Inkunga zikomeje guhagarara bikarenza uyu mwaka byagira ingaruka ku bukungu

Inkunga zikomeje guhagarara bikarenza uyu mwaka byagira ingaruka ku bukungu


Yanditswe kuya 5-11-2012 - Saa 07:53' na Izuba Rirashe

Mu kiganiro yagiranye n’Ibiro Ntaramakuru by’Abongereza “Reuters”, Minisitiri w’Imari n’Igenamigambi, John Rwangombwa yatangaje ko icyemezo cy’ihagarikwa ry’agateganyo ry’inkunga ibihugu bimwe byagiye bifatira u Rwanda kuri ubu nta kibazo riteye ubukungu bw’igihugu, ko ariko rikomeje gutinda rikageza mu mwaka utaha wa 2013 ingaruka zatangira kugaragara.

Ibihugu nka Leta Zunze Ubumwe za Amerika, Sweden n’u Buholandi byose byahagaritse inkunga byageneraga u Rwanda, mu gihe kandi 40% by’amafaranga u Rwanda rwakoreshaga mu ngengo y’imari yavaga mu baterankunga.

Aha, Minisitiri Rwangombwa yagize ati “Turatekereza ko kugeza mu mpera z’uyu mwaka nta kibazo kizagarara kuko twamaze gukemura icyo kibazo cy’abaterankunga. Biramutse bidakomeje ngo birenze ukwezi kw’Ukuboza nta ngaruka byadutera, cyereka gusa inkunga zikomeje kubura kugeza umwaka utaha ni bwo byatangira kuduteza ibibazo.”

Rwangombwa yakomeje agira ati “Bishobora kuzagabanya umuvuduko w’ubukungu bwacu kuko Guverinoma na yo ari imwe mu bigize ubukungu. Buriya bizaterwa n’igihe iryo hagarikwa rizamara.”

Minisitiri akaba ariko atigeze avuga imibare iteganijwe ko ubukungu bwazagabanyukaho mu gihe inkunga zaba zikomeje guhagarara.

Banki Nkuru y’Igihugu (BNR) yavuze ko ubukungu (economic growth) buzazamuka ku gipimo cya 7.87 ku ijana uyu mwaka, umusaruro (GDP) ukazamukaho 9.4 ku ijana mu mwaka w’ubucuruzi urangirana n’ukwezi kwa Kamena buvuye kuri 7.4 ku ijana mu mwaka ushize, ibyo ngo bikazaterwa n’iterambere riteganyijwe mu nzego zose.

U Rwanda ni cyo gihugu cyonyine cyo munsi y’ubutayu bwa Sahara kitagize ihungabana rikabije ry’ifaranga nk’ibindi bihugu by’ibituranyi byacyo nka Uganda, gusa ikibazo rufite akaba ari uko gikenera amafaranga menshi ava mu baterankunga aho yageraga kuri 40 ku ijana by’ingengo y’imari.

Kuri icyo kibazo, Minisitiri Rwangombwa yavuze ko barimo gukorana na Banki y’Isi ndetse na Banki Nyafurika Itsura Amajyambere, kugira ngo bagerageze gusobanurira abaterankunga uburyo ikibazo cyifashe, kandi yongeraho ko bateganya ko mu gihe cy’imyaka itanu iri imbere, ingengo y’imari izajya iba igizwe n’amafaranga aturuka imbere mu gihugu gusa.

Mu myaka itanu ishize, mu Rwanda inkunga zabaga zigize 63 ku ijana by’ingengo y’imari kandi n’ubwo umubare nyawo w’amafaranga ava mu baterankunga (nominal value) wakomeje kwiyongera, uruhare rwayo mu ingengo y’imari rwo rwaragabanutse rugera kuri 40 ku ijana.

Rwangombwa akaba yavuze ko niba u Rwanda rwarashoboye kugabanya uruhare rw’inkunga ku kigereranyo cya 23 ku ijana mu myaka itanu, ibyo rwabashije kugeraho mu kuzamura ubukungu ndetse n’ibigo bitagengwa na Leta, bitanga icyizere ko bizatuma umusaruro uva mu misoro wiyongera.

Akomeza agira ati “Niba ubucukuzi bw’amabuye y’agaciro bugenze neza, bizadufasha kandi bizadushimisha, ariko n’ubundi aho twizera kuzakura umusaruro ni mu misoro.”

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO