Banze guheranwa n’agahinda bahitamo kwiteza imbere

Banze guheranwa n’agahinda bahitamo kwiteza imbere


Yanditswe kuya 15-01-2013 - Saa 09:11' na Umurerwa Emma-Marie

Abapfakazi bibumbiye muri koperative “Amahoro ava hejuru”, bamaze kugera ku rwego rushimishije babikesha umwuga w’ubudozi.

Iyi koperative ikorera mu Murenge wa Gikondo mu Karere ka Kicukiro, igizwe n’abanyamuryango icyenda.

N’ubwo bahuye n’ibyago byatumye baba abapfakazi, ngo banze guheranwa n’agahinda bahitamo guhurira hamwe bagamije kwiyubakamo icyizere cy’ejo hazaza.

Abagize iyi koperative ni abakirisitu, ari na yo nkomoko y’izina ryabo ”Amahoro ava Hejuru”.

Umuyobozi wayo Nyirabarinda Grace, yadutangarije ko batangiye badoda ibintu byoroheje kubera ikibazo cy’amikoro bari bafite nta n’isoko rifatika bafite; buhoro buhoro bagenda bamenyekana haba mu Rwanda no mu mahanga.

Nyirabarinda ati ”Nta mushara dufite, ku kwezi iyo abakiriya babaye bake umuntu abona ibihumbi 70; baba babaye benshi akarenga. Uretse kuba duteza imbere imiryango yacu, duteza n’igihugu cyacu imbere kuko dutanga umusoro kandi tuwutanga tubyishimiye.”

Umugabane fatizo bahereyeho ni ibihumbi 300 by’amafaranga y’u Rwanda, bakaba bageze ku mugabane wa miliyoni eshanu. Ubu baguze inzu bakoreramo, babasha no kwiteza imbere mu buryo butandukanye.

Uwitwa Uwimana, ni umwe mu banyamuryango. Ati ”Ntaragera muri iyi koperative nari mu bwigunge mfite ibibazo byinshi n’ubukene. Sinagiraga aho kuba, ariko ubu mfite inzu yanjye mu mujyi wa Kigali, abana banjye bariga nta kibazo cy’imibereho mfite.”

Abagize iyi koperative batanga inama ko nta muntu ukwiye gusuzugura umwuga akora, ko ahubwo abantu bakora umwuga umwe bakwiye kwishyira hamwe bagahuza imbaraga kugira ngo ibyo bakora bigire umusaruro ufatika.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO