Bwa mbere mu mateka hamuritswe ikirango cyihariye cy’icyayi cy’u Rwanda

Yanditswe na Herve Ugirumukunda
Kuya 19 Ugushyingo 2017 saa 01:29
Yasuwe :
0 0

Leta y’u Rwanda yamuritse ikirango kizajya giherekeza icyayi cyose gihingwa kikanatunganyirizwa mu gihugu kuri uyu wa 17 Ugushyingo 2017.

Ni ikirango kigizwe n’amababi y’icyayi, asobanura ubutohe bwacyo; icyibo cyerekana umurava w’abahinzi n’abasoromyi bacyo; n’ibara ry’igitaka rigaragaza umwimerere karemano.

Umuyobozi w’Ikigo cy’Igihugu gishinzwe guteza Imbere Ibyoherezwa mu Mahanga bikomoka ku Buhinzi (NAEB), Amb. Bill Kayonga, yavuze ko ubusanzwe buri ruganda rutunganya icyayi rwagiraga izina n’ikirango rwacyo cyihariye.

Ati ariko “Iki kirango kizajya kijya ku cyayi cyose gihingwa mu Rwanda, buri ruganda ruzajya rukomeza kugira ikirango cyarwo ariko rwongereho iki kirango cya ‘Rwanda Tea’.”

Minisiteri y’Ubuhinzi ivuga ko icyayi cy’u Rwanda ahanini gicururizwa mu cyamunara kibera mu mujyi wa Mombasa muri Kenya. Ukutagira ikirango kwacyo kwatumaga hari igihe ibindi bihugu bicyiyitirira kandi byo bisanzwe bikora icyayi kitameze neza.

MINAGRI ivuga ko u Rwanda rutungukira mu gucuruza icyayi cyinshi ahubwo rubyaza umusaruro uburyohe bwihariye bwacyo butuma gihenda cyane iyo kigeze mu bihugu byateye imbere.

Imibare ya NAEB igaragaza ko ikiro cy’icyayi cy’uruganda rwa Kitabi na Rubaya kigura amadolari atanu naho izindi nganda kikaza munsi yayo gato. Icyo giciro gihora hejuru ugereranyije n’ibindi bihugu.

Amb. Kayonga avuga ko ikirango gishya kizerekana kurushaho ubwiza bw’icyayi cy’u Rwanda, kigatuma n’abakigura biyongera.

Icyayi cyari cyaramaze gutunganywa no gupakirwa kirakomeza kugurishwa ku birango by’inganda bisanzwe mu gihe hagikorwa ubukangurambaga bwo kumenyekanisha ikirango gishya.

Igihingwa cy’icyayi kimaze imyaka ikabakaba 60 gihingwa mu Rwanda, ubu ni kimwe mu byinjiriza igihugu amadevize menshi; mu mwaka ushize kinjije hafi miliyoni 65 z’amadolari.

Leta y’u Rwanda iteganya ko muri uyu mwaka ayo madevize aziyongera akarenga miliyoni 70 $ bitewe n’uko igiciro kizaba giteye ku isoko.

Mu imurikagurisha nyafurika ry’icyayi ryabereye i Nairobi muri Kenya ku ya 11-12 Gicurasi 2017 inganda zo mu Rwanda, Nyabihu, Rubaya, Kitabi, Gisovu na Muganza-Kivu zegukanye ibihembo 11 muri 12 byahatanirwaga.

Minisitiri w'Ubuhinzi n'Ubworozi, Dr. Mukeshimana bafungura ku mugaragaro ikirango cy’icyayi cy’u Rwanda
Ikirango gishya cy’icyayi cy’u Rwanda
Abahinzi n'abacuruzi b'icyayi cy'u Rwanda mu imurikwa ry'ikirango gishya cy'icyayi
Umuyobozi w’Ikigo cy’Igihugu gishinzwe guteza Imbere Ibyoherezwa mu Mahanga bikomoka ku Buhinzi (NAEB), Amb. Bill Kayonga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza