Equity Bank Rwanda yatangije uburyo bushya bwo gutanga serivisi kuri telefoni

Yanditswe na IGIHE
Kuya 24 Ugushyingo 2017 saa 08:55
Yasuwe :
1 0

Equity Bank Rwanda yatangije uburyo bushya bwo gutanga serivisi z’imari mu buryo bwihuse kandi budahenze, hifashishijwe ikoranabuhanga rigezweho ariko ryoroshye gukoresha kuri telefoni igendanwa.

Ubu buryo bwo kwifashisha ‘application’ yiswe “Eazzy Banking” umukiliya ashyira muri telefoni ye, bwatangijwe ku mugaragaro kuri uyu wa Gatanu, tariki ya 24 Ugushyingo 2017. Bugenewe ingeri zose z’Abanyarwanda bakorana na Equity Bank.

Umuyobozi Mukuru wa Equity Bank mu Rwanda, Hannington Namara yavuze ko izi serivisi nshya ari ingirakamaro kuko zizahindura byinshi mu mikorere ya Equity Bank n’uburyo ifasha abakiriya bayo.

Yagize ati "Twahaye abakiriya bacu ubushobozi bwo kwiyegereza serivisi zose z’imari hifashishijwe telefoni. Ibi bizabafasha kubona serivisi bifuza mu buryo bwihuse kandi budahenze."

Iyi ‘application’ iboneka kuri ‘Google Play store’ ku bakoresha Android ikaba ikiri gutunganywa ku bakoresha IOS, ikubiyemo amaserivisi yihariye atangwa na Equity Bank ariyo EazzyLoan, EazzyPay, EazzySave, EazzyNet, EazzyBiz, EazzyAPI, na Diaspora Banking.

‘EazzyLoan’ ni uburyo umuntu anyuramo asaba inguzanyo iri hagati y’amafaranga 5000 Frw na 500 000Frw, agasubizwa mu gihe kitarenze amasegonda atanu. Iyi serivisi ikaba igenewe abakiliya ba Equity Bank gusa.

Serivisi ya EazzySave yo ni uburyo umuntu ufite konti muri Equity Bank ashobora gukura amafaranga kuri konti ye akoresheje telefoni, akayimurira mu bubiko bwihariye ayateganyiriza ikindi gikorwa. EazzyNet ni serivisi ibigo byifashisha mu kwishyurana hifashishijwe internet naho EazzyBiz yo ikaba igenewe ibigo bifite konti nyinshi, ku buryo usanga kuzibona, kuzigeraho no kuzikoresha uko zakabaye bifata umwanya.

EazzyAPI yo ni serivisi igenewe abantu bubaka porogramu zitandukanye, ibigo by’ubucuruzi n’ibindi bitanga serivisi zirimo kwishyurana, ku buryo bashobora kurishingiraho bakubaka uburyo bwabo bubafasha muri serivisi z’imari kandi bizeye umutekano usesuye w’ibyabo.

Iyindi serivisi wasanga muri EazzyApp, ni Diaspora Banking; uburyo buzorohereza Abanyarwanda mu koherezanya amafaranga bari hanze y’u Rwanda.

Umuyobozi Mukuru wa Equity Bank yavuze ko Diaspora Banking ifite akarusho ko kuba ihendutse ugereranyije n’ibindi bigo bitanga serivisi z’imari mu Rwanda.

Yavuze ko kubaka iri koranabuhanga byatwaye miliyari 6,8 z’amafaranga y’u Rwanda, ikaba ifite ubuziranenge ku buryo nta kibazo cyo kwibwa amafaranga cyagaragara.

Equity Bank Rwanda yabonye ibyangombwa byo gukorera mu Rwanda mu 2011 ari banki ya 14 ariko ubu iri ku mwanya wa gatanu muri banki zihagaze neza ikaba muri eshatu za mbere zitanga inguzanyo ku mishinga mito mu Rwanda.

Iyi banki ikomoka muri Kenya, ikorera mu bihugu birindwi byo mu karere aho ifite abakiliya bakabakaba miliyoni 20.

Umuyobozi Mukuru wa Equity Bank mu Rwanda, Hannington Namara yavuze ko izi serivisi nshya ari ingirakamaro kuko zizahindura byinshi mu mikorere ya Equity Bank
Abitabiriye uburyo bushya bwo gutanga serivisi kuri telefone muri Equity Bank Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza