IMF yishimiye uko ubukungu bw’u Rwanda buhagaze

Yanditswe na Mathias Hitimana
Kuya 2 Ukwakira 2018 saa 04:55
Yasuwe :
0 0

Ikigega Mpuzamahanga cy’Imari (IMF) cyashimye uko ubukungu bw’u Rwanda buhagaze, kivuga ko cyizeye ko n’intego rufite ko buzazamukaho muri mwaka izagerwaho.

Itsinda rya IMF rimaze ibyumweru bibiri mu Rwanda riyobowe na Laure Redifer, ryatangaje kuri uyu wa Kabiri ko mu isuzuma ryakoze ryasanze ubukungu bw’u Rwanda bumeze neza.

Laure Redife yagize ati “Twabonye ko ubukungu bwazamutse ku kigero cya 8.6 % mu mezi atandatu ya mbere ya 2018, biri mu cyerekezo cy’uko ubukungu buzazamukaho 7.2 % muri uyu mwaka.”

Minisiteri y’Imari n’Igenamigambi yateganyije ko ubukungu muri uyu mwaka, buzazamukaho 7.2%. Iyi Minisiteri ivuga ko hari icyizere ugendeye ko mu gihembwe cya mbere umusaruro mbumbe wari wazamutse ku rugero rwa 10.6%, ubu ukaba wazamutse kuri 6.7%.

Redife yanagaragaje ko IMF yishimiye ko izamuka ry’ibiciro ku isoko ryabaye rito, bigaragaza ko muri uyu mwaka rizaba riri kuri 2.8 %.

Yanashimye ko Banki y’igihugu yakomeje politiki yayo y’ifaranga kugeza muri Nzeri, bikagaragaza ko mu 2018 guta agaciro kwaryo bitazarenga 5.4%.

IMF yari mu isuzuma rya gahunda igamije izamuka ry’ubukungu n’imari yumvikanyeho n’u Rwanda mu 2013, ikazarangira mu Ukuboza 2018.

Minisitiri w’Imari n’Igenamigambi, Dr Ndigijimana Uzziel, yagize ati “Banasubiye inyuma mu myaka itanu yose tumaze muri iyi gahunda, bigaragara ko intego zose twari twarihaye zijyanye n’imicungire y’ubukungu bw’igihugu, ndetse n’icyerekezo cy’imyaka nk’itatu, bigaragara ko ubukungu bw’u Rwanda buzakomeza kuzamuka.”

IMF yagaragaje ko ubukungu bw’u Rwanda buzakomeza gutera imbere hashingiwe ku izamuka ry’ubukungu mu rwego rw’ubuhinzi, urw’inganda n’urwa serivisi.

IMF yakomeje ivuga ko ikinyuranyo cy’ibyoherezwa mu mahanga n’ibyo igihugu gitumiza cyakomeje kuba gito.

Biteganyijwe ko iri tsinda rya IMF rizagaruka mu Rwanda mu ntangiriro za Mutarama 2019, hakaganirwa kuri gahunda z’icyerecyezo kiri imbere.

Ubukungu bw'u Rwanda bukomeje gutera imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza