Leta irateganya kugabanya inyungu ku nguzanyo y’ubwubatsi ikagera ku 10%

Yanditswe na Mukaneza M.Ange
Kuya 2 Kamena 2017 saa 09:31
Yasuwe :
0 0

Minisiteri y’Ibikorwaremezo, MININFRA, yatangaje ko Ikigega kigenewe gutera inkunga imishinga y’inyubako ziciriritse mu Rwanda, cyitezweho kugabanya inyungu yatangwaga ku nguzanyo z’ubwubatsi kugera ku 10%.

Ibi byatangarijwe mu nama yahuje Minisitiri w’Ibikorwaremezo, James Musoni, abashoramari mu bwubatsi, ibigo bitanga inguzanyo z’ubwubatsi n’abandi.

Iki kigega biteganyijwe ko kizatangirana n’ingengo y’imari y’umwaka utaha, ku ikubitiro kizashyirwamo miliyoni 200 z’amadorali, ariko intego ihari ikaba ari ugushyiramo miliyoni 250$.

Minisitiri Musoni yavuze ko iki kigega, kimwe n’ibindi bikorwa birimo gusubiza abashoramari amafaranga baba barashyize mu kubaka ibikorwaremezo no kugabanyirizwa umusoro ku nyungu bizagira uruhare mu gutuma ikiguzi cy’inzu ziciriritse kigabanuka kugeza kuri 50%.

Ati “Muri iyi ngengo y’imari igiye gutangira mu kwezi gutaha, leta irateganya gushyiraho ikigega gifasha kuguriza abantu bari kubaka inzu ziciriritse kandi inyungu kuri ayo mafaranga ikaba ari nke, noneho agahabwa amabanki nayo agashobora gutanga inguzanyo ziciriritse.”

Umuyobozi Mukuru wa Banki Itsura Amajyambere (BRD) ari nayo izagenzura iki kigega, Kanyankole Alexis, yatangaje ko 60% by’amafaranga yacyo azajya agurizwa abashoramari bifuza gushora imari mu bwubatsi bw’inzu ziciriritse, mu gihe 40% azajya agenererwa abifuza kuzigura cyangwa kuzikodesha kugeza bazegukanye.

Yakomeje avuga ko bitewe n’uko inzu zizubakwa zizaba ari nyinshi ndetse na banki zikoroherezwa kubona amafaranga ziguriza abantu, bare kureba uburyo inyungu ku nguzanyo yava kuri 17% yari isanzwe iriho ikagera hagati ya 10-11%.

Umwe mu bashoramari mu bwubatsi, Vincent Sekimondo, yavuze ko yatangiye kubaka akoresheje ubushobozi bwe butari buhagije, ku buryo inzu yayihaga uyikeneye itaruzura neza bagasezerana ko ibisigaye azabyikorera, kuri ubu akaba yakiriye neza ubu bufasha.

Ati “Natinyura bagenzi banjye kuko mu by’ukuri n’isoko ryiza, abakeneye inzu twabonye ko ari benshi, kandi nta gihombo kirimo kuko iyo ukora ikintu ufite n’ukikugurira byumvikane ko amafaranga uyagaruza vuba.”

Ikigo cy’Igihugu gishinzwe imyubakire, RHA, kigaragaza ko mu gihe hakenewe inzu ibihumbi 560 ngo u Rwanda rugere ku ntego rwihaye yo kuba 35% by’Abanyarwanda bazaba batuye mu mijyi mu 2020, kugeza ubu imishinga ihari ni iyo kubaka inzu ibihumbi 30 ziciriritse. Kuri ubu abatuye mu mijyi bangana na 17.3%.

Inzu ziciriritse ni izigenewe abantu binjiza amafaranga ari hagati y’ibihumbi 50 na 900 y’u Rwanda buri kwezi. Inzu zivugwa zigomba kuba zigizwe n’ibyumba bitarenze bitatu kandi zifite agaciro katari hejuru ya miliyoni 30 Frw. Ikindi ni uko inzu iciriritse ari iyo umuntu yagakwiye gukodesha amafaranga atarenze 30% by’ayo yinjiza buri kwezi.

Ikigo cy’Igihugu gishinzwe imyubakire, RHA, kigaragaza ko mu gihe hakenewe inzu ibihumbi 560 ngo u Rwanda rugere ku ntego rwihaye yo kuba 35% by’Abanyarwanda bazaba batuye mu mijyi mu 2020
Kugeza ubu imishinga ihari ni iyo kubaka inzu ibihumbi 30 ziciriritse
Minisitiri w’Ibikorwaremezo, James Musoni, yatangaje ko hari byinshi leta ikomeje gushyiramo imbaraga mu gukemura imbogamizi ziri mu kubaka amacumbi aciriritse
Umuyobozi mukuru wa BRD, Kanyankole Alexis
Abantu bafite aho bahuriye n'imyubakire, ibigo bitanga inguzanyo n’abandi bari bitabiriye iyi nama

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza