Abanyamahirwe 10 batsindiye amatike y’indege yatanzwe na BK

Yanditswe na Mukaneza M.Ange
Kuya 17 Gashyantare 2017 saa 08:53
Yasuwe : XX
1

Banki ya Kigali, BK yatanze amatike y’indege ku banyamahirwe 10 batsinze nyuma yo guhaha no kwishyura serivisi zitandukanye bakoresheje ikarita ya Visa (Visa Card).

Ku wa 23 Ukuboza 2016 nibwo Banki ya Kigali yatangije ubukangurambaga yise”Haha utsinde (Shop and Win)”; mu rwego rwo gushishikariza abakiliya bayo kutadengana amafaranga ahubwo bagakoresha amakarita ya ATM.

Muri ubu bukangurambaga bwasojwe mu mpera za Mutarama 2017, abanyamahirwe basaga 90 batsindiye ibihembo bitandukanye byatangwaga buri cyumweru birimo telefone zigezweho, amakarita yo guhaha, Modem za 4G n’ifunguro ry’abantu babiri muri hoteli z’inyenyeri eshanu.

Kuri uyu wa 17 Gashyantare 2017, nibwo hatanzwe igihembo nyamukuru, aho abantu batatu bahawe itike z’indege zo kujya Mombasa muri Kenya, barindwi bahabwa izijya i Dubai.

Umwe mu batsindiye itike yo kujya i Dubai witwa Murangwa Aboubakar, yavuze ko akunda gukora ingendo hanze y’igihugu, bityo ikarita ya Visa ikaba ituma yizera umutekano w’amafaranga ye.

Ati” Iyo bigeze ku bihugu bitandukanye n’ubwoko bw’amafaranga atandukanye, biragora kubasha gukoresha amafaranga no gusobanukirwa ingano y’ayo utanze n’ayo uhawe. Biroroha gutanga ikarita bagakuraho amafaranga, byose bigakorwa mu buryo bw’ikoranabuhanga.”

Abandi batsinze barimo Nzayisenga Callixte na Mutoni Aneth bahurije ku kuba gukoresha ikarita bituma umuntu akoresha amafaranga ye neza, kuko bimurinda kugura ibintu atari afite muri gahunda. Ikindi ngo birinda umuntu gutonda umurongo muri banki ategereje kubikuza amafaranga.

Umuyobozi ushinzwe ibijyanye n’ihererekanya cy’amafaranga hakoreshejwe ikoranabuhanga (Electronic and Digital Channels), Kevin Rudahinduka, yavuze ko icyari kigamijwe muri ubu bukangurambaga, ari ugushishikariza abantu kubyaza umusaruro amakarita yabo.

Ati”Icyari kigamijwe ni uguteza imbere umuco wo gukoresha amakarita, by’umwihariko mu kugabanya umubare w’amafaranga ahererekanywa mu ntoki. Icyo twifuza ni uko abakiliya bacu bakoresha amakarita yabo, aho bishoboka ko badakoresha amafaranga.”

Banki ya Kigali kuri ubu iri kwizihiza imyaka 50 imaze ishinzwe kuko yatangiye mu 1966. Irateganya ubundi bukangurambaga nk’ubu bushishikariza abakiliya gukoresha serivisi zayo.

Abanyamahirwe bahembwe nyuma yo guhaha no kwishyura serivisi zitandukanye bakoresheje ikarita ya Visa
Akanyamuneza kari kose kuri Mutoni Aneth nyuma yo kwegukana igihembo cye
Bamwe mu banyamahirwe batsindiye amatike y'indege zijya mu bihugu bitandukanye
Murangwa Aboubakar avuga ko gukoresha Visa Card bimuha umutekano w'amafaranga ye
Nzayisenga Callixte yatsindiye itike yerekeza i Dubai

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza