Imyuga ishingiye ku bumenyi-ngiro iteza imbere abayitabiriye

Imyuga ishingiye ku bumenyi-ngiro iteza imbere abayitabiriye


Yanditswe kuya 29-12-2012 - Saa 09:37' na Umurerwa Emma-Marie

Ishuri ryigisha ibijyane n’ubwiza ryitwa Belasi Saloon school, rikorera mu Karere ka Kicukiro, hafi ya Hotel Alpha Palace, ryigisha ibijyanye no kwita ku bwiza bw’umubiri, rigamije gutanga ubumenyi ngiro ryibanda ku gutanga ubwiza ku mubiri, ryiyemeje gushyigikira gahunda ya Leta, yo guhanga umurimo.

Mukayiranga Fanny wize ibijyanye no kwita ku bwiza mu gihugu cy’u Bubiligi, arangije kwiga yihaye intego yo gusangira ubumenyi n’abanywanda b’ingeri zitandukanye mu rwego rwo guteza imbere igihugu.

Mukayiranga Fanny, umuyobozi wa Belasi Saloon School, wagize igitekerezo cyo gushinga iri shuri, atangaza ko yari agamije gusangira n’abandi ubumenyi yahawe.

Yatangiye kwigisha wenyine, akabifatanya no kwakira abakiliya bamugana, abo yigishije ku ikubito bamaze kubimenya bamwe muri bo bashinze Saloon zabo, abandi yabahaye akazi bamufasha kwigisha.

Mukayiranga ati ”Ndangije kwiga nahise niha intego yo gusangira n’Abanyarwanda ubumenyi nahawe, numva ari wo musanzu natanga wo gufasha abantu bose babyifuza kubona ubumenyingiro bw’ibanze bwabafasha kwiteza imbere.”

Umwe mu barangije muri Belasi Saloon School, Umwari Anitha, yatangarije IGIHE ko amaze amezi umunani arangije kwiga, akaba yarabashije kwifungurira Saloon ye itunganya imisatsi.

Kayitesi Asia twamusanze kuri Belasi yaje kwiga ibijyanye no gutunganya imisatsi yagize ati ”maze igihe kingana n’amezi atatu niga, ariko natangiye kumenya gusuka inweri, hari n’igihe mbona abakiliya iyo mvuye kwiga.”

Mukayiranga yahawe inkunga n’Ikigo cy’igihugu gishinzwe guteza imbere ubumenyi ngiro (WDA), isaga Miliyoni 24 z’amafaranga y’u Rwanda, izamufasha kugura ibikoresho by’ingenzi bigezweho, byifashishwa mu kwigisha abijyanye n’ubwiza.

Ku bijyanye na Salon na Sauna, Mukayiranga agira ati “N’ubwo mu Rwanda haboneka salo na sauna ku bwinshi haracyari inzitizi, kuko ababikora akenshi usanga nta bumenyi babifitemo bityo bigakorwa nabi,”

Yakomeje avuga ko Salon zo mu Rwanda ziri ku rwego rwo hasi ugereranyije n’izo mu bihugu byateye imbere, cyane cyane mu gutanga serivisi.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO