Rwamagana : Kirabiranya yanize umusaruro w’urutoki

Rwamagana : Kirabiranya yanize umusaruro w’urutoki


Yanditswe kuya 29-12-2012 - Saa 14:33' na Marie Chantal Nyirabera

Mu gihugu hose ahagaragaye indwara ya kirabiranya yagize ingaruka ku musaruro waturukaga ku rutoki. Hamwe na hamwe aho insina zatemwe nta bitoki nta n’ibinyobwa bikomoka ku nsina bihari. Igiciro cy’igitoki ku masoko yo hirya no hino mu Rwanda cyarazamutse.

Mu Ntara y’Uburasirazuba ni hamwe mu habonekaga umusaruro uhagije w’ibitoki wajyanwaga ku masoko yo mu gihugu.

Mu mirenge ya Munyaga, Kigabiro, Rubona, Muhazi na Mwurire mu karere ka Rwamagana, hava ibitoki byinshi bigemurwa ku masoko ya Rwamagana no mu mujyi wa Kigali, hamwe na hamwe hatangiye kugaragara iyo ndwara.

Ushinzwe ubuhinzi mu Karere ka Rwamagana, Innocent Ukizuru yatangarije ikinyamakuru cyandika ku buhinzi, ko mu karere ka Rwamagana hasanzwe hari ubuso buhinzeho urutoki bungana na hegitari 14,220 kandi zikaba zisanzwe zeraho amatoni y’ibitoki ibihumbi 112 buri kwezi.

Umuyobozi w’Akarere ka Rwamagana, Uwimana Nehemie, yadutangarije ko indwara yahereye i Karenge ariko ubu ikibazo cyakemutse umusaruro wongeye kuboneka uko bisanzwe. Ubu ngo imirenge imerewe ugaragaramo iyo ndwara ni uwa Muhazi na Munyaga. Yakomeje agira ati "Ubu icyo dukora n’abaturage ni ugukumira, igikorwa tukaba tugifatanya na RAB ngo n’ahandi hadafatwa."

Ibi bitoki ngo byinjirizaga abaturage ba Rwamagana amafaranga asaga miliyari 53 na miliyoni 325 hatabariwemo ibitoki abahinzi bateka iwabo mu ngo. Umusaruro mwinshi w’ibitoki byera i Rwamagana ukagemurwa ku masoko yo mu Mujyi wa Kigali.

Mu mujyi wa Kigali abantu batandukanye batangarije IGIHE igiciro cy’igitoki kigenda kizamuka bitewe n’aho umuntu akiguriye. Mukamana twamusanze agura ibitoki adutangariza ibi : ”Igitoki kirahenze kigura 190Frw mu gihe ibirayi bigura 120 frw, urumva ko ibirayi ari byo dusigaye twigurira, ibitoki byarabuze no kubona ibyiza biragoye.”

Bamwe mu bahinzi bavuga ko aho indwara yafashe urutoki bikaba ngombwa ko barurandura hashira amezi atandatu kugira ngo hahingwe ibindi.

Ibimenyetso bya Kirabiranya mu rutoki ni uko usanga umutumba waraboze, amakoma akaraba, watema umutumba ukavamo amazi asa n’amashyira, ibitoki bikaneka biteze, imbere ugasanga ari imitiri.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO