Banki y’Abaturage yasobanuye uburyo umuntu ashobora kuva mu bukode agatunga inzu ye

Yanditswe na Kanamugire Emmanuel
Kuya 29 Ukwakira 2016 saa 06:47
Yasuwe : XX
0

Ni kenshi usanga abantu baba mu bukode bibaza uburyo bashobora gutunga inzu zabo bikababera ihurizo,ikaba ari yo mpamvu Banki y’Abanturage yatangije konti yitwa’Gira icumbi’ ifasha umuntu kwizigamira nyuma y’amezi 12 agahabwa inguzanyo yo kubaka.

Hamwe n’iyi konti iyo umuntu yizigamiye 10% by’amafaranga akeneye nyuma y’amezi 12 Banki y’Abaturage imuha inguzanyo ya 90% kugira ngo yiyubakire inzu cyangwa abashe kuyigura.

Mu imurikabikorwa ryateguwe na Minisitireri y’Imari n’Igenamigambi mu cyumweru cyahariwe guteza imbere umuco wo kwizigama, Prossie Kalisa ushinzwe ubucuruzi muri Banki y’Abaturage y’u Rwanda yatangaje ko icyo barimo kwibandaho ari ugubasobanurira ababagana uburyo buri wese ahereye ku bihumbi 100 ashobora gutunga inzu ye.

Ati “Muri iki cyumweru cyahariwe kuzigama turimo kwibanda cyane ku gusobanurira abakiriya uburyo bworoshye kandi bwiza bwo kubafasha kubona inzu zabo.Amafaranga umuntu aheraho mu kuzigama ni ibihumbi 100 kuzamura, icyo uba usabwa gusa ni uko mu mezi 12 uba ugomba kuba warazigamye 10% by’inguzanyo wifuza mu kugura inzu cyangwa kuyubaka.”

Kalisa yakomeje avuga ko kuba Banki yatangira umuntu 90% azishyurwa mu myaka 15 ari icyerekana ko Banki y’Abaturage izirikana ibyifuzo by’abakiriya bayo ndetse ikabafasha gukabya inzozi, gusa ngo kuzigama bigomba kugira intego buri gihe.

Ati “Umuntu wese akwiye kuzigama afite gahunda yifuza kugeraho ku buryo niba ari icumbi ushaka cyangwa kuzigamira amashuri y’abana, ubikora wabiteguye kuko nibwo bigufasha kugera kubyo ushaka udasabagije amafaranga uyakoresha ibyo utateganyije ngo ni uko wayabitse gusa.”

Uretse konti ya ‘Gira Icumbi’, hari na konti yo kuzigamira abana kuva k’ukivuka kugeza ku mwana w’imyaka 18.

Kalisa ati “Usanga ababyeyi benshi iyo umwana ageze igihe cyo kujya kwiga aribwo batangira kubunza imitima, nyamara ufunguje konti ukajya uzigamira amashuri ye buhoro buhoro nta kibazo wagira ,ndetse banki inaguha inyungu ya 3% by’ayo wazigamye buri kwezi.”

Iri mukurikabikorwa ry’iminsi ineryabereye kuri Stade nto i Remera; ryatangiye tariki ya 25 risozwa tariki ya 28 Ukwakira 2016. Ryateguwe na Minisiteri y’Imari n’Igenamigambi mu cyumweru cyahariwe guteza imbere umuco wo kuzigama.
Ryitabiriwe n’ibigo by’imari n’amabanki n’abandi bose bafite aho bahurira no kuzigama.

Banki y'Abaturage mu imurikabikorwa ryo guteza imbere umuco wo kuzigama
Abakozi ba Banki y'Abaturage basobanuriye abakiliya uburyo umuntu ashobora gutunga inzu ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE