Amabuye y’agaciro yitezweho kwinjiza miliyoni 400 z’amadolari mu 2018

Yanditswe na Mukaneza M.Ange
Kuya 9 Gicurasi 2017 saa 06:53
Yasuwe :
0 0

Mu gihe ibiciro ku isoko mpuzamahanga bikomeje kuzamuka, Leta y’u Rwanda ku bufatanye n’Ihuriro ry’Abacukuzi b’amabuye y’agaciro (RMA), biyemeje kongera ingano y’ayo bacukuraga mu myaka ibiri iri mbere kugira ngo mu 2018 bazabashe kwinjiza miliyoni 400 z’amadolari avuye kuri miliyoni 166 z’amadolari yinjije umwaka ushize.

Umuyobozi w’Ikigo cy’Igihugu gishinzwe mine, peteroli na gas (RMPGB), Francis Gatare, yavuze ko abari mu bikorwa by’ubucukuzi bw’amabuye y’agaciro mu Rwanda bagomba kubyaza umusaruro izamuka ry’ibiciro ku isoko mpuzamahanga, binyuze mu kongerera agaciro amabuye yabo kugira ngo bongere amafaranga binjizaga.

Kuva mu myaka ibiri ishize ibiciro by’amabuye y’agaciro arimo gasegereti, coltan na wolfram, byari byaramanutse kuri ubu byongeye kuzamuka.

Uku kumanuka kw’ibiciro byari byaraciye intege abacukura amabuye y’agaciro, bituma bagabanya ingano yayo boherezaga hanze kubera ko batabashaga kwinjiza ayo babaga bashoye.

Mu kiganiro yagiranye na The New Times mu cyumweru gishize, Minisitiri w’ubucuruzi, inganda n’ibikorwa by’Umuryango wa Afurika y’Uburasirazuba, François Kanimba, yavuze ko amabuye acukurwa aziyongera, kubera ko hari abari barahagaritse ibikorwa by’ubucukuzi bazabisubiramo.

Umuyobozi wa RMA, Malic Kalima, yavuze ko kuva uyu mwaka watangira, ibiciro by’amabuye y’agaciro byazamutse ku buryo bushimishije, aho nko kuri gasegereti toni yavuye ku bihumbi 13 by’amadolari mu 2015/16, kuri ubu ikaba iri hagati y’ibihumbi 19-20 by’amadolari ku isoko mpuzamahanga.

Mbere ya 2015, toni ya gasegereti yaguraga hagati y’ibihumbi 21-22 by’amadolari.

Ati “Ubu icyo tumaze kubona n’uko ibiciro bya gasegereti bikomeje kuzamuka. Ibiciro bya wolfram nabyo byazamutse ku kigero cya 40% naho coltan bizamuka ku kigero kiri hagati ya 28-30%.”

Kuzamuka kw’ibiciro ku isoko mpuzamahanga kandi byanatumye no mu Rwanda bizamuka nk’uko byemezwa na Innocent Murindahabi uyobora COPOBAMANYA, icukura amabuye y’agaciro atandukanye mu karere ka Bugesera, ibasha kwinjiza toni ebyiri buri kwezi.

Kuri ubu ikilo cya gasegereti kiri kugura hagati y’amafaranga y’u Rwanda ibihumbi birindwi n’ibihumbi umunani, ibi bikaba byitezweho kongera umusaruro biturutse ku bwiyongere bw’umubare w’abakozi.

Nk’uko byatangajwe na Banki Nkuru y’Igihugu muri Gashyantare 2017, kuva mu 2015 ubucukuzi bw’amabuye y’agaciro ntibwitwaye neza kubera imanuka ry’ibiciro ku isoko mpuzamhanga.

Ibi byatumye amafaranga yinjijwe na coltan, gasegereti na wolfram ava kuri miliyoni 117.81 z’amadolari mu 2015, agera kuri miliyoni 86.42 z’amadolari mu 2016.

Imibare igaragaza ko kandi n’ingano y’amabuye y’agaciro yoherejwe hanze yagabanutse, aho mu 2015 hoherejwe ibiro 13 990 034 bivuye ku biro 16 357 478 byari byoherejwe mu 2014.

Muri rusange amabuye y’agaciro yose yoherejwe hanze mu 2015 yinjirije u Rwanda miliyoni $149 082 443, zivuye kuri miliyoni $210 680 316 zari zinjijwe mu 2014 na miliyoni $226 189 315 zinjiye mu 2013.

Amabuye y’agaciro yitezweho kwinjiza miliyoni 400 z’amadolari mu 2018

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244