Hakenewe Megawati 563 muri EDPRS2

Hakenewe Megawati 563 muri EDPRS2


Yanditswe kuya 2-04-2013 - Saa 08:59' na Ange de la Victoire Dusabemungu

Mu gihe u Rwanda rwari rwiyemeje ko mu mwaka wa 2017 rwaba rubasha kubona amashanyarazi angana na Megawati 1000, kuri ubu Minisitiri w’ibikorwa remezo Prof. Silas Lwakabamba aratangaza ko rwihaye intego yo kubona Megawati 563 kugira ngo Gahunda Mbaturabukungu mu kurwanya ubukene (EDPRS2) igerweho.

Mu kiganiro n’abanyamakuru cyabereye muri Primature ku wa 1 Mata 2013, Prof. Lwakabamba, Minisitiri w’ibikorwa remezo yatangaje ko ikibazo cy’amashanyarazi ari kimwe mu byibanzweho mu mwiherero wa 10 w’abayobozi wabereye mu karere ka Gatsibo, aho byagaragaye ko kugira ngo icyo kibazo gikemuke byaba byiza abikorera bashoye imari mu bikorwa bijyanye n’ingufu z’amashanyarazi.

Biteganyijwe kandi ko hari uburyo bwinshi buzakoreshwa kugira ngo haboneke izindi ngufu zunganira umuriro w’amashanyarazi, urugero rutangwa akaba ari ingufu zikomoka ku mashyuza, imyanda ishobora kubyazwa ingufu ndetse n’ikoreshwa ry’imirasire y’izuba.

Lwakabamba avuga kandi ko muri Kamena 2013 ku ngufu u Rwanda rusanganwe haziyongeraho Megawati 80.

Ku rundi ruhande ariko, umuyobozi mukuru w’ikigo cy’igihugu gishinzwe iterambere (RDB) Clare Akamanzi atangaza ko hari abashoramari batandukanye bamaze kwiyandikisha kugira ngo batange umusanzu mu iboneka ry’ingufu z’amashanyarazi.

Akamanzi akomeza atangaza ko hari imishinga iri gukorwa harimo uwa KivuWatt uzatanga ingufu zingana na Megawati 100 ariko mu mpera z’umwaka wa 2013, hakazaba hamaze kuboneka Megawati 25.

N’ubwo amashanyarazi yari yitezwe ashobora kuzagabanuka, Minisitiri w’imari n’igenamigambi Ambasaderi Claver Gatete avuga ko hari n’izindi mbogamizi zishobora kuzavuka mu itangwa ry’amashanyarazi, ahanini zishobora kuzaturuka ku miturire itari myiza, aho usanga hari abantu batuye ku buryo kubagezaho amashanyarazi byahenda Leta.

Abaturage bakaba basabwa gutura mu midugudu kugira ngo bazabashe kugezwaho amashanyarazi n’ibindi bikorwa remezo ku buryo butagoranye.

Nk’uko bigaragara muri Gahunda ya Guverinoma 2010-2017, u Rwanda rwihaye intego y’uko mu mwaka wa 2017 abakoresha umuriro w’amashanyarazi bazaba bageze kuri 50%.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO