Imishinga 10 ya mbere minini u Rwanda ruhanze amaso iri gushorwamo akayabo

Yanditswe na Rabbi Malo Umucunguzi
Kuya 11 Nyakanga 2017 saa 10:00
Yasuwe :
3 1

Uko u Rwanda rukomeza kuza imbere mu korohereza abashaka gukora ubucuruzi ni nako bari kuruyoboka bagashora ayabo nta nkomyi, bigakorwa icyizere ari cyose ko imari yabo izagaruka nta kabuza.

Si n’igitangaza kuko Kigali Convention Centre abantu bibazagaho yuzuye igatwara miliyoni $300, ikaba kimwe mu bimenyetso ko nta kidashoboka hari ubushake, ubu indi mishinga iyigwa mu ntege kimwe n’iyirengeje ishoramari ikaba iri gushinga imizi.

Ikigo cy’Igihugu cy’Iterambere, RDB, kigaragaza ko nibura kugeza ku wa 30 Kamena, mu mishinga minini yashoboraga gutangira isaha iyo ariyo yose kimwe n’iri gukorwa, 33 yonyine yihariye ishoramari rya miliyari $1055.

Iri mu nzego zitandukanye ariko imyinshi ni mu bwubatsi aho ingana na 54%; ubukerarugendo bufitemo 12%, ubuhinzi ni 9%, serivisi zigize 8%, ubucukuzi bw’amabuye y’agaciro bwo ni 7%, gukora ibintu mu nganda ni 5% naho amazi n’amashanyarazi ni 4%.

1. Ikibuga Mpuzamahanga cy’Indege cya Bugesera

Uyu niwo mushinga u Rwanda rufite uyu munsi wihariye ishoramari rinini ringana na miliyoni $418, ku buryo ungana na 40% by’igiciro cy’imishinga minini iri gukorwa uyu munsi.

Uri gukorwa n’Ikigo Mota Engil Africa gikomoka muri Portugal ku bufatanye na Aviation, Travel and Logistics Limited (ATL Ltd), ikigo gishinzwe ibikorwa by’indege mu Rwanda.

Biteganywa ko icyo kibuga cy’indege kizuzura bitarenze Ukuboza 2018, kikazaba cyakira abantu miliyoni 1.7 ku mwaka. Nyuma kizagurwa cyakire abantu miliyoni 4.5 ku mwaka, icyo gihe kikazaba kimaze gutwara asaga miliyoni $800.

Ikibuga Mpuzamahanga cy’Indege cya Bugesera, ni wo mushinga u Rwanda rufite uyu munsi wihariye ishoramari rinini ringana na miliyoni $418

2. Uruganda rw’inyongeramusaruro rwa OCP

Nyuma y’urugendo rw’amateka umwami wa Maroc aheruka kugirira mu Rwanda, ibigo byo muri icyo gihugu byagaragaje inyota yo gushora imari yabyo mu Rwanda.

Office Cherifien des Phosphates (OCP) kiri mu bya mbere mu kohereza mu mahanga inyongeramusaruro ya phosphate gishaka kubaka uruganda rw’inyongeramusaruro ziberanye n’ubutaka bw’u Rwanda, ruzatwara miliyoni $37. Nibura mu mpera z’umwaka utaha ruzaba rwatangiye.

3. Uruganda rw’Icyayi rwa Unilever

Ni ikigo gikomeye cyane cyo mu Bwongereza, Unilever, gishaka gushora imari mu gutunganya icyayi mu Rwanda kikazatangirana miliyoni $18.

Mu mwaka ushize nibwo Guverinoma y’u Rwanda yasinyanye amasezerano n’ikigo Unilever Tea Rwanda limited ngo gitunganye ahantu habiri hava icyayi mu karere ka Nyaruguru, i Kibeho no ku Munini.

Hazubakwa n’uruganda rutunganya icyayi cy’umukara no gufasha abahinzi b’icyayi muri Nyaruguru, igikorwa cyitezweho gutanga imirimo 2000 na hegitari 4000 zihinzeho icyayi.

4. Uruganda rw’Imiti rwa Cooper Pharma

Ku nshuro ya mbere u Rwanda rushobora kugira uruganda rukora imiti nyuma y’imyaka myinshi ruyitumiza mu mahanga.

Cooper Pharma ni ikindi kigo cyo muri Maroc gishaka kubaka uruganda kigatangiza miliyoni $10, Guverinoma y’u Rwanda ikazatanga ikibanza mu gice cyahariwe inganda cya Kigali, Kigali Special Economic Zone.

Rushobora gutangira ibikorwa mu mpera z’uyu mwaka, ku buryo mu ntangiro z’umwaka utaha imirimo izaba ifite aho igeze.

5. Oshen Health Care mu bitaro byitiriwe Umwami Faisal

Muri Gashyantare uyu mwaka nibwo Guverinoma y’u Rwanda yashyikirije ibitaro byitiriwe Umwami Faisal ikigo Oshen Health Care Rwanda Ltd, kugira ngo gitangire kubicunga mu buryo buhoraho.

Iki kigo gishamikiye kuri Oshen Group cyihaye intego yo guhindura ibitaro byitiriwe Umwami Faisal ibitaro bigezweho, kikazashoramo miliyoni $24.

6. Palmerae Development Group igiye kubaka inzu i Ndera

Guverinoma y’u Rwanda ibinyujije muri Banki itsura Amajyambere y’u Rwanda, BRD, iheruka gusinya amasezerano n’ikigo cyo muri Maroc, Palmerae Development Group yo kubaka inzu 5000 ziciriritse zo guturamo.

Ni inzu zizubakwa kuri hegitari 20 ziherereye mu Murenge wa Ndera, mu Karere ka Gasabo, ku ikubitiro hakazubakwa icyiciro cya mbere kigizwe n’inzu 2000. Uwo mushinga uzatwara miliyoni 68 z’amadolari ya Amerika.

7. Inzu ya ba mukerarugendo izubakwa na Singita

Singita, ikigo gikomeye mu bukerarugendo kirashaka no gushora imari mu Rwanda cyubaka inzu igezweho igenewe ba mukerarugendo, (high end eco lodge) ku ishoramari rya miliyoni $20.

Singita ishora imari mu bukerarugendo guhera mu 1993, ikaba ifite inzu z’ubukerarugendo 12 muri Afurika y’Epfo, Tanzania na Zimbabwe.

Umuyobozi Ushinzwe Ibikorwa muri Singita, Mark Witney, avuga ko intego ari uko bakubaka inzu nk’izo izajya ifasha abajya gusura ingagi muri Pariki y’Igihugu y’Ibirunga, uwo mushinga ukazaba watangiye gukora mu 2019.

Singita, ikigo gikomeye mu bukerarugendo kirashaka no gushora imari mu Rwanda cyubaka inzu igezweho igenewe ba mukerarugendo

8. Miliyoni $40 za Attijariwafa bank muri Cogebanque

Ibigo byo muri Maroc byinshi byabengutswe urubuga rw’ishoramari mu Rwanda, Attijariwafa Bank yo ikaba ishaka gufata imigabane muri Cogebanque, ikanashoramo miliyoni $41.

9. Fair Construction igiye kwinjira mu mabuye y’agaciro

Ikigo Fair Construction kimenyerewe mu mirimo y’ubwubatsi mu Rwanda kuva mu 1995, kigiye kwinjira no mu bucukuzi bw’amabuye y’agaciro aho hari ibirombe gishaka kugura.

Iki kigo cyifuza gushora imari ingana na miliyoni $30 mu bucukuzi bw’amabuye y’agaciro mu Rwanda.

10. Abashormari b’i Dubai bagiye kubaka Kigali Logistics Platform

Muri Mutarama 2016 nibwo Minisiteri ishinzwe ubucuruzi yasinyanye amasezerano n’ikigo Dubai Port World yo kubaka ahazajya hahurizwa ibicuruzwa mbere yo gukwirakwizwa mu gihugu, Kigali Logistics Platform (KLP).

Ni igice cyagereranywa n’icyambu cyo ku nyanja, kigatangirwamo serivisi nko gukurikirana imizigo itumizwa mu mahanga, kwishyura imisoro, amabanki, ikoranabuhanga n’ibindi, amakamyo akazabasha kujya akora inshuro nyinshi mu kwezi.

Icyo kigo kizubakwa ku butaka bwa hegitari zigera kuri 13 ziri i Masaka mu mujyi wa Kigali, ishoramari ry’ibanze rikazaba miliyoni $ 20.

Ubwo Maroc yasinyanaga n'u Rwanda amasezerano yo kubaka uruganda rw’inyongeramusaruro rwa OCP

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza