Rusizi: Bitarenze 2012-2013 abagurijwe na VUP bagomba kuba barangije kwishyura

Rusizi: Bitarenze 2012-2013 abagurijwe na VUP bagomba kuba barangije kwishyura


Yanditswe kuya 5-02-2013 - Saa 07:36' na Jean Pierre Niyibizi

Abayobozi b’inzego z’ibanze kuva ku kagari kugeza ku murenge, barasabwa gusobanurira abaturage bahawe inguzanyo na gahunda ya VUP kwihutisha gahunda yo kwishyura nyuma y’aho bigaragariye ko abagurijwe batishyura ngo intego z’iyi gahunda mu kurwanya ubukene zikomeze kugerwaho.

Nk’uko byasobanuwe kuri uyu mbere mu Karere ka Rusizi mu nama yahuje abayobozi mu nzego zinyuranye z’umurenge n’akagari ndetse n’abakozi ba VUP mu mirenge ya Nkombo, Bweyeye, Nyakarenzo, Nkungu, Butare na Gikundamvura; ngo imwe muri gahunda z’uyu mushinga iracumbagira kuko abahawe inguzanyo batishyura ngo bityo n’abandi bazikeneye zibagereho.

Abahawe izi nguzanyo ni abashoboye guhanga imishinga mito bagamije kwiteza imbere, gusa nyuma y’igihe cyari giteganyijwe amafaranga bahawe ntibayagaruye ngo ahabwe abandi ari na yo mpamvu Umuyobozi bw’Akarere ka Rusizi Nzeyimana Oscar asaba inzego bireba zose kwegera abaturage bafashe izo nguzanyo bakabakangurira ko bagomba kwishyura vuba kuko igihe bahawe cyo cyamaze kurenga.

Abayobozi mu nzego zitandukanye bafashe ingamba zo kwishyuza bwangu amafaranga ya VUP

Ubwo Umuyobozi w’Akakarere ka Rusizi yagezaga imiterere y’iki kibazo ku bari muri iyi nama kimwe n’ingaruka zacyo ku bahawe inguzanyo baba batazishyuye, yagaragaje ko izo ngaruka ari uko abandi baturage bagomba kugerwaho na zo kugira ngo biteze imbere bitaba gishobotse; nyamara ngo abazihawe ntibishyure igisigaye ni ukubishyuza ku ngufu cyangwa ibyabo bigatezwa cyamunara.

Abanyamabanga Nshingwabikorwa kuva b’utugari n’imirenge VUP ikoreramo muri aka karere bavuga ko hari intambwe VUP yagejeje ku baturage, ku buryo batakwihanganira uwo ari we wese washaka kuzitira icyo cyerekezo cyo gutsinda ubukene.

Ngo bagiye kwishyuza abo bireba bose. Kugeza ubu inguzanyo zatanzwe zigera kuri Miriyoni 192, ariko izimaze kwishyurwa ni miliyoni 30, icyakora abo bireba bafashe ingamba ko umwaka w’ingengo y’imari wa 2012-2013 ugomba kurangira asigaye na yo yishyuwe.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO