Leta y’u Bubiligi yoroje abaturage amatungo magufi ya miliyoni eshanu z’amayero

Leta y’u Bubiligi yoroje abaturage amatungo magufi ya miliyoni eshanu z’amayero


Yanditswe kuya 24-01-2013 - Saa 08:36' na Marie Chantal Nyirabera

Leta y’u Bubiligi ibinyujije mu mushinga CTB yateye inkunga y’amayero miliyoni eshanu, ( asaga hafi miliyari enye y’amafaranga y’u Rwanda) mu bikorwa byo koroza no kubakira ibiraro abaturage bo mu turere dutanu twari dufite ikibazo cy’imirire mibi mu Rwanda.

Dr Fabrice Ndayisenga, ushinzwe ubworozi bw’amatungo magufi mu Kigo cy’ Igihugu cy’Ubuhinzi (RAB), yadutangarije ko kuva mu 2009 hatoranyijwe Uturere dutanu turimo Nyamagabe, Nyaruguru, Huye, Gisagara na Ngororero twagaragaragamo ibibazo by’imirire mibi tukorozwa amatungo y’ intama, ihene, ingurube n’inkwavu.

Abaturage bahawe amatungo, Ndayisenga avuga ko bituma bivana mu bukene, aho umuhinzi abasha kubona ifumbire, umusarruro ukiyongera, kandi akamuha n’amafaranga agakemura iby’ibanze.

Mu turere twose uko ari dutanu twatewe inkunga, amatungo magufi yageze ku baturage 16,834 ; muri Huye horojwe 3048, i Nyamagabe ni 3024, Gisagara ni 3648, Ngororero ni 2970, naho Nyaruguru horozwa 4144.

Ihene zorojwe ni 7880, ingurube 7894, intama 365 n’ inkwavu 171. Aborojwe ihene bagendaga bahabwaga ebyiri, inkwavu bagahabwa eshanu. Amatungo yose hamwe yooojwe abaturage asaga 23 000.

Muhorakeye Phelomene w’inyaka 45 utuye mu karere ka Huye mu murenge wa Kinazi, umudugudu wa Mukuzanyana, avuga ko ingurube yahawe imaze kubyara inshuro eshatu mu mwaka n’igice, ati « bwambere yabwaguye icyenda(9),kimwe ndakitura noroza abandi, bwa kabiri ibwagura umunani nitura kimwe, bwa gatatu nabwo yabwaguye umunani ubu ziracyari nto ».

Atangaza ko ubworozi bw’ingurube yabivanyemo ifumbire, abonamo imyambaro, binamufasha kuriha ubwisungane mu kwivuza bw’ umuryango we no kubona ibyibanze mu buzima bwa buri munsi.

Muhorakeye Phelomene yishimira ko ubworozi bw'amatungo magufi bwamuzamuye mu bukungu

Kuri uyu muturage ngo ingurube zororoka vuba kandi zigatanga umusaruro n’amafaranga.

Yavuze ko aboroye ingurube bagomba kuzigirira isuku, bakazirinda indwara, zarwara bagashaka veterineri, bityo zigakura neza zikabafasha kwiteza imbere nk’uko nawe yabigezeho abifashijwe na CTB na RAB.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO