BPR yatowe nka Banki ya mbere mu Rwanda mu 2017

Yanditswe na IGIHE
Kuya 25 Gicurasi 2017 saa 10:27
Yasuwe :
1 0

Banque Populaire du Rwanda Limited, Part of AtlasMara (BPR AtlasMara) yatowe yegukanye igihembo cya Banki ya mbere mu Rwanda mu mwaka wa 2017, mu bihembo ngarukamwaka bitangwa n’ikigo CPI Financial, gisohora ikinyamakuru Banker Africa Magazine.

Itangwa ry’ibi bihembo ni igikorwa kigamije guteza imbere imikorere ihamye y’amabanki muri Afurika, kigaragaraza uko banki zihagaze mu bice bitandukanye by’uyu mugabane.

BPR yegukanye iki gihembo mu cyiciro cy’ibihembo bigenerwa banki zo muri Afurika y’Iburasirazuba, mu birori byabereye mu nyubako ya Crowne Plaza, mu Mujyi wa Nairobi muri Kenya, kuwa 18 Gicurasi 2017.

Iyi banki yatowe nyuma y’ibarura ry’amajwi y’abatoye bagera ku 77 000 bakurikirana serivisi z’imari muri Afurika y’Iburasirazuba, uyu ukaba ariwo mubare munini w’amajwi wagaragaye mu myaka ine ishize iki cyiciro cy’ibihembo kimaze, aho ukubye gatatu uw’abatoye umwaka ushize.

Umuyobozi Mukuru wa Banki y’Abaturage mu Rwanda, Sanjeev Anand, kuri uyu wa Kane tariki ya 25 Gicurasi 2017, yabwiye itangazamakuru ko bishimiye kwakira iki gihembo. Yavuze ko gifite igisobanuro gikomeye by’umwihariko nyuma y’uko yeguriwe Atlas Mara.

Ati “Nishimiye ko twakoze amavugurura menshi mu mezi 15 ashize, ari nabyo byatumye tugera ku rwego rwo kwakira igihembo nk’iki cya banki ihiga izindi.”

Yakomeje avuga ko mu by’ingenzi bihutiye gukora bakimara kwegurirwa BPR, ari ukugabanya inguzanyo zitishyurwaga uko bikwiye, gutangira gukorana n’ibigo bikomeye by’ubucuruzi, kwihutisha ikoranabuhanga no guha amahugurwa abakozi.

Ati “Ndatekereza ko banki zose zahataniye ibi bihembo, byari ibihembo bifunguye kuri bose. Nta muntu n’umwe twari tuziranye nawe mu babiteguye, nta nubwo nari mbizi kugeza ubwo bambwiye inkuru nziza. Birashoboka ko hari ibyiza babonye muri serivisi zacu n’igishoro cyacu kikaba gihagaze neza.”

Umuyobozi Ushinzwe Ibikorwa muri BPR, Ramba Afrique, yavuze ko babashije kugabanya igihombo cyari kimaze iminsi kigaragara muri iyi banki, aho cyavuye kuri miliyari imwe y’amafaranga y’u Rwanda mu 2015, kikagera kuri miliyoni 12 mu 2016.

Mu mezi atatu ya mbere ya 2017, BPR irateganya kugunguka asaga miliyoni 750 z’amafaranga y’u Rwanda.

Itora ryatangiwemo iki gihembo ryafunguwe ku wa 2 Mata 2017 kugeza ku wa 2 Gicurasi 2017, rirangira ibigo 30 byo mu bihugu birindwi birimo Ethiopia, Kenya, Mauritius, u Rwanda, Sudani, Tanzania na Uganda bigabanye ibihembo 46.

Mu batoraga harimo abasomyi b’ikinyamakuru Banker Africa n’abantu bakoresha internet basura urubuga rw’amakuru y’ubukungu rwa cpifinancial.net.

Umuyobozi wa CPI Financial, Robin Amlôt, yagize ati “Buri mwaka, ibihembo bya Banker Africa East Africa bigaragaza kandi bigahemba ab’indashyikirwa muri serivisi z’imari. Tugamije guteza imbere imikorere ihamye no gushimira abafatanyabikorwa baharanira kubaka ahazaza h’ubukungu bw’akarere.”

Yakomeje agira ati “Kwegukana kimwe mu bihembo byacu bigaragaza icyo abari muri serivisi z’imari muri Afurika y’Iburasirazuba batekereza kandi abegukana ibi bihembo bakwiye kwishimira ibyo baba bagezeho no kuba bagenzi babo bababona nk’abantu bayoboye isoko.”

BancABC Tanzania nayo ibarirwa mu kigo kinini AtlasMara, yegukanye igihembo cya Banki ikizamuka muri Tanzania, Best Emerging Bank 2017.

Banker Africa Awards ni ibihembo bikomeye kuri uyu mugabane, aho bireba banki zo mu bice bya Afurika y’Amajyaruguru, Afurika y’Iburasirazuba, Afurika y’Iburengerazuba na Afurika y’Amajyepfo, hagamijwe gushimira abakomeje kwitwara neza muri serivisi z’imari.

Banki y’abaturage ubu izwi nka BPR part of Atlas Mara yatangiye gukorera mu Rwanda mu 1975 itangiranye n’abaturage ba Nkamba mu Burasirazuba bw’u Rwanda.

Muri Mata 2015 yaje kugurwamo igice kinini cy’imigabane na Atlas Mara Limited, mu 2014 yari yaraguze imigabane mu ishami ry’ubucuruzi ryari irya Banki y’Iterambere y’u Rwanda, BRD, biza guhurizwa hamwe mu mwaka ushize.

Ushinzwe ishoramari muri BPR, Eric Rutabana (wa kabiri uturutse ibumoso) n'Ushinzwe itangazamakuru n'iyamamazabikorwa, Prossie Kalisa (wa kabiri uturutse iburyo) nibo bagiye gufata igihembo cyahawe BPR
Umuyobozi Mukuru wa Banki y’Abaturage mu Rwanda, Sanjeev Anand
Umuyobozi Mukuru wa Banki y’Abaturage mu Rwanda, Sanjeev Anand, (ubanza ibumoso) yabwiye itangazamakuru ko bishimiye kwakira iki gihembo
Ushinzwe ibikorwa muri BPR, Ramba Afrique; Umuyobozi Mukuru wa Banki y’Abaturage mu Rwanda, Sanjeev Anand n'Ushinzwe serivisi zigenewe ibigo, Cyusa Jean Luc

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza