Amavuta ahindura uruhu aracyagaragara ku isoko

Amavuta ahindura uruhu aracyagaragara ku isoko


Yanditswe kuya 2-04-2013 - Saa 08:00' na Eugenie Umuhoza

Mu bwoko bwinshi bw’amavuta yo kwisiga acuruzwa hirya no hino mu Mujyi wa Kigali, nubwo afite ubumara buhindura uruhu “Hydroquinon” yaciwe ku isoko, hari abayacuruza.

Umwe mu bacuruzi b’amavuta yo kwisiga mu Mujyi wa Kigali rwagati aganira na IGIHE, yagize ati “ Amavuta arimo “Hydroquinone impamvu tuyacuruza kandi bitemewe , ikibazo si icy’abayacuruza ahubwo ni abatuma yinjira ku mupaka kuko natwe tuyarangura yinjiye mu gihugu”.

Abacuruzi bavuga ko usanga ayo mavuta akundwa kandi akagurwa na benshi by’umwihariko igitsina gore.

Umwe mu bakobwa bakunda ayo mavuta agira ingaruka ku ruhu, Uwamariya Therese ati “ Njye impamvu ntayacikaho ni uko atuma umuntu aba inzobe , akagaragara neza bitewe n’uko abyifuza…Yego umuntu ntaba agifite uruhu karemano ariko na none igihe ufite ubushobozi bwo kugira icyo ukora nta mpamvu yo kutiyitaho. Ikindi kandi mwene ayo mavuta agura make, kandi ari menshi akamara igihe kirekire.”

Uwamariya atanga urugero rw’ibiciro by’amavuta ati “ Nka Carolight ifite Hydroquinon igura 2000 akamara nk’amezi atatu, mu gihe Sowhite itakwangiza uruhu igura ibihumbi 10, amavuta meza arahenda.”

Nyamara bamwe mu bakobwa hari abahawe isomo no kwisiga amavuta ahindura uruhu ; umukobwa wanze gutangaza izina rye avuga ko yisize amavuta ahindura uruhu akamwangiza, ati "Hari abirukira ayo mavuta ngo barashaka gucya, ariko yenda nawe wareba ukomeze mu maso, nta gaheri na kamwe kabagamo ariko narayisize none nsigaye mfite isoni iyo nirebye ukuntu nangiritse kandi nari nzi ko ndi gushaka umucyo. Hari abo bihira ariko si bose. "

Ayo mavuta ngo iyo hashize igihe usanga uruhu rwaratangiye kuzana amabara, hamwe ugasanga ni inzobe ahandi ari umukara, cyangwa hamwe ugasanga harababutse.

Aya n'amwe mu mavuta agicuruzwa ku isoko kandi ahindura uruhu

Nzaire Philippe, Umuyobozi w’ishami rishinzwe kugenzura iyubahirizwa ry’amabwiriza y’ubuziranenge muri RBS, yatangaje agira ati ”Mu ngamba dufite zo gukumira ibicuruzwa nk’ ibyo ni ukubanza kubikumira duhereye ku mipaka, tukaba dufite na gahunda y’isuzuma rmu masoko, ibicuruzwa mu buryo bwa magendu aho tubisanze tukabyaka abacuruzi mu rwego rwo kurengera abaguzi”

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO