Abadepite bemeje umushinga w’itegeko rikomeza amavugurura mu bucuruzi

Yanditswe na Cyprien Niyomwungeri
Kuya 8 Gicurasi 2017 saa 07:31
Yasuwe :
0 0

Kuva mu mwaka wa 2005 Leta y’u Rwanda yatangiye amavugurura mu bucuruzi hagamijwe kubuteza imbere no kongera umubare w’abikorera ku giti cyabo, binyuze mu gushyiraho amategeko atandukanye agenga uru rwego.

Ibi byatanze umusaruro kuko abashoramari bariyongereye ndetse raporo zitandukanye za Banki y’Isi zerekana ko u Rwanda ruri mu bihugu bihagaze neza mu koroshya ubucuruzi.

Gusa uko Isi itera imbere ni nako ubucuruzi butera imbere, ariyo mpamvu amategeko yabwo akunda kuvugururwa kugira ngo ajyanishwe n’igihe, bityo ubucuruzi bukorwe neza.

Kuri uyu wa 8 Gicurasi 2017, abadepite bemeje ishingiro ry’umushinga w’itegeko rigenga amasosiyete y’ubucuruzi, mu rwego rwo kuziba icyuho cyagaragaraga mu birebana n’iterambere ryayo no koroshya ubucuruzi kuko byagaragaye ko aho ubucuruzi bushya bugeze hari ingingo itegeko risanzwe ritari rifite.

Mu isobanurampamvu ry’uyu mushinga w’itegeko, Umuyobozi mukuru w’Ikigo cy’igihugu cy’iterambere (RDB), Clare Akamanzi, yasobanuye ko iri tegeko ari inyongera y’izindi gahunda zihari byose bigamije kongera uburyo ubucuruzi bukorwa mu gihugu.

Yagize ati" Kuva dushyiraho itegeko ry’amasosiyete y’ubucuruzi, twagiye tureba uburyo ibintu byahindukaga ku Isi, aho hari amavugurura menshi twakoze. Turashaka kuyashyira hamwe yose kugira ngo abayakenera bayakoreshe neza bitagoranye."

Guhera mu 2009 hamaze kujyaho amategeko icyenda y’ubucuruzi amaze kuvugururwa inshuro eshatu.

Akamanzi yakomeje asobanura ko amategeko yari ariho yakozwe harebwe uko ahandi bikorwa cyane cyane mu bihugu bikize, hakaba haritawe ku masosiyete manini cyane. Ibi ngo byagiraga ingaruka ku masosiyete mato adafite ubushobozi nk’amanini.

Ubusanzwe hari aho amasosiye mato yafatwaga nk’amanini, cyangwa ugasanga hari aho abanyamigabane bato badahabwa ijambo.

Urugero yatanze mu byagoraga amasosiyete mato ni uko yategekwaga kugira umunyamategeko, umugenzuzi (auditor) kandi nta bushobozi bwo kubishyura afite. Ibi bikaba byayagoraga mu mikorere yayo.

Urugero yatanze mu byagoraga amasosiyete mato ni uko yategekwaga kugira umunyamategeko, umugenzuzi (Auditor) kandi nta bushobozi bwo kubishyura afite. Ibi bikaba byayagoraga mu mikorere yayo.

Ku banyamigabane bato bo ntibamenyaga ibikorerwa mu masosiyete y’ubucuruzi kuko nta jwi bagiraga.

Itegeko rishya rizashyiraho uburyo bworohereza ibigo bito n’ibinini kubasha gukora mu buryo buboneye kandi bubibereye.

Depite Karemera Thierry yavuze ko iri tegeko ari ngombwa muri ibi bihe kuko u Rwanda rukomeje kugirana ubufatanye n’ibindi bihugu ndetse rukaninjira mu miryango itandukanye y’ubukungu. Ibi bikazafasha kwagura ishoramari no kugira uburyo bwo gukora ubucuruzi busobanuke.

Yagize ati "Biradufasha kugira ngo dufashe abashoramari bo hanze bifuza gukorera mu Rwanda kubona bahakorera bafite umutekano usesuye ku buryo bw’ubucuruzi."

Uyu mushinga w’itegeko ugiye gusuzumirwa muri komisiyo, uzafasha gukorera mu mucyo, guha ijambo abafite imigabane mike no kunonosora imiyoborere ya sosiyete y’ubucuruzi.

Umuyobozi mukuru w'Ikigo cy'igihugu cy'iterambere (RDB), Clare Akamanzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza