Ubukungu bw’u Rwanda bwazamutseho 4% mu gihembwe cya kabiri cya 2017

Yanditswe na Mathias Hitimana
Kuya 25 Nzeri 2017 saa 10:53
Yasuwe :
0 0

Ikigo cy’Igihugu cy’Ibarurishamibare cyatangaje ku wa 25 Nzeri 2017 ko ubukungu bw’u Rwanda bwazamutseho 4% mu gihembwe cya kabiri cy’umwaka wa wa 2017.

Umuyobozi w’Ikigo cy’Igihugu cy’Ibarurishamibare, Yusuf Murangwa, yatangaje ko mu gihembwe nk’iki cy’umwaka ushize umusaruro mbumbe w’u Rwanda wari kuri miliyari 1636 z’amafaranga y’u Rwanda ubu ukaba warageze kuri miliyari 1869 Frw.

Yasobanuye ko umusaruro w’ubuhinzi wazamutse ku kigero cya 6%, uw’inganda (1%) naho uw’uwa za serivise uzamuka ku kigero cya 7%.

Yasobanuye ko umusaruro w’ubuhinzi wazamutse bitewe ahanini n’impamvu ebyiri, ati “Icya mbere nk’uko byari bimeze no mu gihembwe gishize, umusaruro w’igihembwe cya mbere cy’ihinga wari mwiza wari kuri 4%. Ikindi twabonye mu gihembwe cya kabiri bitandukanye n’uko byari bimeze mu cya mbere, umusaruro ku byoherezwa mu mahanga wabaye mwiza, aho uw’ikawa wazamutseho 28%, uw’icyayi wiyongeraho 8%.”

Ku byerekeye umusaruro w’inganda utarazamutse cyane, Murangwa yavuzeko byatewe ahanini n’ibikorwa byo kwibuka byagabanutseho 4% ugereranyije n’imirimo y’ubwubatsi yakorwaga umwaka ushize.

Naho kuri serivise, Murangwa yavuze ko umusaruro ukomeza gutumbagira bishingiye ku iterambere ry’inzego zitandukanye zirimo iz’urwego rw’ubukerarugendo bushingiye ku kwakira inama zitandukanye.

Minisitiri w’Imari n’Igenamigambi, Amb. Claver Gatete, yashimangiye ko mu bihe biri imbere nta bibazo bihari bizatuma ubukungu budakomeza kuzamuka.

Yakomoje ku mishinga minini y’ubwubatsi yatangiye irimo y’ubwubatsi bw’ikibuga cy’indege cya Bugesera; umuhanda Kagitumba - Rusumo; Nyagatare - Base n’indi minini y’ubwubatsi iteganyijwe iri mu bizakomeza kuzamura ubukungu.

Mu bindi, Amb. Gatete avuga ko muri iki gihe ari bwo hagiye kuboneka inyungu yo guca intege caguwa, kuko mu mezi yabanje y’uyu mwaka hari caguwa nyinshi yari yarinjijwe mbere yo kuyongerera imisoro ariko ubu hakaba hinjira nke.

Ku bijyanye no guca intege caguwa, Minisitiri w’Imari n’Igenamigambi yanze kugira byinshi abwira itangazamakuru ku biganiro u Rwanda rurimo na Leta Zunze Ubumwe za Amerika nyuma yo gutangaza ko hari ibihano Amerika ishobora kurufatira kubera kubangamira caguwa.

Yagize ati “Turi mu biganiro na Leta Zunze Ubumwe za Amerika kuko bo baravuga ko ibi byo kugira ngo twongeze imisoro byababangamiye … ni ibiganiro bigikomeza ntabwo ari ibiganiro birarangira, nibirangira tuzabagezaho umwanzuro.”

Yavuze ariko ko hasobanurwa ko guca intege caguwa ari uguteza imbere inganda z’imbere mu gihugu, byongeye kandi n’iby’inganda zo mu mahanga bikaba bitakozweho bigakomeza kwinjira. Gatete akagaragaza ko nta ruganda rukora caguwa babangamiye.

Amerika ivuga ko umwanzuro w’ibihugu bigize Umuryango wa Afurika y’Iburasirazuba (EAC) wo guca intege itumizwa ry’imyenda n’inkweto byambawe, uri guteza ikibazo gikomeye cy’ubukungu mu bucuruzi bw’imyenda yambawe muri Amerika; Ibi bikaba bibangamiye amasezerano y’ubufatanye bwa Amerika na Afurika yo munsi y’ubutayu bwa Sahara, AGOA.

Umuyobozi w'Ikigo cy'Igihugu cy'Ibarurishamibare, NISR, Yusuf Murangwa
Minisitiri w’imari n’igenamigambi, Amb. Gatete

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza