Akanyamuneza ku bahinzi b’ibinyampeke EAX yafashije kubona amasoko

Yanditswe na Evariste Nsengimana
Kuya 25 Gicurasi 2018 saa 11:30
Yasuwe :
0 0

Bitewe n’impamvu zirimo ubumenyi n’ubushobozi buke bwo gucunga no kubungabunga umusaruro, usanga hari abahinzi utabyarira inyungu uko bikwiye kandi biyushye akuya kugira ngo bawubone.

Ikigo cy’Ubuhahirane cya Afurika y’Uburasirazuba (East Africa Exchange-EAX) gifasha abahinzi gutubura no gufata neza umusaruro, kubona inguzanyo yabwo no kuwushakira abaguzi, kivuga ko mbere ya 2014, 35% by’umusaruro w’ubuhinzi watakariraga mu isarura bitewe n’ubumenyi buke bw’abahinzi.

EAX ifite Laboratwari zirimo ibikoresho bigezweho byifashishwa mu gupima ubuziranenge bw’umusaruro, hagamijwe kuwugeza ku isoko ryagutse mu gihugu no hanze yacyo.

Inyungu umuhinzi agira iyo yatunganyije akanafata neza umusaruro, harimo kugurisha ku giciro cyiza no kuwushyira ku isoko mpuzamahanga.

Kuri uyu wa 24 Gicurasi 2018, ubwo EAX yasuraga ububiko bw’ibinyampeke bwayo buherereye mu Murenge wa Mayange mu Karere ka Bugesera, bamwe mu bayobozi ba Koperative zikorera hirya no hino mu gihugu, bagaragaje uko batanye n’igihombo kuva batangiye gukorana n’iki kigo.

Umuyobozi wa Koperative y’Abahinzi b’Ibigori n’Imboga basaga 525 barimo abagore 198 ikorera mu Karere ka Kamonyi yitwa ‘Ubumwe bugamije Iterambere’, Nshimiyimana Claude, yagize ati “EAX itugurira umusaruro, ikaduha amahugurwa mu buryo bwo kuwutunganya, ikadufasha kuduhuza na Banki. Ku ruhande rwanjye, bampaye amafaranga yo kugura ibikoresho bidufasha gutunganya umusaruro kugira ngo tuwugeze mu bigega byayo no ku isoko umeze neza.”

Ibyo bigega biri hirya no hino mu gihugu, bihunika umusaruro w’ibinyampeke nk’ibigori, ibishyimbo na soya ariko hari gutegurwa uburyo bwo guhunika ingano, amasaka n’ibindi.

Perezida wa Koperative yitwa ‘Hirwa’, Namahoro Olive, ifite abanyamuryango 1558 barimo abagabo 958, ihinga ibigori mu Karere ka Rwamagana, yavuze ko mu bihembwe bitatu by’ihinga bishize ikorana na EAX hari byinshi yagezeho.

Ati “Tutarakorana byari ibibazo bikomeye cyane kuko umusaruro wacu ntitwabonaga aho tuwujyana, n’aho twawujyanaga wasangaga ari ku masoko adafatika, hari abamamyi rimwe na rimwe ugasanga nta mafaranga. Tumaze gukorana na EAX ndumva nahera ku kintu gikomeye cyane badufashije kijyanye n’ubushobozi bw’amafaranga.”

Yunzemo ati “Akenshi nta bushobozi bufatika ku mafaranga amakoperative agira kugira ngo bakusanye uriya musaruro, bawukure mu baturage bawugeze ku isoko ariko EAX yadufashije kubasha gukorana na Banki, tukabona amafaranga, tukabasha kuwukusanya bitatuvunnye.”

Imwe mu mikoranire abahinzi bakorana na EAX bishimira, ni uburyo amasezerano bagirana (Inyemezabubiko, igaragaza ingano y’umusaruro bafite mu bubiko), bayifashisha muri Banki zitandukanye nka, BRD, Equity Bank, Ecobank, GT Bank, KCB Bank, Urwego Opportunity Bank, zikabaha inguzanyo bifashisha, umusaruro uri mu bigega byayo ukaba ariwo Banki zifataho ingwate.

EAX igitangira, Banki zatangaga inguzanyo ingana na 50% by’umusaruro uhunitswe ariko ubu bigeze kuri 70%. Imibare igaragaza ko izo banki zimaze kuguriza abakorana na EAX miliyoni 4,7$.

Umuyobozi Wungirije wa Koperative Duhuze Imbaraga Nyarubogo, ihingira ibigori mu Karere ka Nyanza, Ntirenganya Elizephan, yagize ati “Babanza kuguha amahugurwa yo gufata neza umusaruro, umwe wapfaga utakara mu gihe turi gukusanya ugahombya abaturage, amahugurwa tuba twayabonye bigatuma tuwufata neza, tukawubashyikiriza usa neza, bakaduha igiciro cyiza.”

By’umwihariko ku bigori, EAX ibagurira ku giciro kitari munsi ya 210Frw ku kilo mu gihe abamamyi usanga babaha 150Frw. Nyuma yo kugezayo umusaruro, EAX ibishyura mu gihe kitarenze iminsi itatu.

Umuyobozi ushinzwe Ibikorwa byo kugurisha muri EAX, Kayitakire Clement, yavuze ko iki kigo cyashinzwe mu 2014 hagamijwe kugabanya umusaruro upfa ubusa.

Ati “Icya mbere tubafasha cyari n’ikibazo mbere y’uko ikigo cyacu kibaho, kwari ugutakaza umusaruro ku gihe cy’isarura, byabagaho kubera kuwufata nabi mu gihe cyo kuwutunganya. Uwatakaraga wari ku kigero cya 35% ariko kuva aho twaziye, twaje gukemura icyo kibazo.”

Atanga inama ku banyamuryango n’abandi bifuza gukorana na EAX, Kayitakire yagize ati “Ni ukubabwira ko serivisi zacu zikomeje ndetse uko igihe kigenda kigira imbere zigenda ziba nziza kurushaho kandi nabo bamaze kubyumva. Abatari abanyamuryango, cyane cyane amakoperative y’abahinzi b’ibigori, ibishyimbo na soya, ni uko bakwiye kutugana kugira ngo nabo tubateze imbere. Abo dukorana twabateje imbere kandi icyo twifuza ni uko duteza imbere amakoperative yose bakabasha kubona izo nguzanyo no kuzishyura.”

EAX yageze mu Rwanda mu 2014, kugeza ubu ihafite abanyamuryango 250 na Koperative ikorana na zo 187 zigizwe n’abahinzi 20,940. Ku rwego rwa Afurika y’Uburasirazuba, ifite abakiliya bagura uwo musaruro barenga miliyoni 170.

Hari ibikoresho bipima ubuziranenge bw'umusaruro w'abahinzi
Umusaruro uhunikwa mu bigega witabwaho n'abakozi bafite ubunararibonye
Abahinzi b'ibinyampeke babanje gutambagizwa ahari ibigega bya EAX
Umuyobozi Wungirije wa Koperative Duhuze Imbaraga Nyarubogo, ihingira ibigori mu Karere ka Nyanza, Ntirenganya Elizephan
Perezida wa Koperative yitwa ‘Hirwa’, Namahoro Olive, yavuze ko mu bihembwe bitatu by’ihinga bishize ikorana na EAX hari byinshi yagezeho
Umuyobozi ushinzwe Ibikorwa byo kugurisha muri EAX, Kayitakire Clement
Umuyobozi wa Koperative y’Abahinzi b’Ibigori n’Imboga ikorera mu Karere ka Kamonyi yitwa ‘Ubumwe bugamije Iterambere’, Nshimiyimana Claude
Ibigega bya EAX biri mu Karere ka Bugesera, ahakusanyirizwa umusaruro
Bafashe ifoto y'urwibutso nyuma y'urugendo bakoze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza