2016: BK yungutse miliyari 30, isora 9.2 Frw

Yanditswe na Rabbi Malo Umucunguzi
Kuya 8 Werurwe 2017 saa 06:19
Yasuwe :
0 0

Banki ya Kigali yatangaje inyungu yayo mu mwaka ushize yazamutseho 1.3% ugereranyije n’iyabonetse mu 2015 kuko yungutse miliyari 20.8 Frw nyuma yo gutanga umusoro wa miliyari 9.2 Frw.

Umuyobozi wa BK, Dr Diane Karusisi, yavuze ko amafaranga BK yinjije muri rusange itarakuramo umusoro yari miliyari 30 Frw. Agereranyije n’umwaka wa 2015, yazamutseho 16.5% kuko bwo yari yinjije miliyari 25.7 Frw.

Ariko BK isobanura ko mu mwaka wa 2016 yabariwe umusoro kuri 30% by’amafaranga yinjije, mu gihe mu myaka itanu yabanje yabarirwaga umusoro kuri 20%.

Umuyobozi ushinzwe imari muri BK, Nathalie Mpaka, yagize ati “Umwaka ushize imisoro yariyongereye kuko mbere y’aho twari tukiri mu gihe cyo kugabanyirizwa inyungu nk’uko bikorwa iyo ikigo kimaze gushyirwa ku isoko ry’imari n’imigabane. Ariko twishimiye kuba dutanga uyu musoro.”

Mu 2015 BK yatanze umusoro wa miliyari 5.3Frw naho mu 2016 isora miliyari 9.2 Frw.

BK irateganya uburyo bwo gutanga inguzanyo kuri telefoni

Dr Karusisi yavuze ko ubusanzwe BK yajyaga ifungura amashami agera ku 10 buri mwaka, ariko nko mu mwaka ushize hafunguwe ane, ahubwo ngo imbaraga ziri kugenda zimurirwa mu ikoreshwa ry’ikoranabuhanga.

Yagize ati “Hari gahunda dufite yo gutangira gusaba inguzanyo umukiriya wacu yifashishije telefoni muri Mobile Banking, ku buryo mu minota itarenze itanu umuntu azajya amenya niba yahawe inguzanyo, amafaranga agashyirwa kuri konti ye cyangwa kuri Mobile Money. Ni ikintu tuzashyira ahagaragara mu minsi iri imbere."

Kugeza kuwa 31 Ukuboza Banki ya Kigali yatanze serivisi ku bakiriya basanzwe 236 545 n’abakiriya banini 25 477. Kugeza kuri iyo tariki yari igeze ku mashami 79 mu gihugu hose, imashini 91 za ATM n’imashini zishyurirwaho (POS) zigera ku 1002.

Ubuyobozi bwa BK bunavuga ko bufite icyizere cy’uko muri uyu mwaka wa 2017 inyungu izaba nziza kurutaho, kuko imishinga bashoyemo amafaranga nka KIgali Convention Centre na Marriott Hotel izaba yatangiye kubyara amafaranga.

Biteganyijwe ko hazaba inama y’Inteko rusange ya Banki ya Kigali kuwa 5 Gicurasi 2017, hagamijwe kwemeza niba 40% by’inyungu yabonetse mu 2016 izagabanyarwa abanyamigabane, ni ukuvuga ingana na miliyari 8.3 Frw.

Ni ukuvuga ko umugabane uzagenda utangwaho 12.3 Frw, aho igice kinini gisigaye kizashyirwa mu ishoramari hagamijwe iterambere rya banki.

Kugeza kuwa 31 Ukuboza 2016, BK nk’abanki ikomeye mu gihugu yabariwe umutungo mbumbe wa miliyari 638.3 Frw.

Indi nkuru wasoma: BK yizihije Yubile y’imyaka 50 mu mwihariko w’umusangiro wageze no ku bakiliya (Amafoto na Video)

Umuyobozi wa BK, Dr Diane Karusisi atangaza amafaranga iyi banki yungutse
Umuyobozi ushinzwe imari muri BK, Nathalie Mpaka
Abanyamakuru bagize umwanya wo kubaza ku byo BK iteganyiriza abakiriya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza