwanda ruri gushyira mu bikorwa gahunda zigamije izamuka ry’ubukungu n’imari, Policy Support Instrument (PSI).

Umuyobozi wa IMF mu Rwanda, Laure Redifer, ari nawe wari uyoboye iri tsinda, yavuze ko ibipimo bigaragaza ko ubukungu bw’u Rwanda buzazamuka kuri 6% muri uyu mwaka nk’uko byateganywaga ugitangira.

Ati “Ubukungu bw’u Rwanda buracyahagaze neza, aho umusaruro mbumbe wazamutse kuri 6.5% mu gice cya mbere cya 2016, ndetse izamuka ryitezwe mu mwaka wose rikomeza kuba 6% rishingiye ku izamuka ry’urwego rwa serivisi, nubwo urwego rw’ubuhinzi rwagenze gacye bitewe n’amapfa aheruka kimwe n’urwego rw’inganda (ubwubatsi) bitewe n’isozwa ry’imishinga inyuranye.’’

Redifer yavuze ko mu mu 2017 byitezwe ko ubukungu bw’u Rwanda buzazamuka kuri gipimo cyisumbuyeho cya 6.2% hashingiwe ku musaruro wa Kawa n’ibikoresho bikorerwa mu Rwanda biri kwiyongera muri gahunda ya ‘Made in Rwanda’, mu 2018 bukazagera kuri 6.6%.

Minisitiri w’Imari n’igenamigambi Amb Gatete Claver yavuze ko nubwo IMF idaha inkunga u Rwanda y’amafaranga, ibafasha mu bya tekiniki birebana na gahunda zituma ubukungu bukomeza kuzamuka, uko leta ibona amafaranga ikoresha n’ibyemezo bya Banki Nkuru y’Igihugu mu kubungabunga ifaranga.

Yagaragaje ko mu mwaka ushize habayeho igabanuka ry’ibiciro by’ibyoherezwa mu mahanga bitewe n’uko aho byoherezwaga ubukungu bwahungabanye, rwitabaza IMF ku nguzanyo y’ingoboka yafasha Banki Nkuru y’Igihugu kugoboka by’igihe gito abatumiza ibintu mu mahanga mu gihe gahunda zashyizweho z’ikirekire zifata umurongo.

Ati “Baduhaye amafaranga y’inguzanyo agera kuri miliyoni $200. Ubwo rero icyari kibazanye ni ukugira ngo barebe kuri ya porogaramu twari dusanganywe n’ibyo tumvikanye tugomba gukora ku ruhande rwa leta, yuko twabyujuje, noneho bakongera bagasuzuma ya mafaranga baduhaye uburyo yakoreshejwe n’icyo yafashije kugira ngo ubukungu bwacu bwe gukomeza kumera nabi.’’

“Icyagaragaye ni uko ibyo twemeranyije muri porogaramu yacu byose twabishyize mu bikorwa nk’uko byasabwaga kandi twanabyumvikanyeho, turabona ko ubukungu bwacu uko twateganyaga buzazamuka nyuma y’umwaka ari nako bizagenda.’’

Minisitiri Gatete yavuze kubera ingaruka ziterwa n’ubukungu bw’ibihugu bikize bwamanutse, muri aka karere ka Afurika biteganywa ko ubukungu buzazamukaho 1.4%, ariko u Rwanda bukazamukaho 6%.

Redifer yavuze ko mu nguzanyo y’ingoboka ya miliyoni $204 IMF yemereye u Rwanda, muri Kamena batanze miliyoni $100, nyuma y’iri suzuma IMF ikazarekura miliyoni $50, nyuma hakazakorwa andi masuzuma abiri, nyuma ya buri rimwe hakazagenda harekurwa miliyoni $25, ku buryo yose azaba yatanzwe mu mpera za 2017.

Ibiciro ku isoko birazamuka

Laure Redifer yavuze ko ibiciro ku isoko byazamutseho 6% ahanini bitewe n’izamuka ry’ibiciro by’ibiribwa, ndetse ku rwego ruringaniye, hazaho n’ingaruka z’ibiciro by’ibitumizwa mu mahanga ku biciro biri hejuru kandi ifaranga ry’u Rwanda ryataye agaciro.

Ati “Turakomeza kubara izamuka ry’ibiciro rya 6% kugeza mu mpera z’uyu mwaka. Ndatekereza ko icyakorwa, hari ibiterwa n’ibintu umuntu adashobora kugenzura nk’ikirere, cyangwa bigaterwa n’ibiciro byo gutumiza ibintu mu mahanga, no guta agaciro k’ifaranga.’’

“Ni ibintu birenze uko Banki Nkuru ishorora kugenzura izamuka ry’ibiciro. Gusa nka guverinoma iri gushaka uburyo yagabanya guhungabanywa n’ingaruka z’ikirere, nk’urugero uburyo bwo kuzigama ibiribwa, hakanategurwa uburyo bwo kuhira mu gihe nta mvura ihari.’’

Minisitiri Gatete yavuze ko hari ubuyro butandukanye bwo guhangana n’iki kibazo binyuze mu kuhira ubuso buto n’ubunini, ariko ko izamuka ry’ibiciro rya 6% ritaraba ikibazo cyane, kuko ibintu bitangira kuba bibi iyo ryageze hejuru ya 10%.

Umuyobozi wa IMF mu Rwanda, Laure Redifer, ari nawe wari uyoboye iri tsinda, yavuze ko ibipimo bigaragaza ko ubukungu bw’u Rwanda buzazamuka kuri 6% muri uyu mwaka
Minisitiri w'Imari n'Igenamigambi Amb. Gatete Claver
Itsinda rya IMF nyuma y'ibiganiro na guverinoma y'u Rwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved