Canal+ yagabanyije ibiciro bya dekoderi mu gufasha abashaka kureba imikino ya CAN

Yanditswe na Muvunyi Arsène
Kuya 30 Gicurasi 2019 saa 08:16
Yasuwe :
0 0

Sosiyete icuruza ibijyanye n’amashusho ya televiziyo, Canal+, yahananuye ibiciro bya dekoderi zayo kugira ngo yorohereze abaturarwanda kuryoherwa n’imikino y’igikombe cya Afurika (CAN) kizabera mu Misiri.

Guhera tariki 21 Kamena kugera 19 Nyakanga 2019, uruvangitirane rw’amabara y’amabendera y’ibihugu bitandukanye azaba yiganje muri Stade esheshatu zo mu mijyi ine yo mu gihugu cya Misiri, amakipe ahatanira igikombe cya Afurika cy’umupira w’amaguru.

Canal + ifite uburenganzira bwose bwo kwerekana iki igikombe kizahatanirwa n’amakipe y’ibihugu 24 kuva mu ntangiriro kugeza ubwo kiyonye nyiracyo.

Mu kiganiro n’abanyamakuru cyabaye kuri uyu wa Kane, Umuyobozi Ushinzwe Ubucuruzi muri Canal +, Tuyishime Alain, yavuze ko biteguye kugeza ku bakiriya babo amashusho meza cyane yo ku rwego rwa HD, ndetse imikino ikazogezwa n’abasesenguzi bakanyujijeho muri ruhago nka Habib Beye wakiniye PSG.

Mu rwego rwo gufasha abaturarwanda kuryoherwa n’iyi mikino izitabirwa n’ibihugu bine byo muri Afurika y’Uburasirazuba, Canal+ yahananuye ibiciro bya dekoderi zayo ziva ku mafaranga ibihumbi 20 Frw ijya ku bihumbi 10 Frw, mu bice byose byo mu Rwanda.

Ati “Umwihariko wa Canal+ ntabwo twongeraho igiciro cy’ubwikorezi. Igiciro cy’i Nyarugenge nicyo giciro cy’i Rusizi n’i Nyamasheke, guhera mu gitondo dekoderi iba igura ibihumbi 10 mu rwego rwo gushyira abanyarwanda mu mwuka wa CAN.”

Uretse abagura dekoderi nshya, n’abafite izishaje bashaka kuguranisha bakabona iza HD, na bo bazajya bishyura amafaranga ibihumbi 10 Frw. Biratangira gushyirwa mu bikorwa kuri uyu wa 31 Gicurasi 2019.

Uguze dekoderi ya Canal+ atanga andi mafaranga ibihumbi 15 byo kwishyura umukozi uyimushyirira mu nzu n’andi y’ifatabuguzi iryo ari ryo ryose yifuza.

Guhera ku wa 27 Gicurasi, Canal+ yatangiye gucishaho ibiganiro bivuga ku makipe azitabira igikombe cya Afurika.

Dekoderi za Canal+ zo mu bwoko bwa HD zageze mu Rwanda mu mwaka ushize, aho zagurishwaga amafaranga ibihumbi 52 Frw, bagenda bagabanya ibiciro kugira ngo zigere kuri benshi. Umwimerere w’amashusho wo uracyari wawundi.

Tuyishime Alain ushinzwe Ubucuruzi muri Canal+ yavuze ko bashaka ko abanyarwanda bazaryoherwa n'igikombe cya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza