BRD yahaye I&M Bank amafaranga yo kuguriza abohereza ibicuruzwa mu mahanga

Yanditswe na Cyprien Niyomwungeri
Kuya 29 Werurwe 2017 saa 04:23
Yasuwe :
0 0

Banki itsura amajyambere y’u Rwanda, BRD, yasinyanye amasezerano y’imikoranire na I&M Bank, mu kongera inguzanyo zihabwa ibigo bito n’ibiciriritse bikora imirimo yo kohereza ibicuruzwa mu mahanga.

Aya masezerano yasinywe kuri uyu wa Gatatu, yemerera I&M Bank kugurizwa na BRD miliyoni 600 z’amafaranga y’u Rwanda icyarimwe, na yo ikayaguriza ibigo bito n’ibiciriritse bishaka gukora imishinga yo kongera ibicuruzwa byoherezwa mu mahanga.

Umuyobozi Mukuru wa BRD, Alexis Kanyankole, yasobanuye ko aya masezerano ari muri gahunda yo gukoresha inkunga ingana na miliyari hafi esheshatu Guverinoma y’u Budage yahaye u Rwanda umwaka ushize binyuze mu kigega ‘Export Growth Facility’ EGF, gifasha abohereza ibicuruzwa mu mahanga.

Yagize ati “Intego ni ukugira ngo twongere imbaraga mu byerekeranye n’imari ishorwa mu byerekeranye n’ibyoherezwa mu mahanga, bityo bitume n’umuvuduko tugenderaho wo kohereza ibicuruzwa mu mahanga wiyongera.”

Muri gahunda y’imbaturabukungu ya II, (EDPRS II), u Rwanda ruteganya kuzamura ibyoherezwa mu mahanga bikagera kuri 28%. Imibare ya Banki Nkuru y’Igihugu igaragaza ko ugereranyije na 2015, mu mwaka ushize ibyoherezwa mu mahanga mu buryo bwemewe n’amategeko byiyongereyeho 7.1%, ibitumizwayo bigabanuka kuri 2.7%.

Kanyankole yavuze ko amasezerano basinyanye na I&M Bank ateganya ko banki ayobora izayiguriza ku nyungu iciriritse, nayo ikaguriza ibigo bito n’ibiciriritse ku nyungu ntoya ugereranyije n’uko bisanzwe.

Yagize ati “Bizaba bitandukanye n’uko byakorwaga kuko inyungu izajya yakwa ibyo bigo muri iyo mishinga izaba itarenga 14%, ni mu gihe ku isoko risanzwe babonaga inguzanyo ku nyungu ya 16% kuzamura.”

Umuyobozi ushinzwe ibirebana n’ubucuruzi n’iterambere ry’ikoranabuhanga muri I&M Bank, Faustin Byishimo, yavuze ko amafaranga BRD yabahaye azatuma bakemura ikibazo cy’ibigo bito n’ibiciriritse cyo kutabona inguzanyo inguzanyo z’igihe kirekire kandi zihendutse.

Yagize ati “Amafaranga tubonye bayaduhaye ku nguzanyo ntoya ugereranyije n’uburyo tubona amafaranga ku isoko, biduhaye ububasha bw’uko natwe twatanga inguzanyo ku giciro giciriritse kuruta uko dusanzwe tuyitanga. Twabahaga amafaranga ku myaka itatu cyangwa ine, ubu biratwemmerera kuyatanga mu myaka irindwi cyangwa icyenda.”

Imishinga izitabwaho ni iyijyanye no kohereza ibicuruzwa mu mahanga gusa, yaba ibikomoka ku buhinzi, ubworozi, amabuye y’agaciro, ibikorerwa mu Rwanda n’iyindi. Ubusanzwe I&M ikaba ikorana n’amakoperative akora mu bijyanye n’ikawa, icyayi, imboga, imbuto n’abandi.

Kanyankole asinyana amasezerano n'Umuyobozi wa I &M Bank

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244